Z dr. Jensom Baumannom, kiž je w sakskim ministerstwje nutřkowneho zamołwity za serbski komunalny program za spěchowanje dwurěčnosće, ma Domowina jako nošerka serwisoweho běrowa za serbsku rěč w komunalnych naležnosćach skutkowneho partnera. Wčera je dr. Baumann Wojerowski běrow wopytał.

Wojerecy (SN/at). Hromadźe z Domowinu přewjedźenu wuměnu nazhonjenjow z wjesnjanostami a měšćanostami wo serbskim komunalnym program móže sej dr. Jens Baumann dale derje předstajić. W nowembrje 2020 bě wón tule mysl, z terminom snadź spočatk minjeneho lěta, w Serbskich Nowinach zwuraznił. Wobmjezowanja koronapandemije dla su zawěsće jedna přičina, čehoždla dotal k tomu dóšło njeje.