Zawru mórsku dróhu
Istanbul (dpa/SN). Turkowska je hladajo na nadpad Ruskeje na Ukrainu před tym warnowała, z wójnskimi łódźemi wusku mórsku dróhu mjez Srjedźnym a Čornym morjom wužiwać. To je wonkowny minister Mevlüt Çavuşoğlu powěsćerni Anadolu zdźělił, skedźbnjejo zdobom na zrěčenje z Montreuxja. Po nim smě Turkowska we wójnskich časach pod wěstymi wuměnjenjemi sama wo zawrjenju Bosporusa a Dardanelow rozsudźić.
UNO: Štyri miliony ćěkancow
New York (dpa/SN). Hladajo na ruski nadpad na Ukrainu so Zjednoćene narody na to hotuja, zo dyrbja hač do štyri miliony ćěkancow zastarać. Dyrbjeli-li wojowanja dale hić, budu ludźo dale ćěkać, rjekny komisar UNO za ćěkancow Filippo Grandi na posedźenju Bjezstrašnostneje rady UNO. Po jeho informacijach je dotal wjace hač 520 000 ludźi z Ukrainy do susodnych krajow ćeknyło, mjez druhim do Pólskeje, Madźarskeje, Rumunskeje, Słowakskeje a Ruskeje.
Mallorca zběhnje naprawy
Baerbock po puću do New Yorka
Berlin (dpa/SN). Zwjazkowa wonkowna ministerka Annalena Baerbock (Zeleni) je so dźensa do New Yorka podała, zo by na nuznje zwołanej hłownej zhromadźiznje UNO narěč k wójnje Ruskeje přećiwo Ukrainje dźeržała. To zdźěli rěčnik ministerstwa. Do toho chcyše so wona na přeprošenje swojeho pólskeho kolegi w zastojnstwje Zbigniewa Rauwa we Łódźi zhromadnje z francoskim wonkownym ministrom Jeanom-Yvesom Le Drianom na zetkanju we wobłuku tak mjenowaneho Weimarskeho třiróžka wobdźělić. Tež we Łódźi je ruski nadpad w srjedźišću rozmołwow stał. Po informacijach Pólskeje měješe na rozmołwach ukrainski wonkowny minister Dmytro Kuleba internetnje pódla być. Zetkanja zastupnikow Němskeje, Francoskeje a Pólskeje w formaće „Weimarskeho třiróžka“ wotměwaja so nětko 30 lět.
Posedźenje hłowneje zhromadźizny UNO k wójnje Ruskeje přećiwo Ukrainje je mjeztym jědnate nuznje zwołane minjenych 70 lět. Zaměr je, zo wjetšina zapadnych statow wójnu zasudźi.
Ruska Ukrainu dale nadběhuje
Wulki wojerski konwoj bliži so stolicy Kijewej
Moskwa/Kijew (dpa/SN). Ruska ze swojim wojerskim nadpadom na Ukrainu tež po prěnich rozmołwach z wulkim wotmachom pokročuje. Minjenu nóc registrowachu nadpady na druhe najwjetše město Charkiw na wuchodźe Ukrainy. Stolicy Kijewej bliži so wulki ruski konwoj tankow a dalšich jězdźidłow. Po trochowanju wojerskich fachowcow je kolona dlěša hač 60 kilometrow. USA su miliardy dolarow wopřijacy pomocny paket připowědźili. Z nim chcedźa Ukrainje humanitarnje, hospodarsce kaž tež wojersce pomhać.
Po posudku ameriskich zakitowanskich kruhow chce ruske wójsko najebać sylne spjećowanje dale stolicu Kijew zdobyć. Při tym z toho wuchadźeja, zo ruske wójsko město wobstupi a woblěhuje, štož by razne sćěhi za wobydlerjow měło. Pječa maja w Kijewje hižo prěnje problemy, wobydlerjow ze žiwidłami zastarać.
Wulka woda w Awstralskej
Sydney (dpa/SN). Zahubne zapławjenja na wuchodźe Awstralskeje su sej dalšej smjertnej woporaj žadali. Po oficialnych informacijach je dotal dźesać ludźi w dwěmaj zwjazkowymaj krajomaj zemrěło. W Queenslandźe bě žołma 75lětneho w awće sobu torhnyła. Pomocnicy móžachu jeho jenož hišće mortweho chować. We wosebje zlě potrjechenym měsće Lismore je so starša žona w swojim domje zatepiła. Pomocnicy njesebičnje dźěłaja, zo bychu ludźi na třěchach domow z čołmami a helikopterami wuchowali.
Něhdźe 300 000 wobydlerjow w zwjazkowym staće New South Wales je namołwjenych so na krótkodobne ewakuowanje přihotować. „Spakujće sej tobołu a swój mobilny telefon kaž tež nabiwanski nastroj“, rěčnica zdźěli. Wuchadźišćo ekstremneho wjedra je jara pomału hibaca so nižina z wulkimi zliwkami. Poněčim hiba so nižina ze sewjera do směra na juh. Milionowe město Sydney a wšón južny pobrjóh New Southa Walesa měłoj so na „lijeńcu“ nastajić.
Medije rěča wo „historiskej katastrofje“ a pokazuja wobrazy domow, w kotrychž woda hač pod wjerch steji.
To a tamne (01.03.22)
Wjace hač štyri promile alkohola měješe wodźer nakładneho awta w kreji, jako na awtodróze A 2 pola Ziesara njedaloko Podstupima znjezboži a so zrani. Šofer zhubi kontrolu, jako chcyše k tankowni. Najprjedy šmórny so jeho Lkw pobóčneho wobhrodźenja. Na to zrazy do dalšeju nakładneju awtow a so powróći. Po tym zo su pomocnicy sylnu „chorhojčku“ zwěsćili, přewjedźe policija test alkohola.
Něhdźe 100 000 eurow škody na železniskim mosće načinił je šofer nakładneho awta w Hennigsdorfje, dokelž njebě kran swojeho awta porjadnje zrumował. Móst njeje hižo wužiwajomny. Po prěnich dopóznaćach bě 61lětny šofer do njezboža dwaj kontejneraj nakładował. Po tym njeje kran po předpisach zaso do zakładneje pozicije přinjesł, ale wotpołoži jón na kontejneromaj. Jako chcyše pod mostom jěć, dóńdźe k zražce.
Komisija bilancowała
Bonn (B/SN). Po jednym lěće je komisija za připóznawansku pjenježnu podpěru woporow znjewužiwanja (UKA) rozprawjała. W prěnim lěće wobstaća bu w 606 padach cyłkownje 12, 890 200 milionow eurow přizwolenych. Komisija je w 13 wosebje ćežkich padach 75 000 do 100 000 eurow a w šěsć padach wjace hač 100 000 eurow wupłaćiła. Sebjekritisce wona přiznawa, zo ma so skedźbnje z předpołoženymi ličbami wobchadźeć. Přirada potrjechenych předpołoženu rozprawu komisije UKA přiwšěm kritizuje. „Připóznaće ćerpjenja potrjechenych a přeswědčiwa změna nastajenja za system wupłaćenja pjenjez stej trěbnej.“ Za to poskićeja zamołwići biskopam pomoc.
Kardinal termin wotprajił
Zasudźatej „bjezpřikładny akt agresije“
Flensburg/Brüssel (SN/JaW/bn). „Tež narodnosće kraja su z woporom njewoprawnjeneje inwazije Ruskeje na Ukrainu! Bohužel su hižo rozprawy, zo běchu wjacori přisłušnicy mjeńšinowych skupin při zakitowanju kraja žiwjenje přisadźili. Kaž nam naše čłonscy organizacije zdźělichu, su wjacori Grjekojo kaž tež dwaj Madźaraj mjez prěnimi woporami wójny. Wobžarujemy jich smjerć a wuprajamy swójbnym a přiwuznym wutrobne sobužarowanje“, Federalistiska unija europskich mjeńšin (FUEN) ze zjawnym stejišćom wozjewja. Mjez mnohimi ćěkancami, kotrež tele dny Ukrainu wopušćeja, su po informacijach FUEN tež přisłušnicy narodnych mjeńšin. „Smy zwólniwi z našimi partnerskimi organizacijemi na Ukrainje kaž tež w krajach, ćěkancow přijimowacych, pomocnu akciju zahajić.“ FUEN na to skedźbnja, zo su „narodnosće Ukrainy loyalni wobydlerjo kraja a zo wójna jich zajimam na žanežkuli wašnje njewotpowěduje. Zasudźamy inwaziju, z kotrejž sej Ruska ani njewotwisnosć stata ani ludowe prawo njewaži.
Měrowa demo za solidaritu
Köln (dpa/SN). Nawoda póstniskeho ćaha na róžowu póndźelu Holger Kirsch wočakowaše dźensa rano wjacore dźesaćitysacy wobdźělnikow na měrowu demonstraciju. Demo na „najwyšim swjatku Kölna“ je naležnosć wšeje měšćanskeje towaršnosće, rjekny Kirsch rano powěsćerni dpa. Kölnscy karnewalisća běchu so rozsudźili, město róžowopóndźelneho ćaha měrowu demonstraciju přewjesć. Na čole jědźeše wóz na temu Ukraina z překłótym měrowym hołbjom a wjele kreju.
Powětrowy rum zawrjeny
Brüssel (dpa/SN). Powětrowy rum nad wšěmi čłonskimi krajemi EU je za ruske lětadła zawrjeny. Zakaz je minjenu nóc z wozjewjenjom w hamtskim łopjenu EU płaćiwosće nabył. Němska bě swój powětrowy rum hižo sobotu popołdnju za lěty do Němskeje a za přelěty ruskich mašinow zawrěła. Kaž prezidentka komisije EU Ursula von der Leyen wčera potwjerdźi, płaći zakaz tež za priwatne lětadła ruskich oligarchow.
Dyrbi na prašenja wotmołwjeć
Tusk stejišćo Němskeje kritizuje
Brüssel (dpa/SN). Nawoda pólskeje opozicije a bywši prezident Rady EU Donald Tusk je němske nastajenje k sankcijam přećiwo Ruskej raznje kritizował. „Te knježerstwa Europskeje unije, kotrež su bolostnym rozsudam zadźěwali, su hańbu na so wzali“, pisaše Tusk minjeny pjatk na Twitteru. Jako přikłady mjenowaše wón Němsku, Madźarsku a Italsku. Tuchwilne chłostanske naprawy su po jeho słowach „njeskutkowne. W tutej wójnje je wšitko realne: błudnosć a surowosć Putina, ukrainske wopory, na Kijew padace bomby.“ Sankcije EU porno tomu su jenož nabarbjene.
Donald Tusk poćahowaše so ze swojimi wuprajenjemi pozdatnje na zwjazkoweho kanclera Olafa Scholza (SPD), kiž bě so na wurjadnym wjeršku EU minjeny štwórtk přećiwo tomu wuprajił Rusku hnydom z bankoweho komunikaciskeho systema Swift wuzamknyć. Politikar SPD wopodstatni to ze strategiskim rozwažowanjom. EU dyrbjała najprjedy raz při minjene tydźenje přihotowanym pakeće sankcijow wostać. Mjeztym je wón swoje měnjenje změnił.
