Skandal wjetši
Brónje hišće njepřepytowane
Choćebuz (dpa/SN). Połdra lět po tym, zo běchu w lěsu pola Kopańcy (Neuhausen) we wokrjesu Sprjewja-Nysa 400 historiskich brónjow namakali, njeje jich pochad přeco hišće wujasnjeny. Pobrachuje personal, kiž móhł sej tesaki, hlebje a druhe brónje ke kałanju wobhladać a posudźować, zdźěli Thomas Kersting wot Braniborskeho krajneho zarjada za hladanje pomnikow. Mjeztym su teren hišće raz přepytowali. Brónje su tuchwilu w magacinje zarjada składowane, njejsu pak hišće dokumentowane.
Chětro přezerzawjene brónje běchu w februaru 2016 namakali. Prawdźepodobnje słušeja do zběrki brónjow wjercha Pücklera. Zdźěla su kralowske wopony spóznajomne. Dotal njeje jasne, kak běchu brónje do lěsa přišli. Móžno je, zo běchu je wojacy Čerwjeneje armeje po Druhej swětowej wójnje do lěsa znosyli, zo bychu je zničili. Zdźěla buchu rozbuchnjene. Fachowcy za znješkódnjenje municije běchu tesaki a hlebje namakali, jako staru municiju z Druheje swětoweje wójny rumowachu.
To a tamne (11.08.17)
Z bjezkablowym telefonom je žona swojeho mandźelskeho w Heilbronskim wokrjesu w Badensko-Württembergskej zbiła a tak zasadźenje policije zawinowała. Kaž zastojnicy zdźělichu, bě wona swojemu mužej z telefonom wotzady na hłowu biła, jako wón na terasy sedźeše. Tón na to swoju žonu ze šawlom sputa. Přičina agresiwnosće bě spěšnje jasna: Test alkohola wunjese wjace hač tři promile.
Přećelej zetkataj so k wječeri. Njejapce zemrějetaj. Tónle podawk sta so z hódančkom w francoskim městačku Authon-du-Perche. Kaž z přepytowanja policije wuchadźa, njebě jeju nichtó namócnje morił. Zastojnicy zdźělichu, zo bě so starši z njeju, kotryž bě trochu alkoholizowany, na kusku mjasa zasbrěbnył a so na to zadusył. Jeho přećel zemrě po zdaću šoka dla na infarkt wutroby. Pad je rozrisany a slědźenja zakónčene.
Studija: Boja so přichoda
Njespokojnosće nad swójskim połoženjom dla ludźo AfD wola
Što su přičiny, zo přiwobroćeja so ludźo, tež dźěłarnicy, prawicarskopopulistiskemu orientowanju, potajkim AfD? Tele prašenje je dźěłarnistwam bliska Hansa Böcklerowa załožba w aktualnym přepytowanju sćěhowała. Slědźerjo su kónc januara/spočatk februara nimale 5 000 wosobow w starobje wot 18 lět nastupajo nastajenje, orientowanje hódnoty a wólbnu preferencu online-woprašeli. Wuslědki je Němski dźěłarniski zwjazk wčera w Berlinje předstajił.
Za přichodowu załožbu Łužica
Běła Woda (SN/at). Dźesać klučowych projektow ma frakcija Zwjazka 90/Zelenych w Sakskim krajnym sejmje nastupajo strukturnu změnu we Łužicy za nuznje trěbne. To je frakcija na klawzurje dźensa w Běłej Wodźe schwaliła. Ministerski prezident Stanisław Tilich (CDU) je drje njedawno w Běłej Wodźe tak jasnje kaž ženje do toho wo kóncu wudobywanja brunicy rěčał, tam rěka. Dokelž dźe wo wjace, hač jenož dźěłowe městna w brunicy narunać, měli strukturnu změnu skónčnje započeć, sej Zeleni žadaja.
K projektam słuša, zo dyrbja program elektrifikowanja na čaromaj Choćebuz–Zhorjelc a Drježdźany–Zhorjelc jako prěnjorjadne zastopnjować, a ciwilnu towaršnosć na prócowanjach wo přichod wobdźěleć. Łužicu měli jako kompetencny region za energijowu změnu profilować a syć łužiskich wysokich šulow z pohórnistwowej wědu wutworić. Dale namjetuja Zeleni, zo požada so region Hamor, Běła Woda, Mužakow wo zwjaz- kowu zahrodnu přehladku 2033, a zo wutworja přichodowu załožbu Łužicu.
Dorěče z VW z wašnjom byli
Hannover (dpa/SN). Komunikaciske dorěče mjez awtotwarcom VW a krajnym knježerstwom w Delnjosakskej běchu tež za čas knježerstwa CDU a FDP z wašnjom. Wo tym rozprawjeja nowinarjo. Awtokoncern je po tym knježerstwo z „formulaciskimi pomocami“ zastarował. Tak bě sej firma swój čas nowinske zdźělenki ministerskeho prezidenta Davida McAllistera (CDU) a hospodarskeho ministra Jörga Bodeho (FDP) předpołožić dała a „komunikaciske směrnicy“ sposrědkowała.
Podhladny w chorowni
Paris (dpa/SN). Po nadpadźe z awtom na wojakow zajaty podhladny je dale w jednej z Pariskich chorownjow. Zranjenjow dla njemóžachu jeho dotal hišće přesłyšować, rozhłosowy sćelak Franceinfo rozprawja. Muža běchu wčera na awtodróze njedaloko Boulogne-sur-Mer zajeli. Policisća muža při tym z wjacorymi wutřělemi zranichu. Zastojnicy su mjeztym bydlenje muža přepytali. Pola njeho jedna so wo Algeričana, kiž ma w Francoskej prawo přebywanja.
Kontrole před šulemi
Cyrobizny měła EU dohladować
Gabriel nětko w Južnym Sudanje
Wobě stronje hrozytej ze sylnosću
Pjönjang/Washington (dpa/K/SN). Nawodnistwo sewjerokorejskeho wójska je na najnowše připowědźenje Donalda Trumpa, nałožić „woheń, złósć a sylnosć“ demonstratiwnje měrnje reagowało, ameriskemu prezidentej atestujo, zo nima žanežkuli zrozumjenje za chutnosć situacije. „Z čłowjekom bjez rozuma njeje wěcowny dialog móžny, jenož z absolutnej sylnosću pola tajkeho něšto docpěješ“, rěka we wozjewjenju wójska, publikowanej wot statneje agentury KCNA.
Po prezidenće je nětko tež ameriski minister za zakitowanje James Mattis atomowu zwadu ze Sewjernej Koreju přiwótřił. Komunistiski kraj njemóže so nastupajo wojersku sylnosć tola na žane wašnje z USA a jich zwjazkarjami měrić, Mattis rjekny, warnujo zdobom doraznje „před aktiwitami, kiž bychu dowjedli ke kóncej režima a k zničenju jeho ludu“. Mattis namołwi Pjönjangske knježerstwo, wzdać so programa k wuwiwanju atomowych brónjow.
