Eksploziwny strach
To a tamne (05.09.17)
Hołb měješe wosebity kurěrski nadawk spjelnić a z drogami do argentinskeho jastwa lećeć. To pak bě jeho zahuba. Policiji wšak bě strategija skućićelow znata. Tak wona na hołbja łakaše a jeho zatřěli. W móličkim nachribjetniku nańdźechu zastojnicy 40 pilow, někotre gramy marihuany a USB-stick. Hižo w lěće 2013 bě argentinska policija skućićelow lepiła, kotřiž hołbje za tajke drogowe kurěrske lěty zasadźichu.
Z kolesom na awtodróze A 7 po puću bě muž w Delnjej Sakskej blisko Seevetala. Jeho awto njeměješe hižo žadyn bencin a bě stejo wostało. Muž wza sej kanister a šwikny so na koleso, kotrež bě připadnje sobu wzał. Byrnjež po předpisach na nabóčnej čarje napřećo wobchadej a ze swěcu jěł, njebě sej wěsty, kajki strach jemu poprawom hrožeše. Policija jemu přiwšěm popłatk napołoži.
Wšelake wólbne dokumenty
Serbšćinu přichodnje tež při wólbach zwjazkoweho sejma wužiwać
Budyšin (SN/MiR). Za štyri tydźenje smy namołwjeni wolić nowy Zwjazkowy sejm Němskeje. Hač do 3. septembra mějachu komuny swojim wólbokmanym wobydlerjam wotpowědne podłožki připósłać. „Informowanych je w Budyskim wólbnym wokrjesu 156 tuchwilu 215 400 wobydlerjow. Komuny Arnsdorf, Ottendorf-Okrilla, Radeberg, Wachau, Großröhrsdorf z Budyskeho wokrjesa słušeja do wólbneho wokrjesa 160. A za te Budyske wokrjesne zarjadnistwo žanu ličbu wólbokmanych nima“, zdźěli na naprašowanje nawodnica za wólby w Budyskim wokrjesu Andrea Peter. W měsće Budyšinje samym je něhdźe 33 000 wólbokmanych swoje wólbne podłožki dóstało.
Wólby njerozsudźene
Berlin (dpa/SN). Po telewiznym duelu mjez zwjazkowej kanclerku Angelu Merkel (CDU) a kandidatom SPD za tele zastojnstwo Martin Schulz spytatej wobě stronje hišće wo hłosy wolerjow wabić. Najebać to, zo je kanclerka po naprašowanjach telewizny duel dobyła, ma frakciski šef unije Volker Kauder wólby za njerozsudźene. Po słowach zwjazkoweho justicneho ministra Heika Maasa (SPD) je wustup Schulza wčera socialdemokratam zaso wjac zmužitosće spožčił.
Wjace ćišća wukonjeć
Tokio (dpa/SN). Japanska a USA chcedźa po šestym atomowym tesće Sewjerneje Koreje kónc tydźenja zhromadnje maksimalny ćišć wukonjeć. Na to dorozumištaj so dźensa japanski wonkowny minister Taro Kono a jeho hamtski kolega USA Rex Tillerson. Kaž japanske medije zdźěleja, chcetaj so wonaj na dźensa připowědźenym wurjadnym posedźenju Bjezstrašnostneje rady UNO za nowe sankcije přećiwo Pjönjangej zasadźić.
Wuradźuja zhromadnje
Wosebje na škit narodnych mjeńšin dźiwać
Berlin (SN). Předsyda Centralneje rady němskich Sintow a Romow Romani Rose je so z prezidentom zwjazkoweje policije Dieterom Romannom w telefonaće dorozumił, zo maja prawniskostatne kriterije za wšěch wobydlerjow płaćiwe być. Wosebje ma so při tym na škit narodnych mjeńšin dźiwać.
Pozadk rozmołwy je sćěhowacy: We wobłuku swojeho přednoška tydźenja na dnju wotewrjenych duri w Berlinskim zwjazkowym nutřkownym ministerstwje bě Rose zwjazkowej policiji rasizm wumjetował. Do toho bě jeje zastupjer wo tym rěčał, kak móhł so před paduchami škitać a jim kriminelnu turu skazyć. Při tym wón rjekny, zo ma kóžda etniska skupina swoje kriminelne metody.
Nětko staj so Rose a Romann telefonisce wujednałoj a chcetaj so w Podstupimje zetkać, zo byštaj wo potrjebje a móžnosćach zhromadneje kooperacije rěčałoj, kaž w zhromadnej zdźělence rěka. Zdobom prezident zwjazkoweje policije wuzběhny, zo njesmě so statna přisłušnosć wobydlerjow do prašenja stajeć. Pochad a barba kože nimatej kriterij policajskeho dźěła być.
Dwěle do wólbow
W awtowej branši změny trěbne
Drježdźany (SN/BŠe). Awtomobilowa branša je wodźacy industrijny wobłuk Němskeje a Sakskeje. Dźensa dźěła w nim wjac hač 80 000 ludźi swobodneho stata. Aktualneho połoženja wotpłunoweho skandala dla bě awtomobilowa branša tež tema posedźenja Sakskeho krajneho sejma.
Hospodarski minister Martin Dulig (SPD) apelowaše na industriju, nastupajo technologiske inowacije njepopušćić a sej dowěru kupcow zdobyć. Producenća jězdźidłow maja zamołwitosć napřećo kupcej. „Dyrbimy dieselowu technologiju dale wuwić“, wón wuzběhny. Awtomobilowa industrija ma so wo to starać, zo přetwar dieselowych jězdźidłow funguje, a za to zamołwići su awtotwarcy. „Wo zakazu dieselowych motorow ničo njedźeržu“, hospodarski minister podšmórny. Tuchwilnu debatu ma wón za šansu, branšu wobnowić. Wustork jědojteho wotpłuna ma so dale a bóle pomjeńšeć. Hospodarske ministerstwo je zwólniwe twarcow a dodawaćelow jězdźidłow podpěrać.
„Minority SafePack je šansa“
Bozen (SN). Južnotirolska ludowa strona (SVP), kotraž je sobustaw Federalistiskeje unije europskich narodnych mjeńšin (FUEN), a iniciatorojo wobydlerskeje iniciatiwy awtochtonych mjeńšin, su nětko zhromadnje regionalnu kampanju za wobydlersku iniciatiwu Minority SafePack zahajili. „Podpěramy iniciatiwu, kotraž wusměrja so na Europsku uniju“, zwuraznichu politikar SVP Philipp Achammer, najwyši zarjadnik Južneho Tirola Arno Kompatscher, zapósłanc italskeho parlamenta, ladinski politikar a wiceprezident FUEN Daniel Alfreider, zapósłanc Europskeje unije Herbert Dorfmann, wiceprezidentka FUEN Martha Stocker a bywši najwyši zarjadnik Južneho Tirola Luis Durnwalder tele dny na nowinarskej konferency.
To a tamne (04.09.17)
Eksploziwnu namakanku z Druheje swětoweje wójny je niski pegel Łobja wujewił. We wokrjesu Mišno su wuchodźowarjo wojerske warjenske sudobjo w błóće rěki wuhladali. W nim pak běchu wjacore patrony třělbow a pistolow. Wuchodźowarjo wotedachu eksploziwny pokład policiji, a ta přewostaji ju fachowcam, kotřiž su municiju znješkódnili.
Parna walca je so wo poslednje přeće lěta 2015 zemrěteho spisowaćela Terryja Pratchetta postarała. Na smjertnym łožu bě sej wón přał, zo jeho dźesać njedopisanych romanow zniča. Kaž zarjadnik zawostajenstwa Rob Wilkins zdźěli, je historiska parna walca přeće spjelniła a wotpohladnje přez Pratchettowy kompjuter jěła. Jeho romany njehodźa so tuž hižo wozjewić a wostanu na přeco zhubjene. Zbytki kompjutera přińdu nětko do wustajeńcy Salisburskeho muzeja.
Znowa kamjenje padali
Bondo (dpa/SN). W šwicarskim kantonje Graubünden je wčera wječor a dźensa rano dalša lawina kamjenjow a błóta do doła šła. Nimo wsy Bondo bě tónraz tež wjes Promotogno potrjechena. Wjacore domy su zničene. Dotal hišće žane informacije nastupajo zhubjene abo zranjene wosoby njepředleža. Połoženje je chětro njepřewidne.
Junckerej zličbowanku pósłał
Budapest/Brüssel (dpa/SN). Ministerski prezident Madźarskeje Viktor Orbán je list komisariskemu prezidentej Europskeje unije Jeanej-Claudej Junckerej napisał, w kotrymž sej žadaše, zo ma EU płót na mjezy k Madźarskej zapłaćić. Zličbowanka wučinja 400 milionow eurow, štož je połojca cyłkownych kóštow. Tole zdźěli wčera tamniši minister kanclerskeho zarjada János Lázár w Budapesće. Madźarska bě płót nazymu 2015 na mjezy k Serbiskej a Chorwatskej připrawiła, zo by ćěkancam znjemóžniła so do Europy dóstać.
Wěstosć wobdźělenych zaručić
