Za gymnazij so přizjewić ...

Budyšin. Wot 2. do 8. měrca je móžno nowych šulerjow na Budyskim Serbskim gymnaziju za šulske lěto 2017/2018 přizjewić a to w slědowacych časach: wot póndźele do srjedy wot 7.30 do 16 hodź., štwórtk wot 7.30 do 18 hodź. a pjatk wot 7.30 do 13 hodź. Šulerjow za 5. lětnik Budyskeje Serbskeje wyšeje šule přizjewić móžeće w šulskim a zetkawanskim centrumje wot póndźele do srjedy wot 8 do 16 hodź., štwórtk wot 8 do 18 hodź. a pjatk wot 8 do 12 hodź. Njezabudźće trěbne podłožki – wupjelnjeny přizjewjenski formular, kubłanske poručenje zakładneje šule, narodźenske wopismo a połlětne wuswědčenje – sobu přinjesć.

... a za wyšu šulu

Worklecy. Tež na Worklečanskej Serbskej wyšej šuli wočakuja nowe šulerki a nowych šulerjow. Swoje dźěći za 5. lětnik přizjewić móža starši tam štwórtk, 2. měrca wot 8 do 17 hodź., pjatk, 3. měrca, wot 8 do 15 hodź. kaž tež wot póndźele, 6., do srjedy, 8. měrca, wot 8 do 15 hodź. Njeje-li přizjewjenje w po­datym času móžne, dojednajće sej pod čisłom 035796/96 831 termin. Za poradźowansku rozmołwu je nawoda šule Křesćan Korjeńk rady k dispoziciji.

Předstaji nowu knihu

„Pěši po juhu Francoskeje“

Chrósćicy. Wo tym přednošuje Monika Gerdesowa w swojej Chróšćanskej putniskej hospodźe jutře w 19.45 hodź. Hižo dźesać lět putnikuje wona w dowolu w etapach po Jakubowym puću, a to do směra na Santiago de Compostela, hdźež chce za dwě lěće dóńć. Loni nalěto bě po puću na juhu Francoskeje. Što je při tym dožiwiła a koho je zetkała, wo tym chce jutře z pomocu wobrazow rozprawjeć. Hižo w 16 hodź. su ći najmjeńši přeprošeni na serbske dźěćace kino.

Falkenberg w dźiwadle

Budyšin. Znaty hudźbnik a spěwar Falkenberg budźe jutře w 19.30 hodź. z hosćom w Budyskim Dźiwadle na hrodźe. Nowy program w Halle bydlaceho rěka „Menschen auf Brücken“. Srjedź 80tych lět bě wuměłc, tehdy mjenowaše so Ralf Schmidt IC Falkenberg, jedyn ze superstarow w NDR.

Čitanje a wurězanje štomow

Pjatk 24.2. 18:00 Póstnicy za zbrašenych Budyskeho wokrjesa w Chróšćanskej „Jednoće“

  19:30 Kisykałowy swjedźeń w Radworskim „Słodeńku“

Sobotu 25.2. 9:00 Zwjazkowe předsydstwo Domowiny w Budyšinje

  13:00 192. zapust w Tšupcu

  14:00 Zapust w Zaspach

  14:00 Dźěćace póstnicy Serbskopazličanskeho karnewaloweho towarstwa w Njebjelčanskej „Bjesadźe“

  14:00 Karnewalowy ćah po Kinsporku ze slědowacymi korčmarskimi póstnicami

  14:00 Kulowske žonjace póstnicy ze swjedźenskim ćahom po měsće

  14:00 130. zapust w Mosće

  15:00 135. zapust na Górach (Guhrow)

  16:00 Serbske dźěćace kino w Chróšćanskej putniskej hospodźe

  19:30 2. kapičkowy wječor Serbskopazličanskeho karnewaloweho towarstwa w Njebjelčanskej „Bjesadźe“

  19:45 Monika Gerdesowa přednošuje wo swojim putnikowanju po Jakubowym puću w južnej Francoskej w Chróšćanskej putniskej hospodźe

Njedźelu 26.2. 10:00 Póstniski ćah wjesołych ludźi w Choćebuzu

  13:00 Zapust w Šlichowje

  13:30 Zapust w Depsku

  14:00 Wosadne popołdnjo w Slepom

  14:00 Šěrachowski póstniski ćah po měsće

Póndźelu  27.2.  Róžowa póndźela

  13:30 Róžowopóndźelny ćah po Kulowje