Domowina swój poradźowacy hłós w 33 šulskich konferencach zrjadowała

Budyšin (SN/mb). Domowina je swoje poradźowace dźěło w šulskich konferencach znowa zrjadowała. Franciska Albertowa, předsydka kubłanskeho wuběrka, bě zwjazkowemu předsydstwu (ZP) namjetowanu změnu tak wopodstatniła: Dźe wo to, zastupnistwo serbskich zajimow w Sakskej a Braniborskej tróšku zjednoćić. W Braniborskej su zwěsćili, zo njeje wužitne dosć, hdyž tón nadawk kompletnje čestnohamtskim přewostajiš. Tohodla je wotnětka referentka třěšneho zwjazka za naležnosće kubłanja a spěchowanje dorosta, Katrin Suchec-Dźisławkowa, zastupjerka w šulskich konferencach wobeju zwjazkoweju krajow.