Domowina wustupuje na hłownej zhromadźiznje přezjedna a do přichoda wusměrjena

Budyšin (SN/mb/MG). Domowina widźi z wuslědkami hłowneje zhromadźizny swoju rólu jako sylny hłós Serbow wobkrućenu. Předsyda Dawid Statnik, kotryž wot 2011 amtěruje, bu sobotu z rekordnym rezultatom 98 procentow znowa woleny: Na 106 ze 108 wólbnych cedlkow bě „haj“ nakřižowane, jedyn delegat je so hłosa wzdał, jedyn hłosowaše z „ně“. Nowa městopředsydka z Hornjeje Łužicy je Marlis Młynkowa (94 hłosow). Wona naslěduje Marka Hančika, kotryž za tute zastojnstwo hižo nastupił njeje. Wobkrućeny bu Hartmut Leipner, městopředsyda z Delnjeje Łužicy, ze 105 hłosami.