Wuznawam: Tež ja słušam k tym, kiž wužiwaja dieselowe awto a kotřiž běchu z nim dotal spokojom. Na tym so tež po wonym skandalu manipulowaneho wotpłuna dla ničo změniło njeje. Wot dźensnišeho pak wěm, zo słuša moje awto ze swojimi runje třomi lětami a z wotpłu­nowej normu štyri k „staršim modelam“, kotrež měli so najspěšnišo wuměnić. To dyrbju drje wotnětka z hinašimaj wočomaj na swoju staru karu zhladować. Dopominaće so hišće na podawk w měrcu lěta 2011? Tehdy bě po zemjerženju a tsunamiju w jadrowej milinarni Fukushima w Japanskej k hawariji dóšło. Bjezposrědnje po tym je zwjazkowa kanclerka Angela Merkel připowědźiła wšitke němske jadrowe­ milinarnje, kotrež bě krótko do toho hišće jako najmoderniše a najwěsćiše swěta chwaliła, wotpinyć. K dieselowym awtam so wona dotal wuprajiła njeje, hišće nic .... Marko Wjeńka

Hamburg (dpa/SN). Po smjertnym nadpadźe z nožom w Hamburgskim wobchodźe žiwidłow je potrjechena wotnožka předewzaća Edeka wot dźensnišeho zaso wotewrjena. Tam bě 26lětny wotpokazany požadar azyla minjeny pjatk 50lětneho muža zakłół a sydom ludźi zdźěla ćežko zranił. Wón sedźi w přepytowanskej jatbje. Sobudźěłaćerjo wobchoda dóstanu psychologisku pomoc.

Kokošace a howjaze mjaso z bleše pić budźe wot septembra móžno. Peter Klassen, rězniski mišter z Triera, je napoj wuwił a chce jón po wšej Němskej rozšěrjeć. Móhło to napojowa jědź za ludźi być, kotřiž su wjele po puću, rjemjeslnikow, šoferow nakładnych awtow, ale tež pućowarjow abo sportowcow. Klassen je sej wědomy, zo změje napoj tež přećiwnikow. Přiwšěm hodźi so do časa smoo­thiejow a spěšnojědźow, wón rjekny.

Na ilegalnu technoparty je so wjace hač 5 000 přewažnje młodych ludźi sobotu njedaloko čěskeho Nymburka zhromadźiło. Policija jich bjez wuspěcha namołwješe teren wopušćić. Tójšto rejwarjow steješe pod wliwom alkohola a drogow. Tuž móžachu hakle wčera domoj jěć. Policija bě prezentna, njetrjebaše pak zapřimnyć. Wona zaraći dróhi, zo njebychu so dalši přidružili.

Budyšin (SN/at). Dźewjeć direktnych kandidatow nastupi we wólbnym wo­krjesu 156 – Budyšin I – za wólby zwjazkoweho sejma 24. septembra. Wokrjesny wólbny wuběrk je wšitke předležace namjety dźensa w zjawnym posedźenju w Budyšinje wobkrućił. Zapodate podłožki běchu pruwowali, a njejsu žane njedostatki zwěsćili, wozjewja wokrjesna wólbna nawodnica Andrea Peter. Na wólbnym lisćiku jako tak mjenowany prěni hłós jewja so sćěhowace mjena: Roland Ermer (CDU), Caren Lay (Lěwica), dr. Uta Strewe (SPD), Karsten Hilse (AfD), Jens Bitzka (Zeleni), Torsten Herbst (FDP), Günter Hutschalik (Swobodni wolerjo), Tobias Faku (BüSo, Wobydlerske hibanje Solidarita) a Andreas Richter (Wobydlerski kandidat – za jednu Němsku – neutralnje+ suwerenje+socialnje).

Ze Smělneje pochadźacy Richter je kandidat-jednotliwc a nima podpěru žaneje strony abo zjednoćenstwa. Za kandidaturu bě 46lětny diplomowy inženjer za ratarsku techniku 203 podpěranske podpisma zapodał, zdźěli Andrea Peter.