Sakski krajny ličenski zarjad je wčera druhi dźěl swojeje aktualneje rozprawy předstajił. Před nowinarjemi je jeho prezident Jens Michel tež postupowanje změny strukturow dla kritizował. Z dotal w swobodnym staće přizwolenych projektow je prosće přemało, z kotrychž naročne dźěłowe městna nastawaja. Runje tajke pak su trěbne, zo bychu derje zapłaćeni dźěławi w brunicowym hórnistwje a energijownistwje po kóncu wudobywanja a zmilinjenja brunicy dale powołanski přichod we Łužicy měli. Kritika prezidenta Michela runje tak wonych dźewjeć projektow potrjechi, kotrymž je regionalny přewodźenski wuběrk Łužiskeho rewěra wčera w Hórnikečanskej Energijowej fabrice přizwolił. Něhdźe 440 nowych dźěłowych a wukubłanskich městnow chcedźa projektowi nošerjo wutworić a 110 wobstejacych zawěsćić. Dwěluju, zo budu so wo nje dotalni hórnicy a energijownicy požadać. Motor strukturneje změny tak prawje zaskočił potajkim hišće njeje. Axel Arlt

Berlin (dpa/SN). Zwjazkowe knježerstwo je němskich staćanow hladajo na namócne postupowanje přećiwo protestam w Iranje namołwjało z kraja wupućować. „Za němskich staćanow wobsteji konkretny strach, zo jich zajmu, přesłyšuja a k jastwu pochłostaja“, wozjewi wčera wonkowne ministerstwo w Berlinje. „Předewšěm ći, kotřiž nimo němskeho tež hišće iranske staćanstwo wobsedźa, su wohroženi“, w zdźělence dale rěka.

Hižo w minjenych tydźenjach su w Iranje wulku ličbu wukrajnych staćanow zajeli. Štóž hišće w kraju přebywa, měł so ­jara wobhladniwje zadźeržeć, a njeměł so na demonstracijach abo zhromadźi­znach wobdźělić. Komunikaciske słužby w kraju su do dalokeje měry wobmjezowane, to so tež tak spěšnje njezměni.

Tójšto piwowych kašćikow je w bayerskim Kulmbachu z nakładneho awta na dróhu padnyło. Cyłkownje 150 kašćikow je zawčerawšim při zajězdźe na zwjazkowu dróhu planu připowěšaka wobškodźiło, policija w nocy zdźěli. Kašćiki njeběchu dosć zawěsćene. Tohorunja je 55lětny šofer najskerje přespěšnje jěł. Piwo so žane njezhubi – bleše běchu prózdne.

Britiska nowina „Daily Star“ je wubědźowanje mjez premierministerku Liz Truss a solotwju přewjedła a na to sadźiła, štó dlěje přetraje. Truss je před ně­hdźe tydźenjomaj wotstupiła, a tuž je ­solotej wubědźowanje dobyła. Nětko změjetej wobě zhromadny symboliski wustup na tři metry wysokim wobrazu, kotrež budźe w „Bonfire Night“ w jendźelskim městačku Edenbridge zapaleny.

Berlin (dpa/SN). Zwjazkowy kancler Olaf Scholz (SPD) je dźensa hosćićel wjerš­koweho zetkanja z balkanskimi statami Albanskej, Bosniskej-Hercegowinu, Kosowom, Sewjernej Makedonskej, Čornohórskej a Serbiskej. Wšitke šěsć krajow prócuje so wo přistup k EU, su pak w rozdźělnych fazach přibliženja. Na wjeršku wobdźěleja so tež načolnicy Europskeje unije a knježerstwowi šefojo wjacorych statow EU.

Inflacija w Turkowskej wysoka

Ankara (dpa/SN). Wysoka inflacija w Turkowskej je so dale přiwótřiła. W oktobrje běchu płaćizny přetrjebarjow wo 85,5 procentow wyše hač lěto do toho, kaž narodny statistiski zarjad dźensa w Ankarje zdźěli. W předchadźacym měsacu je po­dróšenje 83,4 procentow wučiniło. W Němskej běchu statistikarjo w oktobru stupanje płaćiznow přetrjebarjow wo 10,4 procenty zwěsćili.

Temperatura spěšnišo stupa