Nowe spěchowanje hnydom trěbne
Drježdźany (dpa/SN). Kónc spěchowanja za spěšny internet wubudźi w Sakskej kritiku a přesłapjenje. Zwjazk běše Gigabit-spěchowanje falowacych pjenjez dla lětsa dočasnje zastajił. Po zwjazkowym wobchadnym ministrje Volkeru Wissingu (FDP) je přewostajena spěchowanska suma třoch miliardow eurow wučerpana. Sakska hospodarska statna ministerka Ines Fröhlich je Zwjazk namołwiła, wšitke komuny, kotrež su próstwu zapodali, financielnje podpěrać, tež hdyž je to hakle w lěće 2023 móžne.
Po Fröhlich dyrbjał Zwjazk nimo toho spěšnje ramikowe wuměnjenja za nowy spěchowanski program předpołožić, zo by so wokrjesam a komunam wěstota planowanja zmóžniła. Zaměr je, šěrokopasmowy wutwar ze škleńčanej nitku tež jako zakład za solidne zastaranje z 5G pospěšić a hač do lěta 2030 zastaranje po cyłej přestrjeni zawěsćić. Zwjazk chce z Gigabit-strategiju digitalny přewrót docpěć. Homeoffice, streaming w ICE-ćahu abo přijimanje na hórskej hěće maja potom skónčnje móžne być.
To a tamne (24.10.22)
Předrasćeni jako hotdog abo gladiator – Newyorkske psy a jich wobsedźerjo zetkachu so hižo zawčerawšim we wšelakich kreatiwnych halloweenskich kostimach. Na tak mjenowanym „Tompkins House Halloween Dog Festival“ wobdźělnicy kóždolětneho wubědźowanja swoje předrasćenske kumšty a kreatiwitu dopokazachu. Hišće hač do kónca oktobra móža ludźo wo najlěpšim kostimje wothłosować.
Pašowar bu při zapućowanju do Indiskeje z trjenjemi lepjeny, kotrež bě wón do toho do złota tunknył. Cłowny zarjad w zwjazkowym staće Kerala jeho wučušli, jako mokre rubiška pola potrjecheneho nańdźe, kiž bě z Dubaja do kraja přilećał, kaž nowina w Indiskej minjeny pjatk zdźěli. Kaž zarjady rozprawja, su pašowarjo w Indiskej přeco hibićiwiši a kreatiwniši. Pola lepjeneho muža su cłownicy cyłkownje pjeć „złotych“ trjenjow našli.
Wo energijowej krizy rěčeli
Hannover (dpa/SN). Knježerstwowe šefowki a šefojo krajow su so dźensa ze zwjazkowym hospodarskim ministrom Robertom Habeckom (Zeleni) a zwjazkowym ministrom financow Christianom Lindnerom (FDP) wo energijowej krizy wuměnili. Při tym chcychu přiwšěm wo borzdźidle za płaćiznu płuna rěčeć. Někotři knježerstwowi šefojo nadźijeja so wjace jasnosće nastupajo jeje zeskutkownjenje.
Truss wotstup wozjewiła
London (dpa/SN). Britiska premierministerka Liz Truss je wčera wozjewiła, zo swoje zastojnstwa złoži. Jako šefina konserwatiwneje strony wona hnydom wotstupi, premierministerka chce tak dołho wostać, doniž njeje naslědnika abo naslědnicy. Jeno šěsć tydźenjow běše 47lětna w zastojnstwje. Minjene dny steješe wona enormnje pod ćišćom, po tym zo bě ze swojej hospodarskej politiku w běhu něšto dnjow bjezwuhladny chaos na financnych wikach naparała.
Tukaja na politiski pozadk
Scholz: „Smy so dorozumili“
Brüssel (dpa/SN). Zwjazkowy kancler Olaf Scholz je so spokojom z wuslědkami wjerškoweho zetkanja EU energijowu krizu nastupajo pokazał. „Smy so dorozumili“, rjekny politikar SPD w nocy na pjatk po nimale dźesaćhodźinskich wuradźowanjach ze swojimi kolegowkami a kolegami. „To je dobre znamjo solidarity.“ Ze zetkanjom su zakłady wutworili, zo móhła Europa při temach wokoło wysokich energijowych płaćiznow zhromadnje jednać a rozsudźić.
Po słowach Scholza maja nětko energijowi ministrojo z pomocu postajenych principow konkretne detaile w mjezsobnej přezjednosći definować. Njeporadźi-li so to, su statni a knježerstwowi šefojo wužadani, so hišće raz z tematiku zaběrać.
Hubjeny staw zwěsćili
Załožba Bertelsmann staw personala w pěstowarnjach přepytowała
Gütersloh/Drježdźany (dpa/SN). Po studiji za zažnodźěćace kubłanje załožby Bertelsmann kubłaja so w Sakskej 93 procentow pěstowarskich dźěći z personalnym wuhotowanjom, kotrež njeje dźěćom přiměrjene. To je w přirunowanju z tamnymi zwjazkowymi krajemi druhi najwyši podźěl. „Dokelž je 2023 w Sakskej dosć městnow w pěstowarni, zo by so hladanska potrjeba staršich spjelniła, měł so kraj na wutwar kwality koncentrować“, kaž rěkaše. Zo by so personalny kluč wotpowědnje wědomostnym doporučenjam docpěł, dyrbjeli w Sakskej přidatnje 20 800 fachowcow přistajić, zwěsćichu awtorojo studije. Přez to bychu přidatne personalne kóšty něhdźe jedneje miliardy eurow wob lěto nastali.
Bojowniska wola
Kijew (dpa/SN). Bojowniska wola Ukrainy je najebać masiwne ruske powětrowe nadběhi na milinarnje a dalšu infrastrukturu njezłamana. „Ruske jednotki naše milinarnje dale z raketami a trutami nadběhuja. Na kóncu tež tajka ruska šamałosć zwrěšći“, rjekny ukrainski prezident Wolodymyr Zelenskyj wčera w swojej wječornej widejowej narěči. „Ruska chcyła energijowy system Ukrainy zničić a susodny kraj hišće bóle ćerpjeć dać. To pak jenož mjezynarodnu zhromadnosć mobilizuje, zo by nam hišće bóle pomhała a wjace ćišća na terorowy stat wukonjała“, wuzběhny prezident.
Ukrainske zastaranske předewzaće Ukrenerho je wčera wječor zdźěliło, zo wočakuje dźensa, pjatk, wobškodźenych připrawow dla po cyłym kraju nachwilne wobmjezowanja přetrjeby energije.
Tež rentnarjo profituja
To a tamne (21.10.22)
Přemało piwa w karanje mějachu lětsa napadnje husto wopytowarjo Oktoberskeho swjedźenja w Mnichowje. Kaž je přisłušny zarjad zwěsćił, bě w 31 procentach wšitkich kontrolowanych probow přemało piwa w škleńcach. Tajki pad předleži, hdyž je karan napjelnjeny mjenje hač 15 milimetrow pod smužku, kotraž pokaza značku jednoho litra. Na Oktoberskim swjedźenju 2019 bě to hišće 18 procentow wšěch probow.
Na prowizoriske tepjenje z drjewom je šwabske město Stadtbergen pola Augsburga swoju šulu přestajiło. Přičina su wysoke płaćizny za płun. Před šulu steji wot njedawna kontejner ze zatwarjenym tepjenjom za drjewjane třěski. Tepjenski material město z drjewowych wotpadkow same produkuje. Přichodne tři měsacy chcedźa mobilne tepjenje wuspytać a so nadźijeja, zo z nim pjenjezy lutuja.
Chaos w britiskim knježerstwje
London (dpa/SN). Tydźenje dołho trajaca knježerstwowa kriza je so wčera dale přiwótřiła. Najprjedy zhubi premierministerka Liz Truss z drje wunuzowanym wotstupom nutřkowneje ministerki Suella Braverman hižo druheho čłona kabineta w běhu šěsć dnjow. Pozdźišo rozprawjachu, zo je dźěl frakciskeho wjednistwa wotstupił. Wječor to zaso dementowachu a rěkaše, zo staj potrjechenaj dale w zastojnstwje.
Dale na nuzowym stawje
Genf (dpa/SN). Koronapandemija płaći dale jako strowotniski nuzowy staw na swěće. Tole je swětowa strowotniska organizacija (WHO) wčera na radu njewotwisneho wuběrka ekspertow wuzamknyła. Nuzowy staw płaći hižo wot kónca januara 2020. Wozjewjenje nuzoweho połoženja je najwyši alarmowy schodźenk, kotryž móže WHO postajić, kotryž pak njeje zwjazowacy za knježerstwa. WHO je dotal něhdźe 620 milionow koronainfekcijow a 6,5 milionow smjertnych padow wozjewiła.
EU płaći za ćěkańcow w Pólskej
Njezmyslne wudawki wotkryli
Kamjenica/Lipsk (dpa/SN). Zwjazk dawkipłaćerjow w Sakskej je w swojej wčera wudatej „Čornej knize“ znowa pady brojenja pjenjez publikował. Negatiwne myto „Schleudersachse“ spožči so lětsa Lipskej. Město bě 2014 kompleks twarjenjow za 500 000 eurow předało a po tym wobzamknyło, jón za něhdźe 15 milionow eurow zaso wróćo kupić.
Tež rozšěrjenje twara wohnjoweje wobory w Dippoldiswaldźe je w knize zapisane. Twarjenje bu před dźesać lětami bjez wobkedźbowanja płaćiwych twarskich normow za 329 000 eurow rozšěrjene. Jako bě nowe wohnjowoborne awto trěbne, pytnychu zamołwići, zo so žane z tuchwilu na wikach poskićenych jězdźidłow přez wrota gratownje njehodźi.
Sakska „online-straža“ policije steji w kritice, dokelž so informacije awtomatisce do systema policije njepřewozmu, ale dyrbja so manuelnje přenjesć. „Personalne a wěcne kóšty za tute přidatne dźěło ležachu 2020 pola něhdźe 1,7 milionow eurow“, rěka w knize.
