Budyšin (SN/at). Kriza na čole Budyskeho krajnoradneho zarjada njeje přewinjena. Wo tym swědča reakcije na zahajeny krizowy management. Žadanje za wostupom zastupowaceho krajneho rady jako skutkowne znamjo politiskeje hygeny njepopušći.

„To same njedosaha!“, takle reaguje towarstwo­ Witaj do Budyšina z.t. na krok krajneho rady Michaela Hariga, swojemu zastupjerjej Udej Wićazej (wobaj CDU) zamołwitosć­ za zarjad za wukrajnikow sćazać.­ Dołhož Wićaz zastojnstwo prě­njeho přirjadnika wukonja, njemóže tele towarstwo­ z krajnoradnym zarjadom­ hromadźe dźěłać. Rozmołwny poskitk wokrjesa zwjazkarstwam, kotrež so we wokrjesu wo ćěkancow staraja, pak bychu přiwzali, kaž towarstwo zdźěla.

Braniborske knježerstwo chce klimoškitne zaměry wosłabić

Podstupim/Choćebuz (dpa/SN/BŠe). Braniborske ministerstwo za hospodarstwo pod nawodnistwom SPD je w juliju připowědźiło klimoškitne zaměry wosłabić. Pozadk toho je, zo chce wobsedźer Janšojskeje milinarnje, Łužiska energija a milinarnje (LEAG), produkciski čas podlěšić. Runje tak je wobchad na dróhach bóle přiběrał hač wočakowane.

Nětko tež powěsćernja dpa wozjewja, zo braniborske knježerstwo a z nim Lěwica mjeztym rozmysluje, klimoškitne zaměry změnić. Wšako njehodźa so pod tuchwilnymi wuměnjenjemi dodźeržeć. „Klimoškitny plan Zwjazka předwidźi, zo ma so wudobywanje brunicy w lětach 2030 do 2050 zakónčić. Wuchadźamy z toho, zo budźe to w Braniborskej ně­hdźe wokoło lěta 2040“, wuchadźa z dokumenta, kotryž je frakciski šef Lěwicy Ralf Christoffers parlamentariskemu jednaćelej strony Thomasej Domresej a hospodarskemu fachowcej Matthiasej Loehrej přidźěłał. Ministerski prezident Dietmar Woidke (SPD) je porno tomu stajnje wotpokazował, termin za kónc wudobywanja brunicy mjenować.

Wopak natankowaneho awta dla dyrbjachu wobydlerjo wjacorych chěžow wčera swoje bydlenje wopušćić. Šofer bě město bencina mylnje wodźikowy peroksid tankował. Wohnjowa wobora w hessenskim Schlangenbadźe dyrbješe tuž jězdźidło do dźěłarnje dowjezć. Dokelž pak bojachu so chemiskeje reakcije, so wobornicy rozsudźichu bliske domy radšo ewakuować. Přiwołani fachowcy wobory pak maćiznu znješkódnichu.

Wjace hač 140 000 pozdatnje falšowanych cigaretow su cłownicy na šwicarskej mjezy sćazali. W němskej rěči wot­ćišćane warnowanske napisy na tyzkach běchu połne zmylkow. Nimo toho pobrachowaše dawkowe znamješko. Kaž wodźer transportera we Weilu nad Rynom potwjerdźi, bě je pola muža z wukraja kupił. Cigaretowe tyzki pak sej po wšěm zdaću wobhladał njeje.

Wittenberg/Halle (B/SN). Něhdźe 120 wědomostnikow z cyłeho swěta diskutuje we Wittenbergu wo „kulturnym reformaciji“. Tema pjeć dnjow trajaceho kongresa njeje jenož wuznam reformacije za teologiju a cyrkej. Su to tež wuskutki na politiku, prawo, hospodarstwo, towaršnosć, wuměłstwo, kubłanje, wědomosć, na wšědny dźeń a popkulturu.

Haseloff přećiwo namocy

Magdeburg/Bonn (B/SN). Ministerski prezident Saksko-Anhaltskeje Reiner Haseloff (CDU) wupraja so w přinošku za projekt „Demokratija trjechi!“ Centralneho komiteja němskich katolikow přećiwo namocy a ekstremizmej. Zatrašenje, difamowanje a wosebje namóc demokratiju wohrožeja. Demokratija ma so přeco zaso nadźěłać a ze žiwjenjom pjelnić.

Atentat w cyrkwi skućili

Ozubulu (B/SN). Při atentaće za čas Božeje mšě w cyrkwi swj. Filipa w nigeriskim Ozubulu zemrě jědnaće kemšerjow, 18 so zrani. Nadpad měrješe so na lokalneho barona za drogi, kiž pak w cyrkwi njebě. Atentatnicy běchu pječa něhdyši komplicy, kotřiž čujachu so wobšudźeni.

Ze syću korupciji zadźěwać