Berlin (dpa/SN). Zwjazkowa policija móže wotnětka europskeho koparskeho mišterstwa dla nachwilne namjezne kontrole na wšitkich mjezach Němskeje přewjesć. Tajke kontrole wotměwaja so při mjezach Danskeje, Francoskeje a krajow Benelux, hdźež dotal kontrolowali njeběchu. Nimo toho móže policije tež pućowacych ze Schengenskeho ruma na lětanišćach a přistawach kontrolować. Tole je zwjazkowa nutřkowna ministerka Nancy Faeser (SPD) hladajo na 14. junija so zahajace koparske mišterstwo wukazała. Wobarać chcedźa so islamistiskim teroristam runje tak kaž koparskim hooliganam a internetnym nadpadnikam.

Caen (dpa/SN). Na swojim wopyće w Francoskej składnostnje róčnicy nadběha aliěrowanych w Normandiji před 80 lětami su ukrainskemu prezidentej Wolodymyrej Zelenskemu francoske bojowe lětadła typa Mirage přilubili. Tole je francoski prezident Emmanuel Macron w rozmołwje z telewizijnymaj sćelakomaj TV1 a France 2 připowědźił. Lětadła maja Ukrainje zmóžnić, swój teritorij a powětrowy rum škitać. W leću chcedźa ukrainskich pilotow wukubłać. Nimo toho ukrainsku brigadu 4 500 wojakow w Francoskej trenuja.

Na prašenje, hač chcyła Francoska wojerskich wukubłarjow do Ukrainy pósłać, so Macron wuwiny. Ukraina Francosku wo tajku misiju prosy, štož njeby tež žana eskalacija była, wón rjekny. „Dźěłamy wusko z partnerami a rozsudźimy tajke prašenja kolektiwnje jako koalicija.“

Bojowe lětadła Mirage njesłušeja wjace k najmodernišim. Francoska chce je poněčim z nowymi mašinami typa Rafale narunać. Mirage su spočatk 80tych twarić započeli. W 90tych lětach słušeše Mirage k najmodernišim wjacezaměrowym bojowym lětadłam.

Wšitke politiske strony Pólskeje wo hłosy wolerjow wojuja

Waršawa. Chětro horca politiska nalada knježi tuchwilu w Pólskej – wólbow Europskeho parlamenta dla. Wo městna w najwyšim zastupnistwje EU prócuje so zajutřišim, njedźelu, na wšěch 1 020 kandidatow. Politikarjo spytaja wolerjow poslednje dny do wólbow mobilizować. Tak je ministerski prezident Donald Tusk minjenu wutoru swojich přiwisnikow do Waršawy zwołał. Něhdźe 25 000 přichwatanych dopominaše wón na historiski datum před 35 lětami. Tehdy bě sej dźěłarnistwo Solidarność z Lechom Wałęsu na čole prěnje zdźěla swobodne wólby wuwojowało a je jasnje dobyło. Mjeztym 80lětny Wałęsa, kiž bě samo prezident kraja, přitomnych wutoru naležnje prošeše, kandidatow knježaceje Wobydlerskeje platformy Donalda Tuska wolić. Jenož wón je kmany kraj přichodne lěta spušćomnje nawjedować. „Mějach jenož pjeć lět jako prezident“, Wałęsa zwurazni, nutrnje prošo, „dajće jemu znajmjeńša wosom lět, potajkim dwě wólbnej dobje.“

Myslachmy sej před třomi lětami, zo su zamołwići w sakskim krajnym zarjedźe za šulu a kubłanje (LaSuB) skónčnje zrozumili, wo čo w serbskich kubłanišćach dźe: žiwu serbšćinu a přichod serbskeho ludu. Smy so mylili, nětko chcedźa serbsku rjadownju, kotrejž tehdom přizwolichu, zaso wotstronić – personelnych problemow na němskich šulach dla. To so spřećiwja sakskej wustawje, wšako njejsu Serbja winowaći, němski lud zachować, ale Němcy maja eksistencu serbskeho ludu zaručeć. Dokelž ma mała ličba serbskich šulerjow něšto z němskimi stawiznami činić. Přiwšěm maja tež serbske swójby prawo na normalne žiwjenje, bjeztoho zo dyrbja nastajnosći wo samozrozumliwe wěcki wojować – kaž maćernorěčny wobswět za swoje dźěći na šuli. Tohodla njeje zachowanje serbskeje rjadownje w Radworju jeničce naležnosć horstki potrjechenych swójbow, ale wšěch rozumnych Łužičanow. Je-li trjeba, dyrbimy za rěčne rumy demonstrować. Marcel Brauman