To a tamne (14.09.22)
Suweněr z Pólskeje w formje ručneje granaty je k zasadźenju fachowcow za rozbuchliny na lětanišću kupy Usedom zawinował. Kaž policajski rěčnik zawčerawšim wozjewi, je běchu pad dla minjenu sobotu na lětanišću w Heringsdorfje druhe lětadła zapozdźene. Pozdatnu granatu bě personal we wačoku 78lětneje dowolnicy z Luxemburga namakał.
Dwě tonje drjewjanych peletow stej po njezbožu ze štyrjomi nakładnymi awtami w sakskim wokrjesu Vogtland awtodróhu A72 blokowałoj. Nakładne awto bě wčera připołdnju do třoch na pódlanskej čarje stejacych nakładnych awtow zajěło. Jedyn z nich měješe měchi drjewjanych peletow na připowěšaku, kotrež su so njezboža dla roztorhali. Pelety so na dwěmaj čaromaj awtodróhi rozsypachu, čehoždla běštej dospołnje blokowanej. Policija trochuje škodu na něhdźe 140 000 eurow.
Kwota so zaso powyšiła
Wiesbaden (dpa/SN). Płaćizny za energiju a žiwidła zaso stupaja. Tak je so podróšenska kwota w awgusće na 7,9 procentow powyšiła, zwjazkowy statistiski zarjad dźensa na zakładźe nowych wobličenjow zdźěli. Ludowi hospodarjo liča w přichodnych měsacach z dwucyfrowymi inflaciskimi ratami. Ekonomojo wuchadźeja z toho, zo płaćizny za přetrjebarjow dale stupaja. Kupcam płuna hroža nimo toho dale wysoke płaćizny wotedawka płuna dla, kotryž zastaraćelam zmóžnja, přidatne kóšty swojim kupcam dale dać.
Bamž w Kazachstanje
Rom (dpa/SN). Bamž Franciskus je so dźensa na třidnjowsku jězbu do Kazachstana podał. W stolicy kraja Nur-Sultan wobdźěli so hłowa katolskeje cyrkwje jutře a zajutřišim na kongresu swětowych nabožinow. Dźensa chcyše so wón ze statnym prezidentom Kasym-Schomartom Tokajewom a diplomatami zetkać.
Nakładnistwa wohrožene
Po wjace hač wosom lětdźesatkach pyši zaso Dawidowa hwězda ...
Zaměry chcedźa dale docpěć
Wobydlerjo bjeru sej chwile
Drježdźany (dpa/SN). Ludźo w Sakskej bjeru sej po rozprawje „Sächsische Zeitung“ z wotedaćom deklaracije za ležownostny dawk chwile. Něšto tydźenjow do termina wotedaća kónc oktobra je něhdźe šěsćina potrjechenych wobsedźerjow deklaraciju wotedała. Tole rozprawješe nowina wčera a poćahowaše so na informacije financneho ministerstwa. Potajkim předležeše hač do 8. septembra něhdźe 280 000 deklaracijow.
Wšitcy wobsedźerjo ležownosćow, bydlenjow a zawodow ratarstwa a lěsnistwa kaž tež zamołwići za zdźědźenje dyrbja hač do 31. oktobra informacije k twarskemu lětu, bydlenskej płoninje a pódowej směrnicy podać. Přičina toho je nowe wobličenje ležownostneho dawka.
Lěs wětrnikam njepřewostajić
Drježdźany (dpa/SN). Sakscy Zeleni wotpokazuja wulke přestrjenje lěsa za wětrniki wužiwać. Přirodoškit wostanje runje hladajo na čas klimoweje změny zaměr. Pawšalne wužiwanje lěsa za wětrniki nochcedźa podpěrać, strona wčera zdźěli. To a pjeć dalšich žadanjow je krajna stronska rada Zelenych kónc tydźenja wobzamknyła.
Z tym njepřihłosuja Zeleni regionalnemu wuwićowemu ministerstwu. Jeho šef Thomas Schmidt (CDU) bě hakle minjeny tydźeń wuzběhnył, zo ma lěs wulki potencial. Mjez wosom a dwanaće procentami lěsneje přestrjenje Sakskeje móhli za wětrniki wužiwać. Tež pohórnistwowa krajina dyrbjała so do rozmyslowanjow zapřijeć.
Sakska dyrbi hač do lěta 2032 dwaj procentaj krajneje přestrjenje za twar wětrnikow přewostajić. K tomu je swobodny stat wot Zwjazka zakonsce zawjazany. Kak měli zaměr docpěć, je politikarjam čorno-zeleno-čerwjeneje knježerstwoweje koalicije hišće njejasne, dokelž je rozdźělnych měnjenjow.
Pomocny pakćik předewzaćam
Braniborske knježerstwo chce žołmje insolwencow zadźěwać
Podstupim (dpa/SN). Braniborske knježerstwo přihotuje so na swójski pomocny paket za předewzaća hladajo na stupace płaćizny energije a surowiznow. Braniborski ministerski prezident Dietmar Woidke (SPD) wčera w Podstupimje po zetkanju ze zastupjerjemi předewzaćow a zwjazkow wuzběhny, zo dyrbi pomocny paket třicyfrowy wolumen měć. „Na kóždy pad je tajka pomoc trěbna“, wón podšmórny. Zo pak móhł Zwjazk scyła pomhać, dyrbi tutón oficialnje nuzowu staciju deklarować, tak zo móhli kraje kredity brać, podobnje kaž bě to hižo w zwisku z koronapandemiju. Kaž Dietmar Woidke zdźěli, wón hižo tydźenje na tajke nuzowe wozjewjenje čaka. „Jelizo dźěćo hižo w studni leži, je přepozdźe.“ Zwjazkowe knježerstwo njeměło chabłać. „Dyrbimy předewzaćam a ludźom w kraju nětko pomhać.“ Krajne knježerstwo chce předewšěm žołmje insolwencow zadźěwać.
Přirodźe nješkodźeć
Porjedźenka
Bywši bamž Jan Pawoł I. (1912–1978) bu njedawno zbóžnoprajeny, a nic, kaž smy w rubrice „Cyrkej a swět“ we wčerawšim wudaću SN mylnje pisali, swjatoprajeny.
Redakcija SN
Města pruwuja lutowanske móžnosće
Annaberg-Buchholz/Kamjenica (dpa/SN). Swěca we woknach, wobswětlene debjenki na dróhach, swěćate hodowne štomy: W adwentnym času swěca na mnohich blakach wosebitu naladu wuprudźa, předewšěm w Rudnych horinach. Energijoweje krizy dla chcedźa w někotrych městach při hodownym wobswětlenju lutować. „Hody su swjedźeń nadźije“, wuzběhny rěčnica města Annaberg-Buchholz Annett Flämig. Tradicionalne wobswětlenje hasnyć abo zakazać by z jeje wida wopačny signal był. Přiwšěm pytaja w rudnohórskim měsće za móžnosćemi energiju lutować. Tak ma so hodowny štom lětsa jenož za wotewrjenski čas hodownych wikow swěćić a w nocy hasnyć. Podobne pruwuja tole nastupajo hodownu pychu. Tež dalše lutowanske móžnosće kołowokoło hodownych wikow přepruwowachu, Flämig wuzběhny. Tak wobličichu, kelko město za hodowne wobswětlenje płaći a kotre přidatne kóšty su hladajo na stupace energijowe płaćizny móžne. Mnohe komuny su minjene lěta w zwisku z wobswětlenjom za hodowny čas do LED-techniki inwestowali a tak přetrjebu miliny znižili.
