Ljouwert (SN/bn). Składnostnje wot UNESCO proklamowaneho Mjezynarodneho dnja maćeršćiny, z kotrymž chce institucija rěčne bohatstwo kaž tež kulturnu wjelorakosć spěchować a wosebje na problematiku wernakularow z 10 000 a mjenje rěčnikami skedźbnić, pokazuje Europski běrow za małe rěče EBLT prawidłownje 21. februara filmy narodnych mjeńšin.
Wčera prezentowachu w zapadofriziskej stolicy Ljouwerće – nižozemsce Leeuwarden – prapremjeru paska „Daor klept de klokke weer’!“. Titul woznamjenja telko kaž „To časnik zaso klinka!“. Adapcija romana H. Hoogeveena je prěni hrajny film docyła, kotryž bu w rěči swellingwerfs – wosebity to dialekt delnjoněmčiny w Nižozemskej – zwoprawdźeny.
Tohorunja premjerny w Ljouwerće bě přinošk z Łužicy. Krótkofilm Angele Šusteroweje „Zmij“ dožiwi publikum prěni króć z friziskimi podtitulemi. Po wuspěšnym předstajenju produkcije loni we wobłuku Europskeho mjeńšinoweho filmoweho festiwala w Husumje běchu so friziscy zarjadowarjo za to rozsudźili, pask do lětušeho programa na dnju maćeršćiny zapřijeć a jako předfilm prapremjery pokazać.
Budyšin (SN/bn). Składnostnje róčnicy zasozjednoćenja Němskeje před 30 lětami planujetej towarstwo Kamjentny dom a młodźinske dźiwadło Serbskeho gymnazija Budyšin w Němsko-Serbskim ludowym dźiwadle zhromadnu produkciju. Na zakładźe wěrnosći wotpowědowaceho podawka ma nastać scenarij, kotryž wotbłyšćuje stawizny młodeje rockoweje skupiny w NDR. Najprjedy přewažuja ekscesiwne swjedźenje a imita- cija wulkich, často zapadnych idolow. Poněčim pak je hudźbnikam žiwjenje w realnje eksistowacym socializmje přewuske. Tohodla počinaja wo tym rozmyslować, do ZRN ćeknyć.
Wot spočatka měrca chcedźa sobuskutkowacy hru we wobłuku prawidłownych dźěłarničkow nazwučować. Nimo kónctydźenskich terminow wotmějetej Kamjentny dom a NSLDź dohromady tři probowe lěhwa w lětnich, nazymskich a zymskich prózdninach. Režiju wukonja nawoda młodźinskeho dźiwadła Měrko Brankačk. Inscenacija, kotrejež dźěłowy titul rěka „Prěki – durich – loborka“, ma hru, reju a hudźbu wopřijeć.
Budyšin (SN/bn). Lětušej ptačokwasnej programaj Serbskeho ludoweho ansambla stej dohratej. Minjenu njedźelu pokazachu hrajerjo, spěwarjo-solisća, chór a orchester inscenaciju „To tla wěrno njej’!“ posledni raz. Dohromady je sej kruch z pjera Jěwy-Marje Čornakec 1 800 wopytowarjow w Delnjej, Hornjej a srjedźnej Łužicy wobhladało. Dwanaće króć je jón SLA předstajiło.
Program za dźěći „Ptačokwasny són“ stej orchester a chór ansambla 25 razow wuhotowałoj. Cyłkownje něhdźe 8 000 přewažnje młódšich přihladowarjow je produkc po cyłej Łužicy dožiwiło. Dramaturgowka SLA Jěwa-Marja Čornakec běše za inscenaciju program Juraja Šiški a Konrada Naumanna wobdźěłała a aktualizowała.
„Z ličbami přihladowarjow smy jara spokojom. Wone lěto wob lěto stupaja, štož nam pokazuje, zo je naš ptači kwas mjeztym kruty termin spočatk lěta mnohim Serbam a Němcam. Wosebje zwjeselił je nas nowy wopytowarski rekord w Kulowje a Radworju“, zdźěla Julija Dórnikowa w mjenje nawodnistwa SLA.