Pančicy-Kukow (SN/MWj). Přednoškaj dr. Tonija Bruka a kapłana dr. Jensa Buliša, wopyt w Njebjelčicach, swójbny swjedźeń na Kukowskim hrodźišću, skupinska jězba do Prahi, dźěło při pomniku Jaku­ba Barta-Ćišinskeho w Lipju a adwentnička běchu wjerški w lońšim dźěle Domowinskeje skupiny Pančicy-Kukow. Tak bilancowaše předsyda Pětr Korjeńk na wčerawšej hłownej a wólbnej zhromadźiznje skupiny. Do lětušeho plana zapisachu sej nimo wopyta inscenacije NSLDź a přednoška wopyt na serbskich slědach w Kamjencu, wulět do pólskeje Legnicy, čitanski wječor a swójbny swjedźeń. Wjace hač 40 přitomnych je šěsćwosobowe skupinske předsydstwo w jeho zastojnstwje wobkrućiło.