Zaměr je jasny
To a tamne (10.03.22)
Město žadaneje jězbneje dowolnosće je šofer awta policistam w Kölnje swojorazny dokument pokazał: skazanku na sudniski termin. Přičina sudniskeho jednanja wšak bě łoskoćiwa: Dźěše wo jězdźenje bjez jězbneje dowolnosće. Kaž so wukopa, njeje 23lětny hišće ženje žanu płaćiwu jězbnu dowolnosć měł. Policisća, kotřiž běchu muža zadźerželi, jeho na to na hamtske sudnistwo dowjezechu. Na 23lětneho čaka tuž dalše jednanje.
Policistka w Francoskej, kotraž bě swojeho kolegu za wodźidłom w pryzlach z elektrošokowakom nadpadnyła a tak wobchadne njezbožo zawiniła, wostanje bjez chłostanja. Sudnistwo w Roubaixju přiliča jej wulke zasadźenje pola policije na dobro. Wo disciplinarnych konsekwencach měli zamołwići rozsudźić. Policistaj běštaj po šoku do parkowaceho awta zrazyłoj, ale dale jěłoj.
„Amt24“ a dalše digitalne poskitki bórze serbsce
Wužiwać serbšćinu w zjawnosći je wobstajna tematika w skutkowanju Rady za serbske naležnosće Sakskeje. Wo wjacorych ćežišćach rěč nastupajo je so gremij wčera dorozumił.
Drježdźany (SN). Zapřijeće serbšćiny do digitalizaciskeje strategije Swobodneho stata Sakskeje a dźěławosć serwisoweho běrowa za serbsku rěč běštej předmjetaj, z kotrymajž je so sakska Rada za serbske naležnosće na swojim wčerawšim wuradźowanju w Drježdźanskim krajnym sejmje zaběrała.
Hłowne zaměry digitalizaciskeje strategije a wosebje staw zapřijeća serbšćiny do statnych digitalnych poskitkow je Thomas Popp, w statnej kencliji za digitalne zarjadnistwo zamołwity sekretar, gremijej rozłožił. Kaž z nowinskeje zdźělenki rady wuchadźa, Popp konkretnje připowědźi, zo chcedźa serbskej rěčnej wersiji centralneho zarjadniskeho portala „Amt24“ kaž tež sakskeho portala za wobdźělenje lětsa w lěću wozjewić. Rada podšmórny zakonske prawo Serbow, so w swojej rěči na statne instancy wobroćić móc, štož ma so dźeń a bóle tež po digitalnych pućach wobkedźbować.
Kretschmer přećiwo bojkotej
Berlin (dpa/SN). Sakski ministerski prezident Michael Kretschmer (CDU) bojkot ruskeho zemskeho płuna dale wotpokazuje. „Zaničowanske wuskutki ekstremnje wysokich, dospołnje kołwrótnych energijowych płaćiznow na němske a europske hospodarstwo a na nas wšěch jako přetrjebarjow bychu tak zahubne byli, zo njemóžemy tajki puć hić“, zwurazni Kretschmer dźensa w telewiziji ZDF. „Hdyž Němska poměrnje přihódne zrěčenja z Ruskej wupowědźi, dyrbi wona wo wjele dróše zrěčenja wotzamknyć.“
Na naprawy so dojednałoj
Berlin (dpa/SN). Wobmjezowanja koronawirusa dla maja wot 20. měrca w Němskej w dalokej měrje wotpadnyć. Kraje pak maja dale móžnosć, w kónčinach z wysokej incidencu zasahnyć. Na to staj so justicny minister Marco Buschmann (FDP) a strowotniski minister Karl Lauterbach (SPD) dojednałoj. Buschmann rěčeše dźensa w ZDF wo „jara dobrym kompromisu“. Winowatosć, nahubnik w zjawnych wobchadnych srědkach wužiwać, drje wostanje.
Wusud Chrupallu překwapił
Kolektiw Wakuum z Hellu Stoleckojc (naprawo) je wčera składnostnje ...
Wulka solidarita z ukrainskimi ćěkancami
Zhorjelc (AK/SN). Wokrjes Zhorjelc so intensiwnje na to hotuje, ukrainskich wójnskich ćěkancow přiwzać. Při tym so ze Swobodnym statom Sakskej, z komunami, pomocnymi organizacijemi a ze susodnym Zgorzelecskim wokrjesom wothłosuje. „Začuwamy wulku solidaritu a pomocliwosć. Za to smy jara dźakowni“, tamniši krajny rada Bernd Lange (CDU) tele dny podšmórny.
Wuwićowa towaršnosć Delnjošleska Hornja Łužica je w nadawku wokrjesa internetnu pomocnu platformu zarjadowała a ju wobhospodarja. Wona je wot minjeneho tydźenja aktiwna. Mjeztym maja wjace hač 300 přizjewjenjow ze stron wobydlerjow wšeho wokrjesa. Něhdźe 1 700 łožow móhli krótkodobnje přewostajić. Pjeć ludźi by jako tołmačer pomhało. Dalše pomocne poskitki nastupaja žiwidła, drastu, transporty a wuhotowanje bydlenjow.
USA namjet Pólskeje wotpokazuja
Kijew (dpa/SN). Ukraina wjace njewuzamkuje, při jednanjach z Ruskej wo móžnej neutraliće kraja rěčeć. „Tajke prašenja hodźeli so w jednanjach rozjimać, to je bjeze wšeho móžno“, rjekny Ihor Šowkwa, wonkopolitiski poradźowar ukrainskeho prezidenta Wolodymyra Zelenskeho, wčera w telewiziji ARD. Tajke něšto hodźało so na „runinje prezidentow“ zrjadować. Bohužel njeje Ruska dotal k tajkim jednanjam zwólniwa. Ukraina trjeba nimo toho garantije Ruskeje, zo so wójna nihdy njewospjetuje.
Serbowki su prezentne
To a tamne (09.03.22)
Europska synoda so schadźuje
Ochranow (SN/CoR). Synoda europskeje kontinentalneje Bratrowskeje jednoty so tuchwilu digitalnje schadźuje. Hač do soboty wuradźuja delegaća z dźesać europskich krajow wo přichodźe bratrowskeje jednoty. Poprawom bě zetkanje zao 2020 planowane, pandemije dla su je najprjedy na loni přesunyli a skónčnje wotprajili. Jeničce předsydstwo synody, čłonojo cyrkwinskeho nawodnistwa, tołmačerjo a techniski team su na městnje w Ochranowskim konferencnym domje Komenskeho. Wuradźowanja 86 čłonow synody paralelnje do němčiny, nižozemšćiny a jendźelšćiny přełožeja.
Europska prowinca ma wosady we wosom krajach. Wólby cyrkwinskeho nawodnistwa a wuběrkow chcedźa přewjesć, wólby biskopa abo biskopki su na klětu přestorčili. Wjacore próstwy zaběraja so z naslědnej cyrkwju. W Nižozemskej ma projekt k zběranju rozprawow časowych swědkow wo surinamsko-nižozemskich wosadach nastać. Prowinca ma so za to zasadźić, zo so přichodnje zapřijeće „rasa“ hižo njewužiwa. Prewenciju seksualizowaneje namocy chcedźa jako zaměr do cyrkwinskeho porjada přewzać.
