To a tamne (06.10.17)
Při Wolfgangowym jězoru w Awstriskej je so tam přebywacy dowolowy porik z Čěskeje chětro nastróžił. Ducy z Wowčeje hory k jězorej słyšeštaj wonaj trašace zwěrjeće zwuki a schowaštaj so na to w škitnej hěće. Wottam zazwoništaj policiju ze stracha, zo su to mjedwjedźe. Sydom mužow hórskeje wuchowanskeje słužby nastaji so na puć, zo bychu młodymaj pućowarjomaj pomhali. Tam wšak dyrbjachu porikej rozjasnić, zo su to zwuki jelenjow, hdyž so kóća.
Zo je jako młodostna kradnyła, přiznawa dźiwadźelnica Iris Berben. Dźensa 67lětna bě drje dźěłała a lutowała, pjenjezy pak za mnohe přeća njedosahachu. Tak je hdys a hdys drastu na Carnaby Street w Londonje spakosćiła. Berben měješe tam kónc 1960tych lět rejwanske a pohibowanske wukubłanje. Carnaby Street je jedna z najznaćišich nakupowanskich hasow.
Biedenkopf Tilicha kritizował
Cuxhaven (dpa/SN). Kurt Biedenkopf je w nowinje Zeit swoju stronu CDU a sakskeho ministerskeho prezidenta Stanisława Tilicha kritizował. Něhdyši sakski premier rjekny: „Wón njeje to ženje wuknył. Je w druhim swěće žiwy a primarnje zajimowany na kompromisach.“ 87lětny preferuje zwjazkoweho ministra za wonkowne naležnosće Němskeje Thomasa de Maizièra za naslědnika Tilicha (wobaj CDU). Thomas de Maizière wšak nablaku reagowaše, prajo: „Njejsym z nahladami Kurta Biedenkopfa přezjedny.“
Petry wobskoržena
Drježdźany (dpa/SN). Statne rěčnistwo Drježdźany je bywšu politikarku AfD Frauke Petry wopačneje přisahi dla wobskoržiło. Wobwinowanej wumjetuje, zo bě 12. nowembra 2015 jako swědka před wólbnym pruwowanskim wuběrkom Sakskeho krajneho sejma wopak wuprajiła a swoje podaća spřisahała. Tole zdźěli wčera Drježdźanski justicny zarjad. Frauke Petry je mylenje přiznała, wobkrući pak, zo njeje wotpohladnje wopak wuprajiła.
Schulz chce SPD wobnowić
Z wulkim swjedźenjom su wutoru při přistawje w Lipjom lětušu ...
Filmowej dnjejk prewenciji
Budyšin (SN/bn). Pod hesłom „Nikotin a alkohol – drogi wšědneho dnja we wizěru“ wuhotowachu Zwjazkowa centrala za strowotniske wujasnjowanje (BZgA), towarstwo Kamjentny dom a Budyski filmowy palast młodźinskej filmowej dnjej. Wjace hač 700 šulerkow a šulerjow z cyłeho wokrjesa w starobje dwanaće do 17 lět je so na zarjadowanju wobdźěliło. Nimo předstajenja filmow bě dohromady sydom interaktiwnje koncipowanych stacijow w Kamjentnym domje natwarjenych, kotrež wěnowachu so konsumej, skutkowanju a towaršnostnej akceptancy respektiwnje towaršnostnemu wotpokazanju drogow.
To a tamne (05.10.17)
Bože dźěćo pojědźe do Taiwana. To znajmjeńša přeje sej tam bydlaca Sapphine. A jědnaćelětny Daiki by so wjeselił, móhło-li wone do Japanskeje přijěć. Wobaj staj božemu dźěsću w Engelskirchenje list pisałoj. Jeho póstowa filiala je poprawom hišće zawrjena, přiwšěm je něhdźe dwanaće tydźenjow do hód hižo wjace hač 3 000 listow dóšło. To su mjez druhim tež dopisy z Chiny, Malajzije, Ruskeje a Serbiskeje.
W Italskej móža sej zajimcy chěžu za jenički euro kupić, znajmjeńša w sicilskim městačku Gangi, hdźež bydli něhdźe 6 700 ludźi. Město steji na skale, ma nahłe haski a wottam widźiš na wulkan Etna. W cyłku 30 tajkich jedyn-euro-domow je na předań. Špak wšak je tón, zo maja kupcy domske w běhu třoch lět wobnowić a z 5 000 eurami za to rukować.
Lammert pomina sej chutnosć
Berlin (dpa/SN). Rozžohnowacy so prezident zwjazkoweho sejma Norbert Lammert je nowych do parlamenta zaćehnjenych zapósłancow AfD napominał, swój mandat chutnje brać. „To žada sej rěčnu disciplinu w debaće, kiž dawa spóznać hódnotu parlamenta a kotraž njenaruna prowokaciju na městnje kooperacije. Wón mjenowaše wustup něhdyšeje předsydki AfD Frauke Petry ze strony „bjez přikłada“.
Žane nowe murje njetwarić
Mainz/Berlin (dpa/SN). Zwjazkowy prezident Frank-Walter Steinmeier je wčera na dnju jednoty před nowymi murjemi warnował. Na centralnym swjedźenju w Mainzu pod hesłom „Zhromadnje smy Němska“ z 1 200 čestnymi hosćimi žadaše sej wón sprawnosć w migraciskej politice. „Dźe wo legalne přichady, wo wodźenje a kontrolu.“ W Berlinje swjećachu porno tomu dźesaćitysacy 27. dźeń jednoty při Braniborskich wrotach. Policija žane wjetše zražki njezwěsći.
Trump nima wopory dosć zańč
W Choćebuskim wopomnišću něhdyšeje chłostarnje zetkachu so ...
Pólsko-němska busowa linija zachowana
Słubice/Frankfurt nad Wódru (RD/SN). Mjezy překročaca busowa linija 983, kotraž susodnej měsće Frankfurt nad Wódru a Słubice přez móst zwjazuje, so dalše lěto zachowa. Měsće, kotrejž sej wobhospodarjenje prěnjeho zjawneho wobchada mjez Němskej a Pólskej dźělitej, dóstaštej zańdźeny pjatk přihłosowanje narodno-konserwatiwneje knježerstwoweje strony PiS wo dalewjedźenju hižo pjeć lět wobstejaceho zhromadneho předewzaća, najprjedy na jedne lěto. Přihłosowali běchu w poslednim wokomiku, přetož wobhospodarjenje a wudźeržowanje busoweje linije běštej jenož hač do 30. septembra zawěsćenej.
Małe rěče spěchować
Hannover (SN). Delnja Sakska chce mjeńšinowej rěči saterofrizišćinu a delnjoněmčinu přichodnje sylnišo spěchować. Tamniši krajny sejm je na swojim zašłym posedźenju w Hannoverje wotpowědnu předłohu wo spěchowanju a jeho dalšim wutwarje jednohłósnje wobzamknył.
Delnja Sakska wupraja so tak mjez druhim za předšulske wuhotowanje a zawěsćenje wukubłanskich a dalekubłanskich poskitkow we wobłuku delnjoněmčina a saterofrizišćina kaž tež w posrědkowanju rěče kubłarkam a kubłarjam. Zachować chcedźa na runinje zakładnych šulow wobstejace struktury. Nastać maja zakładnošulskemu wobłukej runace so struktury podpěry za šule w sekundarnym schodźenku I. Spěchować chce kraj tohorunja nakup a wudawanje wuwučowanskich a wuknjenskich srědkow w mjenowanymaj rěčomaj.
Zwuk je dale a hrubiši
Katalonska chce hižo bórze swoju njewotwisnosć wozjewić
Barcelona/Madrid (dpa/SN/MiR/JaW). Konflikt w Katalonskej so dale přiwótřa. Statysacy wobydlerjow su wčera w regionje demonstrowali, a generalny stawk je zjawne žiwjenje w Barcelonje zdźěla dospołnje lemił. Kaž tamniše medije rozprawjeja, wostachu zarjady, šule a pěstowarnje kaž tež mnohe wobchody a metrostacije zawrjene. Katalanojo protestowachu přećiwo statnej namocy, kotruž běchu při referendumje wo njewotwisnosć minjenu njedźelu dožiwili.
