Podstupim (dpa/SN). Wobchadny minister Braniborskeje Detlef Tabbert (BSW) žada sej lěpše financowanje dróhotwara w Braniborskej. „Wužiwamy dróhi, doniž njejsu dotrjebane. Klětu trjebamy ćim wjace pjenjez za nje“, rjekny Tabbert nowinarjam. Tuchwilu maja dróhotwarski etat něhdźe 80 milionow eurow wob lěto. Trjebali pak bychu 20 procentow wjace, chcedźa-li tuchwilny staw zachować. „Přichodne etaty dyrbjeli 95 do 110 milionow eurow wob lěto wobsahować“, minister wudospołni.

Braniborski krajny sejm wuradźuje tutón tydźeń we wjacorych wuběrkach wo planowanym dwójnym etaće. Braniborska steji při tym před wjacorymi pla­nowanymi skrótšenjemi a kreditami někotrych miliardow eurow. Krajny sejm móže hišće wšelake změny přesadźić. W juniju dwójny etat 2025/2026 doskónčnje wobzamknu. Tójšto zwjazkow skorži na přikład w socialnym a medicinskim wobłuku skrótšenjow dla.

We wobchadnym wobłuku skorža opoziciskej frakciji CDU a AfD njedosahaceho financowanja dla. „Takle njehodźał so ani tuchwilny staw zachować“, rěka.

Pohladnicu pasažěra łódźe „Titanic“, kotruž je na dnju wotjězda wotpósłał, su w Jendźelskej za rekordnu płaćiznu přesadźowali. Z 300 000 puntami (350 000 eurow) wuzbytkowachu na kóncu pjeć króć telko, kaž běchu do toho trochowali. Pasažěr prěnjeje klasy colonel Archibald Gracie bě kartu 10. apryla 1912 w Southamptonje wotpósłał. Štyri dny pozdźišo so łódź podnuri. Gracie bě mjez přežiwjencami.

Antikske meble zemrěteho znateho entertainera Haralda Juhnkeho su blisko Stuttgarta přesadźowali. Za komodu w stilu francoskeho krala Louisa XVI. zapłaći zběrar 5 000 eurow, awkciski dom zdźěla. Meble pochadźachu z wile Juhnkeho w Berlinje. Dźiwadźelnik zemrě před 20 lětami w starobje 75 lět. Doma bě so wón rady z meblemi wobdawał, kotrež pochadźachu z 19. lětstotka.

Kevelaer (B/SN). Wćipnosć na putnikowanjach k hnadownym městnam je fenomen nowšeho časa. „Zajim ludźi přiběra, dokelž začuwaja žedźbu za spiritualitu a pytaja za duchownymi a kulturnymi městnosćemi“, praji dušepastyr Bastian Rütten. Tohodla měli so po jeho słowach křesćenjo bóle prašenjam turistow wotewrěć a jim wo stawizniskej wosebitosći rozprawjeć.

Diaspora w Finskej

Helsinki (B/SN). Wot lěta 1917 je Finska njewotwisna. Na tak wulkej płoninje kaž je Němska bydli 5,5 milionow ludźi. 64 procentow přisłuša ewangelsko-lutherskej, jedyn procent ortodoksnej a 0,3 procenty katolskej cyrkwi ze 16 000 čłonami. Jeničke biskopstwo w Finskej je we hłownym měsće Helsinkach, kotremuž přisłuša wosom katolskich cyrkwjow. Wěriwi maja dołhe puće na Bože mšě a dalše wobrjady.

Přitomnosć zaručić

Stockholm (dpa/SN). Wojerske wudawki su 2024 po wšěm swěće mjeztym dźesate lěto pospochi stupali. Něhdźe 2,72 bilionow dolarow (2,38 bilionow eurow) su kraje swěta hromadźe za wójska wudali, zdźěla Stockholmski měrowy slědźenski institut SIPRI w swojej najnowšej rozprawje. To bě 9,4 procenty wjace hač w lěće 2023. Je to najwjetši rozrost w jenož jednym lěće po skónčenju zymneje wójny. Němska zaběra 4. městno.

Wojakow do wójny pósłali

Pjöngjang/Seoul (dpa/SN). Sewjerna Koreja je prěni króć scyła wobkrućiła, zo je swójskich wojakow za podpěru Ruskeje do wójny přećiwo Ukrainje pósłała. Jich zasadźenje je mócnar Kim Jong Un wosobinsce wukazał, statna powěsćernja KCNA zdźěla. Přidatnje k wojakam sćele Sewjerna Koreja po informacijach južnokorejskeho generalneho staba wulke mnóstwa brónjow a municije do Ruskeje. Mjez nimi su rakety, kanony a třělby.

Baerbock w Syriskej jednała