Hnujace zarjadowanje składnostnje 20. róčnicy Chróšćan zběžka wotměli

Chrósćicy (SN/MkWj). Něhdźe 150 ludźi wšěch generacijow je wčera wječor 20. róčnicu Chróšćanskeho šulskeho zběžka wopominało. K tomu zhromadźichu so na dworje tamnišeje šule, hdźež běchu so w lěće 2001 demonstracije a dalše akcije přećiwo hrožacemu zawrjenju tamnišeje serbskeje srjedźnje šule wotměwali. Mjez přitomnymi běchu tehdyši sobuwojowarjo, ale tež młodostni, kotřiž tehdy ani hišće narodźeni njeběchu. K tym słušeše přewšo młoda skupina Šwintuchi, kotraž je hosći hudźbnje witała.

Na kromje šulskeho dwora móžachu so wopytowarjo na informaciskich taflach wo podawkach před 20 lětami wobhonić. Tehdy bě sakske kultusowe ministerstwo wukazało, zo njesmědźa na Chróšćanskej šuli žadyn nowy 5. lětnik wutworić, dokelž njebě trěbna ličba šulerjow docpěta. Na to dóńdźe k tydźenje trajacym protestam a demonstracijam. Skónčnje dyrbjachu stawk zastajić. Něšto lět pozdźišo bě serbska srjedźna šula zawrjena.