SJ Chrósćicy II –
SG Motor Kumwałd 0:0
Zestawa domjacych: Škoda – J. Donat, M. Donat, Zynda, Mark, Wornar, Handrik, Wencl, Matik, Rätze, Graf
Sobotu nastupištej rezerwa sportoweje jednotki z Chrósćic a prěnje mustwo sportoweje jednotki z Kumwałda k dypkowej hrě we wokrjesnej lize na trawniku w Hórkach. Fanam skićeše so spodźiwny wobraz, wšako stejachu k zakopej w połojcy hosći jenož wosom hrajerjow.
Wot spočatka sem přewzachu Chróšćenjo kontrolu a spytachu sej přećiwo hłuboko stejacemu, ale jasnje deciměrowanemu přećiwnikej móžnosće wuhrawać. Tak hrajachu přez cyłu šěrokosć pola, zo bychu tak nastate rumy wužili. Po wólnym kopje skići so móžnosć, jako Kito Mark wysoku přihrawku před wrota hłójčkowa, tola přichwatany Alwin Graf jeno žerdź trjechi. Bórze so pokaza, zo ani wšitcy wosmjo z Kumwałda stoprocentnje fit njeběchu. Po dwanaće mjeńšinach dwaj z nich hižo dale hrać njemóžeštaj a tuž wothwizda sudnik hru při stawje 0:0. Poprawom dóstanu Chróšćenjo hru dla dočasneho zakónčenja za sebje z 3:0 přiličenu, to pak ma so hišće přez wokrjesne instancy wobkrućić.
Do hry přećiwo FSV Wódrjeńcy (Oderwitz) bě předsydstwo SJ Chrósćic Feliksa a Gabriela Zahrodnika wuznamjeniło. 27lětny Feliks Zahrodnik dósta pokal za 85 hrow za Chróšćan prěnje mustwo, 23lětny bratr Gabriel za stotu.
Feliks Zahrodnik bě skok z młodźiny A do prěnjeho mustwa wuspěšnje zmištrował a běše tak dnja 11. meje 2013 swój debit přećiwo Zeleno-běłym Sepicy swjećił. Hižo zahe zamó so Zahrodnik jako zakitowar, kaž tež hrajer srjedźneho pola etablěrować. Ze swojej lěwej nohu a wurjadnymi flankami bě mustwje přeco zaso wažna podpěra. Wosebje wuspěšna běše sezona 2015/2016. W tutej zamó Zahrodnik z prěnim Chróšćanskim mustwom do krajneje klasy postupić a w slědowacych lětach tež stajnje klasu dźeržeć. Zranjenja dla dyrbi Zahrodnik swoje kopački drje nažel dočasnje po 85 hrach na hozdźik pójsnyć. Wot wonka pak wón prěnje mustwo dale podpěruje a ze swojimi nazhonjenjemi wobohaća. Tak fungěruje tuchwilu kaž druha ruka hłowneho trenarja Pavela Runta.
FC Energija Choćebuz –
ST Babelsberg 4:0 (2:0)
Zestawa Energije: Sebald – Slamar, Hildebrandt, Campulka, Hasse – Hofmann (81. Pelivan), Putze (81. Juckel), Oesterhelweg (73. Prokopenko), Heike, Thiele (73. Euschen), Halbauer (73. Ndualu)
slěd wrotow: 1:0 Frahn (2., samowrota), 2:0 Oesterhelweg (39.), 3:0 Oesterhelweg (50.), 4:0 Oesterhelweg (71.)
Z wuspěchom 4:0 je so FC Energija na čoło tabulki nawróćiła. Zažne samowrota něhdyšeho Choćebužana Daniela Frahn běchu zawěsće dobry započatk za team trenarja Clausa Dietera Wollitza. Tón sadźi po dołhim času zaso jónu Maksimiliana Oesterhelwega do startoweje formacije, kiž so pěknje z trojimi wrotami podźakowa. Babelsberg měješe we woběmaj połčasomaj drje dobre móžnosće, ale je njewuži. By-li Tim Heike wjace zboža měł, by wón swoje wrotowe konto wo dwoje abo troje wrota wutwarić móhł. Tež Phil Hallbauer, kiž na lěwej wonkownej čarje dźakowano swojej spěšnosći akcenty sadźeše, měješe jasnu šansu, runje tak njesprócniwje centralnje agěrowacy Timmy Thiele.
Tak mějachu po zakónčenju hry čerwjene košle a jich swěrni fanojo přičinu za wjeselo.
Dypk – mjerzanje a zbožo
Greifswalder FC –
Sokoł Ralbicy/Hórki –
TSV Połčnica 3:1 (1:1)
Zestawa domjacych: Chr. Gloxyn – Šewc, Schultz, Wałda, Heidorn, Rachela (67. Bejmak), Šołta (80. Budar), Korjeńk, Gloxyn, Mjechela (90. Kunze), Domaška (90. Kocor)
Sokoljo z Ralbic wočakowachu minjenu njedźelu sylneho postupnika z Połčnicy w stadionje „Jurij Frencl“. Dypkownje ze zahwizdanjom hry započinaše so dešćować a tuž nasta wot wšeho spočatka spěšna hra.
SJ Njebjelčicy – HZ Delni Wujězd/Łaz/ Běły Chołmc II 6:1 (4:0)
Zestawa hosćićela: N. Hahn – A. Reinecke, C. Reinelt, R. Hanuza, F. Domš, J. Matješk (68. P. Hrjehor), J. Lehmann (60. D. Cyž), A. Korjeńk, T. Čornak, N. Rudolf (79. G. Čornak), S. Rachela
Hosćo běchu Njebjelčanam dotal njeznaty kontrahent. Domjacy cyłk dyrbješe so chorosće a zranjenja dla štyrjoch hrajerjow wzdać.
Hra so derje za Njebjelčanow započa. Hižo w štwórtej mjeńšinje wothraje Jonas Lehmann bul z wurjadnym přehladom prěki na Symana Rachela, kiž bjez prócy 1:0 trjechi. SJN wukonješe dale ćišć na wrota přećiwnika. W 20. min. mějachu pak hosćo šansu na wurunanje. Clemens Reinelt bě po přećiwniskej ofensiwnej akciji njezbožownje jědnatku zawinował, ale kapitan hosći sadźi na zbožo bul na žerdź. We 28. min. třěli F. Domš po róžku bul preciznje Ronnyjej Hanuzy, kiž trjechi 2:0. Jenož štyri mjeńšiny pozdźišo zwyšichu Njebjelčenjo přez F. Domša na 3:0. We 38. min. samo hosćo wyskachu, wrota pak so nimohry dla njepřipóznachu. W 44. min. suny Rudolf po přihrawce F. Domša bul přez liniju.
HZ Huska/Hodźij –
Sokoł Ralbicy/Hórki 1:4 (0:2)
Zestawa hosći: Chr. Gloxyn – Heidorn, Rachela (63. Bejmak), Schultz, Budar (55. Mjechela), Domaška (74. Šiman), Wałda, Šołta, Woko, Korjeńk, D. Gloxyn
Ralbičenjo běchu před zastupnistwom z Huskeje/Hodźija, kotrež hraje we wokrjesnej lize, warnowani. Hrajne zjednoćenstwo mjenujcy w prěnimaj kołomaj wubědźowanja wo pokal Połčnicu a Wachau z wokrjesnej wyšeje ligi porazy.
SG Wjelećin –
SJ Chrósćicy II 2:1 (2:0)
Zestawa hosći: Škoda – S. Handrik, Bětnar, Zynda, Mark, Wowčer, Wencel, C. Handrik (83. Kola), Donat (31. Matik), Rätze, Kř. Zahrodnik
Na reformaciskim dnju poda so rezerwa Chróšćan SJ do Wjelećina na pokalnu hru. Z dobyćom by so za koło poslednich wosom cyłkow kwalifikowała.
Hižo po štyrjoch mjeńšinach steješe za Wjelećanow 1:0. W natwarje zhubi škitar SJC bul a na to kombinowaše so ofensiwa Wjelećanow spěšnje do šěsnatki. Tam smokny nadběhowar bul do saka. Chróšćenjo mějachu swoju lubu nuzu na wuskim hrajnišću přećiwo agresiwnišemu přećiwnikej. Někotre razy pak so jim poradźi škitarjow domjacych při natwarje pod ćišć stajeć a tak zmylki prowokować. Wudobyte bule pak so přejednorje zaso zhubichu. W 20. min. znowa Wjelećenjo juskachu. Z dobrej kombinaciju so domjacy přez srjedźne polo kombinowachu. Tak móže naraz nadběhowar swobodnje před wrotami wotzamknyć a na 2:0 zwyšić.