Warnuja před swětowej wójnu
SPD zaso tam, hdźež bě
Berlin (dpa/SN). Nahladnosć socialdemokratow mjez wolerjemi dale woteběra. Po dźensa wozjewjenym „wólbnym trendźe Stern-RTL“ je SPD porno minjenemu tydźenjej dalši procent přisadźiła a na 23 procentow spadnyła. Tak leži nětko zaso na niwowje, kotryž měješe wona do nominowanja Martina Schulza za kanclerskeho kandidata socialdemokratow kónc januara. Porno tomu móžeše so lěhwo CDU/CSU wo procent na nětko 39 procentow polěpšić.
Přidobywši dwaj procentaj je Lěwica z dźesać procentami nětko samo dwucyfrowa. Tak by třeća najsylniša móc w zwjazkowym sejmje była. FDP a Zeleni maja po wosom procentach, AfD kaž minjene tydźenje sydom procentow.
W direktnym přirunowanju ze zwjazkowej kanclerku Angelu Merkel (CDU) dyrbi Schulz dalše straty na so brać. Móhli-li ludźo kanclera direktnje wolić by 53 procentow Angelu Merkel woliło, Martina Schulza jenož 22.
Durje dale šěroko wotewrjene
Braniborscy předewzaćeljo na wuprawje w Ruskej byli
Choćebuz (SN). Kak hodźa so zwiski mjez braniborskimi a ruskimi předewzaćemi nawjazać a pohłubšić? Tele prašenje steješe w srjedźišću južnobraniborskeje hospodarskeje delegacije z 35 wobdźělnikami, kotřiž přebywachu wot 13. do 19. junuja w Ruskej. Tak pobychu zastupjerjo Industrijneje a wikowanskeje komory (IHK) Choćebuz mjez druhim w Pětrohrodźe a w regionje Kursk. Spěchowałoj běštej wuprawu braniborske ministerstwo za hospodarstwo a energiju kaž tež Europska unija. Wuslědki zetkanjow a rozmołwow su wčera w Choćebuzu předstajili.
To a tamne (21.06.17)
Rój kuntworow je w Hamburgu zasadźenje wohnjoweje wobory zawinił. Starosćiwy wobydler bě ju alarmował, dokelž bě běły kur při wěži hłowneje cyrkwje swj. Michała widźał. Wobornicy pak njemóžachu kur zwěsćić. Hakle po dlěšim pytanju dohladachu so pod wěžu roja kuntworow, kotryž drje zdaloka wupadaše kaž kur.
Wot staršeju wopušćenu młodu lěsawu (Waldohreule) je lěsnik Markus Roth w badensko-württembergskim Allmannsweileru wuchował. Do toho bě wona dwaj dnjej apatisce na samsnym blaku w lěsu sedźała. Doma dawaše jej muž spočatnje sykane mjaso. Mjeztym žerje mały hósć kokošace a howjaze mjaso. Hdys a hdys sydnje so wuchowarjej na ramjo.
We wěrje so derje čuje
Berlin (B/SN). Zwjazkowa kanclerka Angela Merkel, dźowka ewangelskeho fararja, so w křesćanskej wěrje derje čuje. „Wona mi pokazuje: Dawa něšto nade mnu a we mni, štož da mje zrozumić, zo sym Bože stworjenje, z kmanosćemi, kotrež pak su tež wobmjezowane“, rjekny 62lětna w Berlinje. Tele dopóznaće wuči ju „wěstu ponižnosć“ a dowola jej, po zmylkach zaso doprědka hladać. Křesćanska wěra je zdobom poselstwo, zo njemóža zmylki čłowjeka zničić. Z wěry wona zdobom spóznawa, zo ma „so zasadźeć za dostojnosć čłowjeka“.
Wužiwaja pjenjezy za brónje
Lipsk (B/SN). Předsyda rady Ewangelskeje cyrkwje w Němskej Heinrich Bedford-Strohm deal z brónjemi mjez USA a Sawdi-Arabskej wótrje kritizuje. Hdyž jenički bombowc 1,2 miliardźe dolarow płaći a „swětowe zhromadźenstwo runočasnje ani 4,4 miliardy dolarow nima, zo by katastrofalny hłód we wuchodnej Africe wotwobarało, je to skandal“, rjekny ewangelski krajny biskop na cyrkwinskim dnju w Lipsku. USA běchu kónc meje ze Sawdi-Arabskej brónjenske zrěčenje w rozměrje 100 miliardow eurow wotzamknyli.
Strategiska sćerpliwosć trěbna
Gabriel pomina podpěru
Berlin (dpa/K/SN). Wonkowny minister Sigmar Gabriel žada sej skutkownišu mjezynarodnu podpěru za zmištrowanje nuzy, kotruž ćěkancy po cyłym swěće tradaja. „Němska sama tele wužadanje njezdokonja“, zwurazni politikar SPD składnostnje swětoweho dnja ćěkancow. „Trěbne su zhromadne mjezynarodne napinanja po sprawnym rozdźělenju zamołwitosće, zo by so běda ćěkancow złahodniła a k dołhim migraciskim krizam docyła njedochadźało.
Wjac hač 120 ludźi zahinyło
Rom (dpa/K/SN). Při znjezboženju łódźe na Srjedźnym morju je prawdźepodobnje 126 ludźi zahinyło. Mjezynarodna organizacija za migraciju powołuje so při tym na wuprajenja štyrjoch ćěkancow, kotřiž móžachu so do Palerma na Sicilskej wuchować. Woni tež rozprawjachu, zo běchu pašowarjo ludźi wosrjedź morja motor gumijoweho čołma wotstronili a so na to prosće zminyli. Čołm ze 130 ludźimi, pochadźacymi zwjetša ze Sudana, so na to podnuri.
Sakska CDU dale sylna
Budu drje dale mjez sobu rěčeć
Moskwa/Washington (dpa/K/SN). Na wottřělenje syriskeho bojoweho lětadła typa Suchoj Su-22 přez mašinu USA je Ruska na te wašnje reagowała, zo ze swojeje strony konfrontaciju přiwótři. Tak přetorhny wona wokomiknje komunikaciski kanal mjez ruskim a ameriskim wójskom, štož słuži poprawom zadźěwanju njeluboznosćow nad Syriskej. Naměstny ruski wonkowny minister Sergej Rjabkow zasudźi wottřělenje jako „akt agresije“. Jako wotmołwu zaměri so ruske wójsko nětko tež na lětadła a drony wot USA nawjedowaneje koalicije, zjewja-li so zapadnje rěki Eufrat.
USA wšak po wšěm zdaću na tym zaleži, situaciju zaso změrować. Šef staba ameriskeho namórnistwa Joseph F. Dunford dźensa rano rjekny, zo su prěnje kontakty hižo nawjazali. Trjeba nětko je, z Ruskej wobnowić koordinaciju w powětře nad tak mjenowanymi demarkaciskimi pasmami. USA a Ruska zamóža njepřećelskosći w Syriskej zadźěwać.
Iniciatiwu SafePack předstajić
Zastupnicy němskich mjeńšin Europy so w zwjazkowej stolicy schadźuja
Berlin (SN/MkWj). W zwjazkowej stolicy schadźuje so wot wčerawšeho 26. Dźěłowe zjednoćenstwo němskich mjeńšin. Organizowani pod třěchu Federalistiskeje unije europskich narodnych mjeńšin (FUEN) zetkawaja so zastupnicy němskich mjeńšin ze wšeje Europy, zo bychu wo swojich naležnosćach a wo zhromadnym dźěle ze Zwjazkowej republiku Němskej wuradźowali.
Konferenca wotměwa so we wuskim zhromadnym dźěle ze społnomócnjenym zwjazkoweho knježerstwa za naležnosće narodnych mjeńšin a wusydlencow Hartmutom Koschykom (CSU). Politikar je wobdźělnikam zetkanje z wonkownym ministrom Sigmarom Gabrielom (SPD) we wonkownym ministerstwje kaž tež wopyt w zwjazkowym sejmje pola prezidenta sejma Norberta Lammerta organizował. Planowany je dale přebytk w słowakskim wulkopósłanstwje w Berlinje. Zamołwići běchu wšitkich zastupnikow konferency na banket z kulturnym programom přeprosyli, zo móhli jim němsku mjeńšinu w Słowakskej předstajić.
Nacionalizm wakuum orientacije pjelnił
Budyšin (CS/SN). Za rěčniskim pultom w Muzeju Budyšin steješe Frank Richter jenož na spočatku wčerawšich „Budyskich rozmołwow“. Bywši nawoda krajneje centrale za politiske kubłanje a dźensniši jednaćel załožby Drježdźanskeje cyrkwje Našeje knjenje změni najprjedy sydanski porjad. Stólcy zestajachu do koła, a Frank Richter přednošowaše wosrjedź nich. Na to móžachu so wšitcy, kotřiž chcychu sobu diskutować, na srjedźne stólcy sydnyć. Tale nowosć měješe Budyšanow pohnuwać zo swoju njespokojnosć ze stronskej demokratiju powšitkownje kaž tež w měsće zwuraznja. Diskusija pak wosta jara wěcowna. Na kóncu Richter rjekny: „Trjebamy stajnje tajke koło.“ Wšako dźe wo to, perspektiwu změnić a so do tamneho zamyslić. Wobžarujomne je, zo je so w minjenych 27 lětach skomdźiło njewučić šulerjow jenož matematiku, ale tež empatiju. Tak, kaž Richter potwjerdźi, je so rozmołwna kultura zhubiła. Mnozy chcedźa jenož hišće sebje samoho słyšeć a prawje měć.
To a tamne (20.06.17)
Martin Luther jako playmobilowa figurka eksistuje mjeztym milion króć. Minjene dny su milionty 7,5 centimetrow wulki eksemplar z pjerom a bibliju w ruce wupósłali, zdźěli zhotowjer hrajkow Geobra Brandstätter w frankskim Zirndorfje. Mini-Luther w talaru je tak najwuspěšniša jednotliwa figura w stawiznach předewzaća. We wobchodach ju njepředawaja, dóstanješ pak figurku w turistiskich centralach. Produkować dała bě ju Ewangelska cyrkej w Němskej.
Ze swojim běhanskim kolesom je so štyrilětny na jězbu po Schwerinje nastajił. Swojej maćeri wón ničo njepřeradźi, jako so wčera popołdnju z nakromneho dźěla města do centruma poda. Po tym zo bě syna podarmo pytała, zawoła mać policiju. Hodźinu pozdźišo pěšce mały ćeknjenc napadny, a wona zawoła policiju. To měješe hólc hižo štyri kilometry zady so.
