Berlin (dpa/SN). Wulki dźěl wobydlerjow Němskeje přeje sej sylniše diplomatiske prócowanja zwjazkoweho knježerstwa k skónčenju wójny Ruskeje přećiwo Ukrainje. W aktualnym přepytowanju sćelaka ARD wupraja so 26 procentow ludźi za to, zo měła so Němska sylnišo wo skónčenje konflikta prócować, dalšich 34 procentow wotmołwi ze „skerje“ na tute prašenje, byrnjež Ukraina kompromisam napřećo Ruskej přihłosować dyrbjała. Mjez přiwisnikami AfD, Lěwicy a FDP je něhdźe 40 procentow „na kóždy pad“ za sylniše diplomatiske prócowanja zwjazkoweho knježerstwa. Přiwisnicy druhich stronow su w tymle prašenju zdźeržliwiši, dokelž boja so njelěpšinow za Ukrainu.

Snadna wjetšina ludźi je po tutym woprašowanju za to, z Ruskeje ćeknjenych muži přiwzać, kiž so wojerskej słužbje spjećuja. Cyłkownje 54 procentow wšěch 1 307 woprašanych by tole witało, 35 procentow je přećiwo tomu. Najwjace přiwisnikow ma tónle namjet mjez Zelenymi (79 procentow), najmjenje pola AfD: 57 procentow je přećiwo tomu.

Bonn (dpa/SN). Prěnje wuspěchi při lutowanju su widźomne: Domjacnosće a małe firmy přetrjebachu minjene tydźenje jasnje mjenje płuna loni w samsnym času. Wob dźeń su přerěznje 571 gigawattowych hodźin přetrjebali a tak 29 procentow mjenje hač samsne kalenderske tydźenje mjez 2018 a 2021, zdźěli zwjazkowa syćowa agentura wčera w Bonnje. Při tym njejsu 40 000 wjetšich přetrjebarjow, kaž wulke industrijne firmy, wobkedźbowali. Šef agentury Klaus Müller ma poměrnje miłe wjedro za hłownu přičinu snadneje přetrjeby. Woprawdźe bě temperatura z 11,4 stopnjemi minjeny tydźeń wyša hač přerězna ćopłota zašłych štyrjoch lět. Najebać to je sej Müller wěsty, zo ludźo wědomje mjenje płuna přetrjebuja. „Hdyž zhromadnje – byrnjež zaso zymnišo było – znajmjeńša 20 procentow płuna zalutujemy, derje přez zymu přińdźemy. To wot nas wšitkich wotwisuje.“ Müller hižo dlěši čas na ludźi apeluje, swójsku přetrjebu płuna pruwować a po móžnosći tak mało kaž móžno přetrjebać. Pokiwy k lutowanju poskića tež hospodarske ministerstwo na swojej internetnej stronje.

Wotpohladnje do płota zrazył je 57lětny ze swojim awtom w vogtlandskim Reichenbachu. Muž přizjewi so pola policije a twjerdźeše, zo je njeznaty jeho awto wobškodźił. Jako zastojnicy dojědźechu, zhonichu wot swědkow, zo je 57lětny we wokomiku zražki sam za wodźidłom sedźał. Na to narěčany muž to skónčnje přizna. Test alkohola wunjese 1,72 promilow. Nětko dyrbi so wón nimo alkohola tež wudawanja chłostajomneho njeskutka dla zamołwić. Čehodla bě muž wotpohladnje do płota zajěł, njeje znate.

Wjace hač štyri promile alkohola je šofer wosoboweho awta njedaloko Stuttgarta w kreji měł. Po informacijach policije bě wój „jara razantnje a bjez swěcy“ po puću. Do toho bě so žona 51lětneho dohladała, jako tón pjany do awta zalěze. Policisća jeho zadźeržachu a sćazachu jězbnu dowolnosć. Muža wočakuje chłostanje.

Brüssel (dpa/SN). Zakitowanscy minis­trojo čłonskich krajow NATO su dźensa w Brüsselu wo tym wuradźowali, kak měli z hroženjom ruskeho prezidenta Wladimira Putina wobchadźeć, zo chcył we wójnje přećiwo Ukrainje tež atomowe brónje zasadźić. Při zetkanju tak mjenowaneje nuklearneje planowanskeje skupiny wuradźowachu wo atomowej brónjowej strategiji NATO a wo modernizowanju aktualneje infrastruktury.

Wo wolóženjach wuradźowali

Berlin (dpa/SN). Energijoweje krizy jako sćěha ruskeho nadpada na Ukrainu dla je zwjazkowy sejm dźensa wo móžnych wolóženjach na dobro mało zasłužacych a rentnarjow wuradźował. Na dnjowym porjedźe stejachu wuradźowanja wo planowanym wobydlerskim pjenjezu, reformje bydlenskeho pjenjeza a energijowej pawšali za rentnarjow. Z wobydlerskim pjenjezom chcedźa popłatk Hartz IV w dźensnišej formje wotstronić a narunać.

Zwjazk lěkarjow za nahubnik