Porjedźenka
Kruch „Arche Nora“ wuzwoleny
Strowa konkurenca?
Lotka a Sophia po lóštnej knižnej premjerje wjedłoj
Budyšin (SN/BŠe). Kotre zwuki, zwěrjata, kwětki atd. su w přirodźe a so w štyrjoch počasach jewja? Nowa BOOKii-knižka, kotraž je njedawno w Ludowym nakładnistwje Domowina wušła, wě wotmołwu na tele a dalše prašenja. Minjeny pjatk stej Lotka a Sophia zajimcow na wosebje lóštnu knižnu premjeru „Powědaj mi wo počasach“ na serbskej wirtuelnej žurli witałoj. Live stej wonej po wotměnjawym programje wjedłoj, při čimž witaštej zas a zaso nowych akterow, kotřiž su na knize sobu dźěłali.
Tak bě přełožerka knihi Bianka Wjeńcyna přitomna, kotraž ideju knihi a jeje nastaće zhromadnje z lektorku nakładnistwa Janinu Mikławškowej rozłoži. Dźowka lektorki Helena je tohorunja w knize rólu Paule přewzała a wudaće samo ze swójskim spěwom wobohaćiła. To wšak je na knižce wosebite, zo njehodźa so z BOOKii-pisakom jenož teksty a zwuki wotwołać. Dźěći Paula, Jonas, Marie a Noah přeradźeja, što so w nalěću, lěću, nazymje a zymje wšitko stawa, što rosće a što hodźi so wšitko činić. Milan Jurk kaž tež Valentina a Lucian Šołta su figuram w knize tohorunja swój hłós spožčili.
Přihotuja aquamediale 14 na kromje Błótow
Słopišća (SN/CoR). Hižo předwčerawšim su w Słopišćach (Schlepzig) započeli wuměłske twórby za lětušu aquamediale 14 instalować. Błótowski wuměłstwowy festiwal wotměje so tam wot 5. junija do 18. septembra. Kurator Harald Larisch precizuje hromadźe z jědnaće wobdźělnikami jich wustajenske namjety.
Nowy kulturny decernent wokrjesa Dubja-Błóta Stefan Wichary je so w hakle spočatk lěta wotewrjenym Łužiskim domje wuměłcow Słopišća z kuratorom, projektowej nawodnicu Anniku Meißner a předsydu spěchowanskeho towarstwa aquamediale Norbertom Schmidtom wo přihotach rozmołwjał. „Za mnje wosobinsce je aquamediale premjera. Angažement akterow a kwalita wuměłskich twórbow mje zahorjatej. Wjeselu so na wuměłstwo, na ludźi a nadźijomnje na program bjez starosćow“, Wichary rozłožuje.
Najrjeńše jejka dorosta mytowane
Wo knihach a kniharni (16.04.21)
Za wšitkich lubowarjow je kniharnja nadal wotydźenja wot 10 do 18 hodź. wotewrjena. Jeničke wuměnjenje je, zo wužiwaće při nakupje škitny nahubnik.
Jako nowostka je do Smolerjec kniharnje dóšła z nakładnistwa swj. Bena w Lipsku „Bistum Dresden-Meißen 100 Jahre Wiedererrichtung“. W njej stej mjez tójšto dalšimi přinoškami tež dwaj, napisanej wot serbskeju duchowneju dr. Jensa Buliša a Clemensa Hrjehorja. K samsnej hłownej temje 100 lět Drježdźansko-Mišnjanske biskopstwo wuda redakcija Časopisa za sakske stawizny, krajowědu, přirodu a wobswět swoje prěnje čisło Sakskich domizniskich łopjenow 2021. Tu staj mjez dalšimi awtorami dr. Měrćin Wałda a tohorunja dr. Jens Buliš.
Dalše nowowudaće rěka „Wo die wilden Tiere wohnen – Mein Leben als Naturführer in der Lausitz“ wot Karstena Nitscha z nakładnistwa Goldmann. Awtor je swojim wobkedźbowanjam přidał swójske njewšědne wobrazy wo přirodźe a zwěrinje.
Tři spěchowanske myta móžne
Drježdźany/Kamjenc (SN). Skerje pozitiwny wliw ma po zdaću koronapandemija na počesćenja we wobłuku Lessingoweho myta. Sakski kabinet je na swojim wčerawšim posedźenju nowu wersiju statuta Lessingoweho myta wobzamknył, po kotrymž hodźa so město dotal dweju nětko tři Spěchowanske Lessingowe myta spožčić.
„Z tejle změnu móžemy runje w lěće 2021 hladajo na koronakrizu třoch wuměłcow wuznamjenić a jich zdobom podpěrać“, rjekny statna ministerka za kulturu a turizm Barbara Klepsch (CDU). Kaž wona wuzběhny, změje kuratorij tak wěstu fleksibelnosć. Wšako „mjez kreatiwnymi a jónkrótnje namjetowanymi wuzwolić woprawdźe lochko njeje“. Kuratorijej je po nowym statuće zdobom přewostajene, zo za spěchowanske myta předwidźane 15 000 eurow po swojej woli na lawreatow rozdźěli. Hłowne myto je z 20 000 eurami dotěrowane.
Spožčić tři spěchowanske myta město dweju bě kuratorij na posedźenju k pomjenowanju lawreatow Lessingoweho myta namjetował, kaž z přisłušneho ministerstwa rěka.
Wot wuchodnych Frizow wuknyć?
Strategije za inwentarizaciju lokalnych muzealnych zběrkow kulturneho herbstwa wuwiwać je zaměr dźělneho projekta dr. Roberta Lorenca we wobłuku předewzaća Serbskeho instituta „Hódnoćenje imaterielneho kulturneho namrěwstwa Delnjeje Łužicy w němsko-serbskim konteksće“. Wčera wotmě so prěnja z dweju zakónčaceju dźěłarničkow pod hesłom „Zběrać! A w přichodźe?“.
Choćebuz (SN/CoR). Kak činja to poprawom Wuchodni Frizojo? Wo inspiraciju 17 wobdźělnikow webinara, pochadźacych hłownje z muzealnych zarjadnišćow ze zwjazkarstwa Łužiski muzejowy kraj (ŁMK), je so wčera jednaćelka Muzejoweho zwjazka Wuchodna Friziska dr. Nina Hennig starała. Do toho je koordinator dźěłoweho kruha ŁMK Sven Vogt skrótka wuwiće zběrkow po towaršnostnym přewróće předstajił a dźensniše problemy mjenował: zo maja čestnohamtsce skutkowacy profesionalnje dźěłać, zo njeje jasne, po kotrych kriterijach ma so zběrać a zo digitalna inwentarizacija hišće wšudźe z wašnjom njeje.
„Prosće fyzikaa nic magija“
Serbska tereministka Carolina Eyckec je we wobłuku 7. sinfoniskeho koncerta Württembergskeje filharmonije twórbu „Wosom počasow“ předstajiła. Něhdźe 1 500 ludźi je koncert online sćěhowało.
Reutlingen (SN/bn). Württembergska filharmonija je ćěleso, kotrež bě na aktualne wuměnjenja dosć derje přihotowane. Format live w interneće wusyłaneho koncerta su hižo před třomi lětami zahajili, w prěnim rjedźe tohodla, zo bychu publikumej zwonka města hudźbu zbližili. Njezadźiwa tuž, zo bě kwalita wčerawšeho 7. sinfoniskeho koncerta institucije zwuk a wobraz nastupajo nadpřerězna. Tež wuměłski wukon móžeše so widźeć dać. Program wopřiješe sinfoniju čo. 3 A-dur Franza Schuberta, sinfonisku baseń „Tapiola op. 112“ Jeana Sibeliusa kaž tež koncert za teremin a orchester „Wosom počasow“ Kalevija Aha. Finski komponist bě twórbu w lěće 2012 za Carolinu Eyckec spisał. W Reutlingenje je jón serbska wirtuozka jako solistka zhromadnje z tamnišej filharmoniju předstajiła. Wosebitosć impresionistisce wobwliwowaneho krucha su pasaže, w kotrychž teremin ćičolenje ptačkow napodobnja.
