Najwyše wuznamjenjenje Domowiny, čestne znamješka a Dudak spožčili

Budyšin (SN/jp). „Dźensniši čas wopřimuje wulke změny“, zahaji předsyda Domowiny Dawid Statnik pjatk wječor narěč na swjatočnym zarjadowanju za spožčenje Myta Domowiny w Budyskim Serbskim domje. Z tym měni změny identity a rěče. Tola je tež ludźi, kotřiž so za rěč a identitu zasadźuja, zo njebyštej so zhubiłoj: „Su to ludźo, kotřiž wšitko hromadu dźerža. Su wo tym přeswědčeni, za čimž steja.“ Zdobom Statnik hišće jónu tři wodźace hesła Domowiny rozłoži: zamołwitosć, zwjazanosć a wotewrjenosć. Tak steji na přikład zamołwitosć za nadawk, kotryž dyrbiš za zdźerženje rěče a identity wukonjeć.

Mjez česćowanjom wuznamjenjenych je so duet wo dobru atmosferu postarał, kotryž wobsteješe ze spěwarki Walburgi Wałdźic a huslerki Izabele Kałduńskeje. Wobě stej njedawno CDku ze swójskimi spěwami wozjewiłoj. Z njeje stej tež někotre spěwy přednjesłoj.