Wo wurjadnej 21. hłownej zhromadźiznje Domowiny w Choćebuzu

Choćebuz (SN/at). Wustawki Domowiny su přiměrjene. Wospjetowanje procedury, kotraž bě delegatki a delegatow hižo na 20. hłownej zhromadźiznje třěšneho zwjazka loni w Slepom zaběrała, je 37 hłosowanja kmanych wobdźělenych ze zwjazkoweho předsydstwa a Domowinje přisłušacych župow a towarstwow pjatk do swjatkow w běhu ani dweju hodźin zmištrowało. Woni běchu so na wurjadnu 21. hłownu zhromadźiznu Domowiny w twarjenju stareho Großenhainskeho dwórnišća w Choćebuzu schadźowali.

Za prawniske naležnosće zapisanych towarstwow přisłušne Drježdźanske hamtske sudnistwo bě w loni wobzamknjenej wersiji změnjenych wustawkow někotre njedostatki zwěsćiło. Dokelž pak bě hłowna zhromadźizna wšitke změny na kóncu z jednym wobzamknjenjom schwaliła, su zwěsćene njekorektnosće zdobom tež tomu zadźěwali, zo móžachu z toho njepotrjechene aktualizacije płaćiwosće nabyć. Konkluzija bě, zo bu kóždy jednotliwy artikl wustawkow, w kotrymž měješe so něšto změnić, rozjimany a wo jeho wobsahu wothłosowany.