Houston (dpa/K/SN). Tropiske wichorisko Harvey načinja w ameriskim Texasu hoberske škody. Njepřestajne zliwki su wulke płoniny južneho Texasa na hoberske jězorišćo přetworili. Něhdźe 30 000 ludźi je donětka swoje bydło zhubiło. W milionowej metropoli Houstonje su dróhi a kolije powodźene. Milinowa syć je tohorunja chětro wobškodźena. Hač je naftowa industrija – wudobywanišća a rafinerije – potrjechena, wo tym njeje ničo znate. Sydom ludźi je zliwkow a wulkeje wody dla žiwjenje přisadźiło. Wyšnosć pak liči z hišće wjace woporami, dokelž přirodna katastrofa dale traje. Prezident USA Donald Trump wopyta dźens z mandźelskej Melaniju Texas, zo by so wosobinsce wo sćěhach přewodźenjow historiskeho rozměra wobhonił. Do najbóle potrjechenych kónčin pak so wón njepoda, zo njeby wuchowanske­ dźěła pomocnikow mylił. Trump ma za to, zo budźe naslědny bój z powodźe­njemi „droha wěc“.

Čim bóle so wólby zwjazkoweho sejma bliža, ćim bóle wobkedźbuješ, zo něchtó wólbne plakaty wobškodźa, je cyle wottorha abo tež wulke stejaki na kromje pućow pomóra. Nětko su njeznaći w Budy­šinje samo awto wobškodźili, z kotrymž běštaj pomocnikaj Lěwicy po puću, zo byštaj plakaty strony připrawiłoj. Zjaw, na tele wašnje swoje politiske měnjenje zwuraznić, najskerje woprawdźe přiběra. Ně, mi so tež druhdy njelubi, što wšo tele dny na plakatach čitam a wuhladam a štó mi z nich napřećo hlada. Ale je tohodla pomórać abo wottorhać njeje jenož nje­fairne, ale je nimo toho samo chło­stajomny delikt. Wunošniše na kóždy pad je, na přikład na wólbnym forumje, kajkiž Serbske Nowiny zhromadnje z Domowinu 7. septembra w Bu­dyskim Serbskim domje přewjedu, zjawnje swoje měnjenje rjec a so kandidatow prašeć, štož ći na wu­trobje leži. Marian Wjeńka

Budyšin (SN). Na wosebity rjad zarjadowanjow w Lutherowym lěće přeprošatej katolska wosadna rada a ewangelske předstejićelstwo Pětroweje cyrkwje. Wonej stej šěsć Budyšanow zdobyłoj, kotřiž budu stajnje srjedu we 18 hodź. w tachantskej cyrkwi ze swojeje biblije čitać. 6. septembra započnje z tym zapósłanc Sakskeho krajneho sejma Marko Šiman (CDU). Tydźeń pozdźišo móža zajimcy na Budyskeho wyšeho měšćanostu Alexandera Ahrensa (SPD) słuchać. 20. septembra čita z biblije serbska dźiwadźelnica Petra-Maria Bulankec-Wencelowa. Poslednju srjedu septembra zbliži jednaćel Hornjołužiskich klinikow Reiner Rogowski wopytowarjam jeho najbóle jimace pasaže knihi knihow. Po Gerdźe Lehmannje, jednaćelskim předstejićelu Budyskeje diakonije, 4. oktobra, chce bywša nawodnica Serbskeho gymnazija Rejza Šěnowa 11. oktobra tónle rjad zakónčić.

Biblija je zhromadna kniha ewangelskich a katolskich křesćanow, Budyska tachantska cyrkej jako simaltaneum je jich zhromadny Boži dom.

Do ćišćaka za kontowe wućahi čilał je muž w delnjosakskim Braunschweigu. Mašinu njemóže pjenježny institut najprjedy raz zasadźić, dokelž je elektronika wobškodźena. Škodu trochuja na wjacore sta eurow. Hižo w februaru bě w Celle k samsnemu padej dóšło, při čimž kamera muža wobkedźbowaše. Jako skućićela wuslědźichu bjezdomneho, kiž bě policiji hižo znaty.

Tři měsacy lětnich prózdnin běchu šulerjej w Estiskej předołhe. Tak napisa wón list kubłanskemu ministerstwu w Tallinnje. „Ja, Aleksander, sej přeju, zo měła so šula 1. awgusta započeć, dokelž hižo njewěm, što mam činić“, hólčec prošeše. W nětko wozjewjenej internetnej wotmołwje ministerstwa dawa kubłanska ministerka Mailis Reps šulerjej pokiwy za lětnje prózdniny. Přeću Aleksandera wšak njemóže wona wotpowědować.