Berlin (dpa/SN). Generalny sekretar CDU Carsten Linnemann žada sej wótriše prawidła Europskeje unije nastupajo swobodu při wuzwolenju dźěłoweho městna w EU, zo by so znjewužiwanju němskeho systema wobydlerskeho pjenjeza zadźěwało. Němske měła swój socialny system „rezilient­niši“ sčinić a so tak přećiwo nadpadam ­kriminelnych cwólbow škitać, rjekny Linnemann nowinarjam. Na runinje EU měło so zapřijeće dźěłopřijimarja znowa definować. Njesměło hižo móžno być, zo potrjecheni jenož něšto hodźin dźěłaja a sej zbytk připłaćić dadźa, byrnjež połnje dźěłać kmani byli. Zwjazkowa ministerka za dźěło ­Bärbel Bas (SPD) chce tohorunja namjety za polěpšenja předpołožić a mjez druhim ­wuměnu datow mjez krajemi wolóžić.

Washington (dpa/SN). Prezident USA Donald Trump je na naprašowanje žurnalista baltiskim krajam a Pólskej pod­pěru přilubił, jeli Ruska połoženje dale přiwótři. Na prašenje, hač by krajam při zakitowanju pomhał, Trump rjekny: ­„To činju.“

Čłonojo NATO chcedźa přichodne dny wo zranjenju estiskeho powětroweho ruma přez ruske wojerske lětadła wuradźować. Estiska bě jako čłon NATO wo tute konsultacije prosyła, wotpowědujo artiklej 4 zrěčenja NATO. Ruska prěje, zo su jeje lětadła powětrowy rum Estiskeje zranili.

Nimo toho bě Pólska minjeny pjatk wozjewiła, zo stej so ruskej bojowej lětadle wolijowej platformje w Baltiskim morju přewšo nisko bližiłoj a jeje wěstotne powětrowe pasmo raniłoj. Mašinje stej jenož 150 metrow nad točenskej platformu Petrobaltic lećałoj a tak wojerski nadpad napodobniłoj. Statnu mjezu Pólskeje pak přiwšěm zraniłoj njejstej. Nad Baltiskim morjom dochadźa stajnje zaso k prowokacijam.

Francoska chce stat Palestinjanow připóznać – generalna debata UNO

New York (dpa/SN). Nimale dwě lěće po zahajenju Gazaskeje wójny mjez Israelom a islamistiskej Hamas připowědźa wjacore kraje, zo chcedźa do zahajenja generalneje debaty UNO palestinski stat připóznać. Mjez druhim bě Francoska naspomniła, zo wo tutej skerje symbo­liskej kročeli rozmysluje. Z tym by so ­Paris wuraznje přećiwo woli Israela stajił. Tak by štyri z pjeć tak mjenowanych ­wetowych mocow UNO stat Palestinjanow připóznało. Ruska, Wulka Britaniska a China su to hižo činili. USA jako naj­wuši zwjazkar Israela palestinski stat ­tuchwilu wotpokazuja. Tež Němska Pa­lestinu „wokomiknje“ hišće jako stat ­njepřipóznawa. Wonkowny minister ­Johann Wadephul (CDU) je to na swojim wopyće w Bliskim wuchodźe hišće raz potwjerdźił.

Dźensa wječor zahaja wot francoskeho prezidenta Emmanuela Macrona sobu organizowanu konferencu k rozrisanju konflikta w formje dweju statow. To by rěkało, zo israelski a palestinski stat ně­hdy měrniwje jako susodaj eksistujetej.

Što móhło wójnu w Gazy skónčić? Kapi­tulacija Hamas – tutomu wuprajenju šef­redaktora „Jüdische Allgemeine“ so přizamknu. Porno cionistam, kotřiž su před wosom lětdźesatkami hižo wutworjenju dweju statow w Palestinje přihłosowali, su so zastupjerjo arabskeje ludnosće hinak rozsudźili a Israel přeco zaso nadběhowali, ze zaměrom, tón kraj a jeho lud wotbyć. Zo maja dźensa jenož Arabojo, kotřiž su staćenjo Israela, prawo, demokratisce wo swojim knježerstwje wothłosować, je hórka ironija stawiznow. Tež, zo politikarjo „zapadneho“ swěta nětko před zdźěla islamistiskimi demonstrantami kapituluja a fantom palestinskeho „stata“ připóznawaja, wo kotrymž ani jasne njeje, kotra organizacija by tam knježiła. ­Bohužel su so na woběmaj bokomaj konflikta radikalni přesadźili. Tomu njemóžeš ze „symboliskej politiku“ wotpomhać, ­kotruž samo opozicija w Israelu wotpokazuje, kotraž ma Netanjahuwa za winika za tute „připóznaće“. Marcel Brauman