Berlin (dpa/SN). Zwjazkowy kancler ­Friedrich Merz je sej wěsty, zo je hospodarstwo Němskeje na dobrym puću a zo tuchwilnu krizu přewiny. Němska je zaso atraktiwna městnosć za inwesticije, ­rjekny předsyda CDU wčera do zahajenja klawsury kabineta w Berlinje. To poka­zuja mnohe inwesticiske přilubjenja ­předewzaćelskeje iniciatiwy „Made for Germany“. Zawody chcedźa hač do lěta 2028 něhdźe 735 miliardow eurow w Němskej inwestować. Njejasne při wšěm je, kelko srědkow su woprawdźe nowe ­inwesticije a kajke projekty hižo dlěje planuja.

„Koncentrujemy so na to, zo so němske hospodarstwo zaso zhraba a rozrosće. Němska dyrbi za inwestorow zaso atraktiwna być. Sylnjenje hospodarstwa, kmanosć wubědźowanja, wottwar běrokratije a socialne reformy su ćežišća, na kotrychž ma knježerstwo přichodnje dźěłać. Statne wudawki chcedźa pruwować.

Knježerstwo chce z 80 projektami běrokratiju wottwarić a z tym 16 miliardow eurow zalutować.

Sedźo we wosobowym awće so hustohdy hóršiš, hdyž dołhi rynk motorskich přesćehnješ. Wšako je dołha kolona zwjetša tež pomału po puću. Dohladaja-li pak ­so šoferojo awtow sobujěducych na motorskich, to so njemało dźiwaja. Přetož na sociusu abo w pódlanskim wozu brunčakow sedźa dźěći a młodostni. Z woči­njenym woknom, jich juskanje słyšiš. Mali a młodźi husto tež nimo jěducym kiwaja. Tak so trochu zmoršćene čoło spěšnje zhubi. Za to pak je w mjezwoču posměwk widźeć. Abo njebyšće tež wy rady w tutej kolonje sobu jěli? Kajka to rjana tradicija, kotruž bikerojo z bliska a daloka, ale tež tójšto Serbja, wuhotuja.

Za chowancow dźěsćownje we Wuježku a Marije Mar­ćineho domu w klóštrje ­Marijina hwězda w Pančicach-Kukowje je to kóždolětny wjeršk. Přewšo drohotny to dar bikerow, policije a socialnych za­rjadnišćow tym, kotrychž swět je husto wobmjezowany.

Milenka Rječcyna

Šulerki a šulerjo z čěskich Mikulášovic w Dečinskim wokrjesu su minjeny pjatk ­Budyšin wopytali. Tam pobychu mjez druhim w Serbskim muzeju, hdźež jich ­Christiana Dubawic witaše. Šulerjow přewodźeštaj wučerjej Petr Pánek (3. wot­prawa) a Veronika Englerová (2. wotprawa). Wobaj běštaj hižo loni we Łužicy přebywałoj. Po nawróće do domizny bě jimaj jasne, zo dyrbitaj serbsku kulturu na kóždy pad tež swojim šulerjam zbližić. Dokelž běštaj hižo loni w meji wot Serbskeho ­muzeja zahorjenaj, bě wopyt w tutej serbskej instituciji samozrozumliwy. Tam ­nawuknychu tež někotre zakładne serbske zapřijeća. Foto: SN/Bojan Benić

Lipsk (dpa/SN). Wot dźensnišeho su lěkarske praksy w Němskej winowane, zo elektronisku pacientowu aktu (ePA) wužiwaja a wšitke diagnozy, wuslědki přepytowanjow abo podaća wo medikamentach w njej zapisaja. Wona ma pacienta čas ­žiwjenja přewodźeć a wuměnu informacijow mjez lěkarskimi praksami kaž tež apotekami wolóžić. Zjednoćenstwo kasowych lěkarjow (KV) zdźěli, zo móža 90 procentow dohromady 6 946 lěkarskich sakskich praksow nowy system hižo wužiwać. W minjenych měsacach pak su ­přeco zaso techniske ćeže dožiwili. Tohodla móžachu ePA jenož we wobmjezowanej měrje wužiwać. Feedback ze stron lěkarkow a lěkarjow nastupajo ePa je dosć rozdźělny, tak KV rozprawja. Někotři skedźbnichu na wjace časa, kotryž sej ­wužiwanje noweho systema žada. Tamni pohódnoćichu elektronisku aktu pacientow pozitiwnje a zwěsća hižo prěnje lěpšiny we wšědnym dnju. Mjez druhim ­mjenuja w tutym zwisku přidatne informacije a diagnozy dalšich lěkarjow w akće, kotrež nětko za anamnezu pacienta k dispoziciji steja a kotrež njetrjebawšim dwójnym přepytowanjam zadźěwaja.