Wotstawk mjez uniju a AfD snadny
Berlin (dpa/SN). Wotstawk mjez CDU/CSU a AfD je dale a snadniši. Tole je wuslědk najnowšeho woprašowanja sćelaka ARD mjez wolerjemi. W tak mjenowanym njedźelnym prašenju – koho byšće wolili, bychu-li přichodnu njedźelu wólby zwjazkoweho sejma byli – unija ze 26 procentami dale nawjeduje. To pak je zdobom najniši staw po lěće 2022. AfD docpěwa ze 24 procentami nowy rekordny niwow.
SPD by wot wolerjow dale 16 procentow hłosow dóstała, Zeleni by z jědnaće procentami snadnje mjenje ludźi woliło hač minjeny tydźeń. Lěwica by jědnaće procentow docpěła (plus jedyn). Zwjazk Sahry Wagenknecht (minus jedyn) so dale wot mjezy mandata wotsaluje a by ze štyrjomi procentami runja FDP bjez šansow był, do zwjazkoweho sejma zaćahnyć.
Unija CDU/CSU a SPD wjedu wokomiknje hišće koaliciske jednanja. Połojca ludźi (49 proc.) njewěri, zo so jich žiwjenje z nowym knježerstwom polěpši.
Poetisku žiłku Pücklera dodnić
Wjace plajtow
To a tamne (04.04.25)
Tysac eurow pokuty dyrbi bywši wrotar němskeho narodneho koparskeho mustwa Jens Lehmann zapłaćić. Jeho běchu po Oktoberskim swjedźenju z 0,7 promilemi alkohola za wodźidłom awta lepili. Mnichowske hamtske sudnistwo ma tole za přeńdźenje přećiwo wobchadnemu porjadej. Jězbnu dowolnosć je Lehmann hižo před měsacom wotedał. Tuž je naležnosć za njeho wotbyta.
Wjace hač 200 pasažěrow luksusoweje wulětniskeje łódźe „Queen Mary II“ je na norovirus schorjeło. Prěnje rozprawy wo pasažěrach, kiž běchu bluwali a na židlawu skoržachu, su so w měrcu jewili, jako bě łódź w New Yorku pozastała. Po informacijach zarjadnišća za škit před mrětwami USA je 224 z cyłkownje 2 538 sobujěducych schorjeło, nimo toho 17 čłonow mustwa. Woni su izolowani. Łódź tuchwilu desinficěruja.
Musk so wróćo sćehnje
Washington (dpa/SN). Prezident USA Donald Trump je po informacijach wjacorych medijow naspomnił, zo njebudźe miliardar Elon Musk přichodnje wjace tak intensiwnje za knježerstwu USA dźěłać kaž dotal. Musk je to pječa podobnje zwuraznił. Wón je ze swojim rigidnym postupowanjom w ministerstwach kraja a pušćenjom přistajenych tójšto njeměra zbudźił. Akcije jeho awtoweje firmy Tesle su masiwnje na hódnoće zhubili.
NATO wuradźuje w Brüsselu
Brüssel (dpa/SN). Wonkowni ministrojo čłonskich krajow NATO su dźensa w Brüsselu dwaj dnjej trajace wuradźowanja zahajili. Powšitkownje wočakowachu, zo sej USA wot europskich partnerow znowa masiwne zwyšenje wudawkow za brónjenje žadaja. Jeli so w EU hladajo na zakitowanske prašenja dale jenož na Washington spušćeja, nochcedźa USA wjace za nju zamołwići być. To je zakitowanski minister USA Pete Hegseth hižo w februaru připowědźił.
Pacientow lěpje wodźić
Ze 350 pisanymi jutrownymi jejkami su wčera Gródkowske hłowne ...
Woclownjemaja wulke ćeže
Brüssel (dpa/SN). We woclownjach Sakskeje přiběra strach před wikowanskej wójnu, zdźěla tež wo eksistencu. Připowědźene cła 25 procentow ze stron USA njejsu za branšu ani najwjetši problem. Wysoke płaćizny miliny a płuna zamołwitych najbóle bola. „To je hotowa błudnosć“, rjekny šef dohladowanskeje rady Freitalskeje woclownje Sönke Winterhager. W Francoskej płaći energija połojcu, w USA dźesaćinu. Nětko přidruža so hišće cła USA. Zo bychu financne straty wobmjezowali, wotpinu we woclownjach w tajkim času na bursach kachle.
Europska unija wočakuje, zo so kraje, kotrež su wocl dotalnje do USA předawali, přichodnje na EU měrja.
Krajny sejm etat wobjednawał
Drježdźany (dpa/SN). Sakski krajny sejm je dźensa prěni raz wo naćisku dwójneho etata za lěće 2025 a 2026 wuradźował. Knježerstwo bě jón 24. měrca předstajiło a krajnemu sejmej zapodało. W naćisku planuja wudawki 25 miliardow eurow. Po wjele lětach chce Sakska ličbu statnje přistajenych nětko zaso znižić.
Financny minister Christian Piwarz (CDU) rěči wo bolostnych skrótšenjach we wjacorych wobłukach. Najebać to wobsahuje etat tež inwesticije do přichoda. Financowanje wučerjow w swobodnym staće skrótšenja njenazhoni. Sakska dyrbi deficit 4,3 miliardy eurow wurunać. Třećina etata ma komunam słužić. Přiběrace socialne wudawki budget najbóle poćežuja.
Trump razne cła wukazał
Washington (dpa/SN). Prezident USA Donald Trump je hoberski paket cłow wukazał, kotryž Europsku uniju wosebje raznje trjechi. Za wšitke importy z EU žadaja sej w USA wotnětka 20 procentow cła, za awta samo 25 procentow. Je to dotal najagresiwniša a najskutkowniša kročel we wikowanskej politice prezidenta USA. Nowe cła swětowe hospodarstwo bjez dwěla bolostnje poćežuja – wikowanska wójna je njewobeńdźomna. „Woni wotkasěruja. Je zrudne, tole widźeć“, Trump rjekny. Z nowymi cłami chce Trump „wuklukowanje, wumocowanje a wurubjenje USA“ ze stron druhich krajow skónčić a złotu dobu w stawiznach kraja zahajić.
Europska unija přihotuje mjeztym hižo swójske naprawy, je pak přiwšěm zwólniwa, dalše rozmołwy wjesć. Tole je prezidentka komisije EU Ursula von der Leyen připowědźiła. Uniwersalne cła přećiwo wšemu swětej su razny dyr za swětowe hospodarstwo z hoberskimi sćěhami. „Miliony ludźi dyrbja z wyšimi płaćiznami žiwidłow ličić“, wona praji.
Hdyž šulerjo šoferow powuča
Policisća a šulerjo kontroluja spěšnosć před šulemi w Sakskej
Radeberg (dpa/SN). Zhromadnje ze šulerjemi policija tutón a přichodny tydźeń nadróžny wobchad před zakładnymi šulemi w Sakskej kontroluje. „Dźe wo wobchadnu wěstotu dźěći. Wone su ći najmjeńši w nadróžnym wobchadźe a tež najsłabši“, rjekny sakski minister za nutřkowne naležnosće Armin Schuster (CDU) při oficialnym zahajenju projekta „Blitz für kids“ wčera w Radebergu.
Minjenych 30 lět su njezboža z dźěćimi wo 60 procentow znižili. „To je zaměr tajkich akcijow“, wón doda. Před šulemi chcedźa šoferow sensibilizować.
