Liča z wobćežnymi jednanjemi
Innsbruck (dpa/SN). Zwjazkowy minister za nutřkowne naležnosće Horst Seehofer (CSU) chce najpozdźišo hač do spočatka awgusta wědźeć, hač su zrěčenja wo pospěšenym wotsunjenju ćěkancow z Italskej, Grjekskej a Awstriskej móžne. „Sym optimistiski, zo móžemy problem nutřkoeuropskeje migracije zhromadnje rozrisać, rjekny wón dźensa na kromje konferency nutřkownych ministrow EU w Innsbrucku. Přiwšěm liči minister z wobćežnymi jednanjemi.
Roth šwika Seehofera
Berlin (dpa/SN). Politikarka Zelenych Claudia Roth nutřkownemu ministrej Horstej Seehoferej a wšej CSU wumjetuje, zo přiběracym hrubosćam w politiskej kulturje a we wobchadnej rěči polěkuja. „Wot statneho ministra njewočakuju jenož respekt napřećo wustawje, ale tež přistojnosć a porjadne zadźerženje“, rjekny Roth nowinarjam. Rěčna a politiska hrubosć, kotruž Seehofer a CSU hižo měsacy dołho pěstuja, je „jěd za Němsku a wšu Europu“. Seehofer bě so wjeselił, zo Němska runje na jeho 69. narodninach 69 ćěkancow do Afghanistana wotsunje.
Žadaje sej sankcije
Zapósłancaj zwjazkoweho sejma Klaus-Peter Schulze a Marian Wendt ...
Kóždy druhi rentnar ma mjenje hač 800 eurow
NATO Afghanistan dale podpěruje
Brüssel (dpa/SN). Na druhim dnju wjerškoweho zetkanja su statni a knježerstwowi šefojo čłonskich krajow NATO dźensa wo dale trajacym zasadźenju w Afghanistanje a wo poměru wojerskeje aliancy k Ukrainje a Georgiskej wuradźowali. Na rozmołwy wočakowachu prezidentow tutych třoch krajow. Po informacijach wobdźělnikow nochcychu pak Ukrainje a Georgiskej hladajo na móžny přistup k NATO ničo konkretnje přilubić. Za to dyrbitej krajej najprjedy swoje konflikty z Ruskej rozrisać.
Dosć konkretne přilubjenja móžeše afghaniski prezident Ashraf Ghani wočakować. Statni a knježerstwowi šefojo běchu so hižo wčera dojednali, afghaniske wěstotne mocy hač do lěta 2024 pjenježnje podpěrać a jim w boju přećiwo talibanam pomhać.
Herbst: Ofensiwu na dobro Łužicy zahajić
Drježdźany (SN/MkWj). W diskusiji wo perspektiwach přichoda Łužicy žada sej sakski zapósłanc FDP w zwjazkowym sejmje a zastupnik liberalnych we wuběrku za wobchad a digitalnu infrastrukturu Torsten Herbst infrastrukturnu ofensiwu za wobchadnu syć a digitalnu techniku. Financować měli ju z wurjadneho fondsa za Łužicu. „Kwalita infrastruktury a hospodarski přichod Łužicy stej njedźělomnej. Tohodla trjeba Łužica ofensiwu na dobro lěpšeje wobchadneje infrastruktury. Mobilita ludźi a tworow runje tak kaž wutwar spěšneho interneta dyrbitej so rozsudnje polěpšić“, rěka w zdźělence zapósłanca. Wusahowace wobchadne projekty, kaž železniska čara wot Zhorjelca přez Běłu Wodu do Choćebuza abo elektrifikacija železniskeje čary mjez Drježdźanami a Zhorjelcom, měli so tuž pospěšić a z wurjadneho fondsa za strukturnu změnu płaćić. To samsne potrjechi sewjero-južny nadróžny zwisk mjez awtodróhomaj A 4 a A 15. Nimo toho móhli so dźěle Łužicy z pospytnej kónčinu za nowy mobiloškričkowy standard 5G stać. Tón je mjez druhim wažne wuměnjenje za awtonomne jězdźenje.
Dźeń a wjac chudych
Drohoćinki Pólskej wróćili
Sakska ministerka Eva-Maria Stange: Mały dźěl njesprawnosće zarunać
Drježdźany (SN/MkWj). Statne wuměłske zběrki w Drježdźanach přepodachu srjedź junija Pólskej republice 124 etnografiskich objektow a 14 historiskich fotografijow za Muzej archeologije a etnologije we Łódźi. Tak su so po 78 lětach někotre z poslednich dźělow něhdy wobšěrneje zběrki na swoje domoródne městno wróćili. Sakska statna ministerka za wuměłstwo a wědomosć dr. Eva-Maria Stange (SPD), pólski minister za kulturu a narodne kulturne herbstwo prof. Piotr Gliński a direktor Łódźskeho muzeja prof. Ryszard Grygiel su přepodaće objektow wutoru oficialnje wobkrućili. „Na tym dnju dopominamy zdobom na surowy wotrězk našich zhromadnych stawiznow. Ćim bóle so wjeselu, zo nas kulturne drohoćinki, pochadźace z Južneje Ameriki, Azije a Afriki, dźensa we Łódźi zjednoćeja. Z přepodaćom kulturnych objektow chcemy mały dźěl njesprawnosće zaso zarunać, kotruž su Němcy za čas nacionalsocializma w Pólskej skućili.
To a tamne (12.07.18)
Najdlěše nochće swěta su wottřihane a wotnětka w muzeju widźeć. 82lětny Indičan Shridhar Chillal nochće, kotrež běchu minjene 66 lět na jeho lěwej ruce na nimale 200 centimetrow narostli, prezentowaše je wčera w New-Yorkskim muzeju kuriozitow. Tam leža nětko we witrinje. Indičan njebě nochće wot 1952 wjace třihał. Lěta 2014 běchu je do Guinnessoweje knihi rekordow zapisali.
Wulka myš je w awstralskim wulkoměsće Adelaide 2 000 wopytowarjow baletneje inscenacije na njerjane wašnje wuhnała. Krótko do kónca předstajenja „Ćernjawka“ wupadny milina na koncertnej žurli a bu dospołnje ćma. Přihladowarjo dyrbjachu so z pomocu kapsnych lampow abo swěcy mobilnych telefonow ze žurle won namakać. Skónčnje so wukopa, zo bě wulka myš centralny milinowód měšćanskeje štwórće překusała.
Reaguja wulce wolóženi
Berlin (dpa/SN). Z wulkim wolóženjom je zwjazkowe knježerstwo na powěsć wo poradźenym wuchowanju wšitkich dwanaće młodostnych a trenarja z prózdnjeńcy w Thailandskej reagowało. Knježerstwowy rěčnik Steffen Seibert rěčeše wo „wulkotnej powěsći“ a wobdźiwaše „wutrajnosć zmužitych hólcow kaž tež kmanosć a rozsudźenosć wuchowarjow“. Nurjacy su wčera poslednich pjećoch ze zapławjeneje prózdnjeńcy wuswobodźili, w kotrejž dyrbjachu 17 dnjow wutrać.
Nowe cła za chinske wudźěłki
Washington (dpa/SN). We wikowanskim konflikće z Chinu su USA dalšu lisćinu chłostanskich cłow za chinske wudźěłki předpołožili. Społnomócnjeny prezidenta Donalda Trumpa za wikowanje Robert Lighthizer bě lisćinu zestajeć dał. Hižo minjeny pjatk bě Amerika Chinje chłostane cła hač do 25 procentow napołožiła. W Pekingu su „šokowani“ a připowědźeja hnydome napřećiwne naprawy. Wot nowych cłow USA su chinske žiwidła runje tak potrjechene kaž chemikalije, tekstilije a elektroniske nastroje.
Wjele mortwych při nadpadźe
