Ćahi njejězdźili
Planuja wolóženja korony dla
Berlin (dpa/SN). Po měsacy trajacych wobmjezowanjach koronawirusa dla su daloko sahace wolóženja za dobre štyri tydźenje wotwidźomne. Wšelake zawěsćenja pak maja tež w nalěću dale wobstać. Zwjazkowy kancler Olaf Scholz (SPD) je so wčera z ministerskimi prezidentami zwjazkowych krajow na plan k poněčimnemu zběhnjenju hač k doskónčnemu kóncej wšitkich wobmjezowanjow po 20. měrcu dojednał, jeli połoženje w chorownjach to dowola. Tež po tym pak ma „bazowy škit“ z nahubnikami w nutřkownych rumnosćach, busach a železnicach z testami dale móžny być. Za to chcedźa po wšej Němskej płaćiwy prawniski zakład zdźěłać.
Konkretnje maja w prěnjej kročeli wobmjezowanja za šćěpjenych a wustrowjenych wotpadnyć. Za nich maja priwatne zetkanja zaso „bjez wobmjezowanja ličby wobdźělnikow“ móžne być, kaž we wobzamknjenju rěka. W mnohich krajach hižo zběhnjene prawidło 2G we wobchodach ma wotpadnyć. Škitny nahubnik pak je dale trěbny.
Strach, ale žana panika
Denys Trubeckoj rozprawja za Serbske Nowiny z ukrainskeje stolicy
Kijew. Po tym zo běchu tajne słužby USA wčerawši 16. februar jako teoretiski datum móžneje inwazije Ruskeje na Ukrainje wuslědźili, je jón prezident Wolodymyr Zelenskij jako tak mjenowany Dźeń zjednoćenja deklarował. Nimo cyłkownje štyri hodźiny trajaceho telewizijneho marathona z narěčemi politikarjow słušeše tež do programa aktiwitow rano w dźesaćich narodnu hymnu spěwać. Pod bywšim komikarjom Zelenskim, kiž warnowanja Washingtona dale skeptisce wobhladuje, su tajke „show“-zarjadowanja jasnje přiběrali.
To a tamne (17.02.22)
Mały pokazowak časnika na cyrkwinej wěži pokradnyli su njeznaći w porynskim Kranenburgu – a to 50 metrow wysoko. Paduši zalězechu na twarske róšty, kotrež su tam za ponowjenje cyrkwje myslene. Prawdźepodobnje zwrěšćichu při pospyće, tež wulki pokazowak wotšrubować a zawostajichu jón wobškodźeny. Po wšěm zdaću měrjachu so na metal pokazowaka katolskeje cyrkwje swj. Měrćina. Snano chcychu paduši tež jeno suweněr.
Přez sćěnu domskeho jěła je žona ze swojim awtom w sewjerorynsko-westfalskim Hagenje. Prawdźepodobnje bě wona kontrolu nad wodźidłom zhubiła. Jězdźidło přerazy płót zahrody, durje terasy a skónčnje sćěnu domu. Pomocnicy wućahnychu šoferku snadnje zranjenu z awta. Dom, kiž hrozy so sypnyć, dyrbješe Techniski pomocny skutk zawěsćić. Policija je test kreje 58lětneje wukazała.
Na blackout njepřihotowana
Berlin (dpa/SN). Němska njeje po měnjenju zwjazka zawěsćernjow GDV na dlěše wupady miliny z katastrofalnymi sćěhami přihotowana. To zwěsća hłowny jednaćel GDV Jörg Asmussen. Zwjazk bě so wjacorych fachowcow za katastrofy a krizy prašał. Blackout je tuchwilu „jedne z najwjetšich wohroženjow za naš kraj“, cituje zwjazk fachowcow. Pozadk su wobmyslenja, zo móhła wobstajnosć němskeje milinoweje syće w zwisku z energijowej změnu chutnje ćerpjeć.
Mechanizm EU wobkrućeny
Luxemburg (dpa/SN). Europske sudnistwo je nowe rjadowanje nastupajo chłostanje w padźe ranjenja prawostatnosće w čłonskich krajach EU wobkrućiło. Sudnicy w Luxemburgu su dźensa wotpowědnej skóržbje Madźarskeje a Pólskeje wotpokazali, zmóžnjejo zdobom nałožowanje tak mjenowaneho prawostatneho mechanizma Europskeje unije. Po tym puću smě EU čłonskim krajam spěchowanske srědki skrótšić, ma-li wona prawostatnosć tam za ranjenu.
Proces hroženja dla zahajeny
Hnydom wšitke tři medalje su němscy sportowcy wčera na Olympiskich ...
Ukraina reaguje zdźeržliwje
Lauterbach za wjac naprawow
Scholz wo dobrym signalu rěčał
Moskwa (dpa/SN). Ruska sćele wosrjedź krizy Ukrainy dla z dźělnym cofnjenjom swojich jednotkow signal wotputanja. Prezident Wladimir Putin je na swojim wčerawšim zetkanju ze zwjazkowym kanclerom Olafom Scholzom (SPD) potwjerdźił, zo Ruska žanu nowu wójnu w Europje nochce. Diplomatiske móžnosće njejsu dawno hišće wučerpane, rjekny Putin po třihodźinskej rozmołwje ze Scholzom na nowinarskej konferency.
Hodźiny do wopyta Scholza bě Ruska započała, dźěle swojich jednotkow z manewroweje kónčiny na juhu a zapadźe kraja wróćo do kasernow přeměstnić. Druhe wojerske zwučowanja pak dale traja, tež w Běłoruskej. Scholz rěčeše na zhromadnej nowinarskej konferency wo „dobrym signalu“. Wón so nadźija, zo Ruska dalše jednotki z pomjezneje kónčiny cofnje. Putin hišće raz potwjerdźi, zo je Ruska k rozmołwam wo wěstotnych garantijach zapada zwólniwa. Mjeztym je prezident USA Joe Biden hišće raz před nadpadom Ruskeje na Ukrainu warnował. To je „přeco hišće móžno“.
