Składowanje datow wotpokazane
To a tamne (20.09.22)
Za swojim ćeknjenym psom pyta ameriski model Paris Hilton. „Činju wšitko, štož móžu, zo bych jeho wróćo dóstała“, piše Hilton w interneće. Mjeztym je wona zwěrjaceho detektiwa, psyčeho trenarja a zwěrjaceho psychologu zasadźiła. Nětko chcedźa tež trutu wužiwać. Mały chihuahua „Diamond Baby“ bě před tydźenjom z bydlenja twochnył, jako durje wočinjene stejachu. Hilton swojich fanow prosy, při pytanju w Los Angelesu a wokolinje pomhać.
Při hriby pytanju w Drježdźanskej holi je so pjećlětny zabłudźił a tak swojeju staršeju zhubił. 33lětny widźeše po informacijach policije žałosćaceho hólca při busowym zastanišću w měšćanskim dźělu Hellerberge a wołaše policiju. Zastojnicy na to za staršimaj pytachu. Krótko po tym so wonaj telefonisce pola policije přizjewištaj a syna wotewzaštaj.
„Pohrjeb lětstotka“ w Londonje
Britiska kralowna Elizabeth II. ze statnym aktom pochowana
London (dpa/SN). Połtřeća tydźenja po jeje smjerći su dźensa britiskej kralownje Elizabeth II. ze statnym pohrjebom poslednju česć wopokazali. Na žarowanskej swjatočnosći we Westminster Abbey wobdźělichu so statni a knježerstwowi šefojo ze wšeho swěta. We wjacorych procesionach su kašć po ceremoniji po měsće do 35 kilometrow zdaleneho Windsora přewodźeli. Tam měješe njeboha Queen wječor swój posledni wotpočink namakać.
Na dróhach Londona čakachu wjacore statysacy ludźi, zo bychu krala Charlesa III. a jeho synow princa Williama a princa Harryja widźeli, kotřiž kašć pěši přewodźachu. Mnozy běchu sej hižo dźeń do toho ze stanami a stólcami městno při čarje procesiona zawěsćili.
Cyrkwje kondolěrowali
Vatikan (B/SN) Po smjerći jendźelskeje kralowny Elizabeth II. su mnozy zastupjerjo cyrkwjow po cyłym swěće sobučuće wěriwych swójbnym zemrěteje posrědkowali. Bamž Franciskus je w telegramje nowemu kralej Charlesej III. a cyłej kralowskej swójbje swoje žarowanje wuprajił. Wón wuzběhny „jeje přikład při spjelnjenju winowatosćow, jeje njepowalne swědčenje wěry wo Jězusu Chrystusu a jeje krutu nadźiju do spjelnjenja jeho slubjenjow.“ Wona je so z wjacorymi bamžemi zetkawała, pak w Romje pak w Jendźelskej. W lěće 2014 wopyta wona bamža Franciskusa. Tež primas anglikanskeho swětoweho zhromadźenstwa, arcybiskop Justin Welby z Canterburyja, wuzběhny w pismje 75 do 83 milionam Jendźelčanam po cyłym swěće, zo bě zemrěta kralowna „swěrna křesćanka, kotraž je kóždy dźeń swojeho žiwjenja we wěrje žiwa była.“ Wona je wječor ze styknjenymaj rukomaj před łožom klečo so modliła, kaž bě ju to mać nawučiła. Kralowna lubowaše klasiske kěrluše a krótke prědowanja, maksimalnje dwanaće mjeńšin. Elizabeth II. bě swětowa nawodnica anglikanskeje cyrkwje „Church of England“.
Protest raznje wotpokazuja
Chrósćicy (SN). Chróšćanski kapłan dr. Jens Buliš, kiž tuchwilu we Wotrowje skutkuje, so wot 1. nowembra do Žitawy přesadźi. W lisće je Drježdźansko-Mišnjanski biskop Heinrich Timmerevers Chróšćansku faru wo tym informował. Słužbne sydło kapłana Buliša budźe w Lubiju. Wozjewjenje minjeny tydźeń je prawdźepodobnje rozdźělne reakcije wubudźiło.
Na předstajenju hry „Mór a lubosć“ zawčerawšim staj sobuskutkowacaj kritisce na přesadźenje kapłana Buliša reagowałoj a stajištaj na kóncu taflu před jewišćo. Na njej staj swoje wosobinske měnjenje k přesadźenju Buliša do Žitawy napisałoj. „Protestna akcija njeběše ze zarjadowarjemi hry, dalšimi sobuskutkowacymi a z towarstwom Cyrila a Metoda (TCM) wotrěčane. Zarjadowarjo a TCM so raznje wot akcije distancuja. Kóždy smě zjawnje swoje měnjenje zwuraznić, dyrbjał pak za to wotpowědne legitimowane medije wužiwać. Hladajo na akciju stej so dowěra a spušćomna zhromadnosć wšitkich sobuskutkowacych dźiwadłoweho předstajenja znjewužiwałoj“, wuzběhny předsyda TCM Cyril Hančik.
Wobmjezuja zapućowanje
Tallin (dpa/SN). Baltiske kraje Estiska, Letiska a Litawska kaž tež Pólska wot dźensniša móžnosće zapućowanja ruskich staćanow wobmjezuja. Tak wostanu mjezy za wobydlerjow susodneho kraja z turistiskim wizumom, za předewzaćelow, za sportowcow a kulturnikow zawrjene. Wotpowědne naprawy płaća w samsnej měrje we wšitkich štyrjoch čłonskich krajach EU a NATO. Wuwzaća płaća za přiwuznych a disidentow.
Biden: Pandemija nimo
Washington (dpa/SN). Prezident USA Joe Biden je koronapandemiju za skónčenu deklarował. „Pandemija je nimo, mamy pak přeco hišće problem z wirusom“, rjekny Biden we wčera wusyłanej telewizijnej rozmołwje. Interview běchu štwórtk nahrawali, jako wopyta Biden awtowe wiki w Detroiće. „Kaž widźiće, njewužiwa tu nichtó wjace nahubnik. To je dobre znamjo za to, zo je so połoženje zasadnje změniło“, wón rjekny.
Tójšto wopytowarjow přišło
Lambrecht: Debata njepomha
Šwika Södera
Zelenskyj připowědźa dalše ofensiwy
Kijew (dpa/SN). Ukrainski prezident Wolodymyr Zelenskyj je nowe ofensiwy na kónčiny w Ukrainje, wot ruskich jednotkow wobsadźene, připowědźił. „Snano zdawa so někotremužkuli mjez wami, zo je po wjacorych dobyćach měr zaćahnył, to pak njeje měr“, rjekny Zelenskyj wčera w swojim wšědnym widejowym poselstwje. Jedna so skerje wo přihot noweje ofensiwy ze zaměrom, města kaž Mariupol, Melitopol a Cherson wróćo zdobyć, wón rjekny.
Po słowach Zelenskeho nochce so Ukraina při tym na kónčiny koncentrować, kotrež je hižo do ruskeho nadpada w februaru kontrolowała. Tež kónčiny wot Moskwy podpěranych separatistow na wuchodźe kraja a lěta 2014 wot Ruskeje přiswojenu połkupu Krim chcedźa wróćo zdobyć, 44lětny připowědźi. „Přetož cyła Ukraina dyrbi swobodna być.“
Ruska bě po nadpadźe na Ukrainu 24. februara wulke kónčiny na juhu a wuchodźe kraja zdobyła. Tuchwilu ma Moskwa přeco hišće 125 000 kwadratnych kilometrow wobsadźene – něhdźe pjećinu ukrainskeho statneho teritorija, inkluziwnje połkupu Krim.
To a tamne (19.09.22)
Nachribjetnik z drogami je 22lětny na Braunschweigskim dwórnišću zabył – a sej jón pola policije zaso wotewzać chcył. Muž bě wčera rano pola policije zazwonił a so prašał, hač je něchtó wačok wotedał. Zastojnicy tole wobkrućichu a najprjedy raz do nachribjetnika pohladachu. Tam namakachu marihuanu a amphetaminy. Jako 22lětny na stražu přińdźe, njedósta drogi, ale skóržbu ranjenja zakonja wo wopojnych srědkach dla.
Hnydom dwójce w dołhim rynku čakacych před kašćom zemrěteje britiskeje kralowny Elizabeth II. so nastupił je Londonjan Sam Mason. Tole rjekny wón nowinarjam. Prěni króć čakaše wón dwanaće hodźin. Po krótkej přestawce, w kotrejž dowjeze awto do porjedźernje, so Mason rozsudźi so hišće raz nastupić. „To je wulki stawizniski podawk a chcych dźěl toho być“, wón rjekny.
