Župa „Handrij Zejler“ ma so za „jadrowu kónčinu serbskeje Łužicy“

Wojerecy (SN/at). Domowinska župa „Handrij Zejler“ Wojerecy poda so do noweje wólbneje periody z personalnej nowosću. Načolne župne zastojnstwo wukonjataj Gabriela Linakowa a Marcel Brauman. Delegatki a delegaća pjatkowneje hłowneje wólbneje zhromadźizny we Wojerowskim wobydlerskim centrumje su jeju jednohłósnje do zhromadneje funkcije wuzwolili. We wosobinskich słowach běštaj kandidatka a kandidat do wólbow rozjasniłoj, čehodla je konstelacija z politiskich stron znateho dwójneho čoła za aktualne połoženje Wojerowskeje župy najpraktikabelniša: Funkciju „županki sama wukonjeć za mnje do prašenja njepřińdźe“, přizna naposledk jako rěčnica župneho předsydstwa skutkowaca Gabriela Linakowa. Před třomi lětami wuzwoleny Marcel Brauman bě kónc lěta 2019 županstwo złožił, dokelž wot spočatka 2020 jako referent w Domowinskim zarjedźe dźěła. Jako „županaj-dwójnikaj“ chcetaj so wonaj přichodne tři lěta pospytać.