Kusel (dpa/SN). Při wobchadnej kontroli we wokrjesu Kusel w Porynsko-Pfalcy buštaj minjenu nóc policajskej zastojnikaj přez wutřěle smjertnje zranjenaj. Tole zdźěli policija w Kaiserslauternje. Pozadki njeskutka su hišće njeznate. Zastoj­nikaj Kuselskeje policajskeje inspekcije běštaj na rutinowej jězbje. Při wobchadnej kontroli na wokrjesnej dróze 22 w Ulmetće je wokoło 4.20 hodź. k wutřělam dóšło. Zastojnikaj móžeštaj hišće škričkowu informaciju wotpósłać. Jako pomoc přijědźe, bě za 24lětnu policistku a jeje 29lětneho kolegu přepozdźe. Policija prosy swědkow, so přizjewić.

New York (dpa/SN). Mjezynarodne napjatosće połoženja při mjezy Ruskeje a Ukrainy dla zaběrachu dźensa prěni króć Bjezstrašnostnu radu UNO. USA běchu temu minjeny tydźeń po informelnych rozmołwach z druhimi čłonami rady­ a z Ukrainu na dnjowy porjad stajić dali. „Njemóžemy dlěje přihladować a wočaknyć, što so stawa“, rjekny wulkopósłanča USA pola UNO Linda Thomas-Greenfield. USA a jeje zapadni zwjazkarjo boja so ruskeje inwazije w Ukrainje. Woni žadaja sej cofnjenje podłu ukrainskeje mjezy zhromadźenych 100 000 ruskich wojakow. Konkretne wuslědki w Bjezstrašnostnej radźe wšak njewočakowachu. Je to skerje mjezynarodne jewišćo, na kotrymž chcedźa USA ćišć na Rusku wukonjeć. Moskwa je wospjet potwjerdźiła, zo nima wotpohlad, Ukrainu nadpadnyć. Tež ukrainski wonkowny minister Dmytro Kuleba nima žane­ pokazki na hrožacy nadpad ruskich wójskow na Ukrainu. Generalny sekretar NATO Jens Stoltenberg je připowědźił, zo nochcył w Ukrainje jednotki aliancy nastajić.

Politikarjo rozmysluja wo zběhnjenju wobmjezowanjow korony dla

Berlin (dpa/SN). Najebać dale přiběrace ličby infekcijow z koronawirusom su hłosy w politice dźeń a sylniše, kotrež žadaja­ sej koncept k zběhnjenju wobmjezowanjow. Zwjazkowy minister za financy Christian Lindner (FDP) rjekny nowinarjam: „Nimamy žołmu omikrona drje hišće za sobu, dyrbimy pak hižo nětko na tym dźěłać, hdy a pod kotrymi wuměnjenjemi móžemy krok po kroku wolóženja zwoprawdźić.“ Mjeztym so pokazuje, zo je zwjazkowe knježerstwo swój zaměr šćěpjenja jasnje misnyło.

Kaž z ličbow Roberta Kochoweho instituta wuchadźa, je hač do kónc ty­dźe­nja 75,7 procentow ludźi w Němskej znajmjeńša jónu přećiwo koronawirusej šćěpjenych. Zaměr zwjazkoweho knježerstwa bě, hač do kónca januara 80 pro­centow ludźi znajmjeńša jónu šćěpić.

Lindner rjekny, zo trjebaja ludźo skutkowny škit přećiwo wirusej. „Natykliwa warianta omikron je wulke wužadanje. Za nas liberalnych pak płaći, zo měli wobmjezowanja swobody jenož tak dołho­ zastupujomne być, dołhož sej poło­ženje to žada.“

Drježdźany (dpa/SN). Sakski zwjazk wikowarjow je sej znowa žadał, wotstronić prawidło 2G w drobnowikowanju. Njeje přiměrjene, zo smědźa jeničce šćěpjeni a wustrowjeni do wobchodow, kotrež njesłušeja k žiwjenjatrěbnemu wobłukej, zwjazk minjeny pjatk kritizowaše. Njeń­dźe wo to škit zběhnyć, ale wotstronić naprawu, kiž nima žanu funkciju a kotraž eksistencu wikowarjow wohroža.

Tójšto zawodow ma so mjeztym ze stratami wobrotow 50 procentow, přirunujo z niwowom do krizy, bědźić. Hłowny jednaćel zwjazka wikowarjow René Glaser skedźbni na přepytowanja, kotrež dopokazuja, zo njejsu wobchody žórła infekcijow. „Njemóžeš nikomu logisce rozkłasć, zo nimaja kontakty kupcow we wobchodach žiwidłow, kotrež wučinjeja 80 procentow wšěch kontaktow, žane wjetše wuskutki na infekciske połoženje, tamne 20 procentow wobchodow bjez žiwi­dłow pak so takle problematizuja.“

Sakske krajne knježerstwo chce jutře nowy wukaz korony dla wobzamknyć. Tak planuja wšelke wolóženja. W disku­siji je, tež nješćěpjenym z nahubnikom wšitke wobchody spřistupnić.