Dalše mocy NATO na wuchod
Zapadna wojerska alianca přeměstnja wojakow – EU chce Ukrainje pomhać
Brüssel (dpa/SN). Hladajo na napjatosće z Ruskej chce komisija Europskeje unije Ukrainje krótkodobnje dalšu miliardu eurow pjenježneje pomocy přewostajić. „Kaž přeco je EU Ukrainje w tajkim ćežkim połoženju poboku“, rjekny prezidentka komisije EU Ursula von der Leyen wčera w Brüsselu. Němska politikarka namjetowaše mjez druhim nuzowy pomocny kredit 1,2 miliardow eurow. Wona so nadźija, zo rada čłonskich krajow EU a Europski parlament tomu ručež móžno přihłosujetej.
Von der Leyen zdobom připowědźi, zo chcyła komisija EU prawje bórze plan dołhodobneje pomocy za modernizaciju Ukrainy zdźěłać. Nimo toho chcył Brüsselski zarjad přiražki na dobro Ukrainy wo 120 milionow eurow rozšěrić a tak nimale podwojić. Cyłkownje su EU a jeje financne zarjady krajej wot lěta 2014 wjace hač 17 miliardow eurow kreditow a přiražkow přewostajili. Kaž von der Leyen potwjerdźi, je Ukraina swobodny a suwereny kraj, kiž móže sam wo swojich naležnosćach rozsudźić.
To a tamne (25.01.22)
Z hašišowej cigaretu w hubje sam z mobilnym telefonom fotografował je so muž na dwórnišću w hornjobayerskim Moosburgu, byrnjež zwjazkowy policist pódla njeho stał. Tón čakaše na ćah k Mnichowskemu dwórnišću, hdźež měješe słužbu. Zastojnik je personalije 38lětneho registrował. Na to jědźeštaj wobaj z ćahom. Hižo po jednej staciji 38lětny spěšnje wulěze, při čimž je za policista dalši joint a nóž ležo wostajił.
Z wotpadkami dospołnje zanjerodźene awto je policija w Essenje zadźeržała. Jězdźidło bě zastojnikam napadnyło, dokelž sedźeše šofer jara blisko za wodźidłom. Na to so wukopa, zo je wóz połny njerjada, tež tam, hdźež dyrbi šofer z nohomaj borzdźić a kuplować. To móhło w nuzowym padźe strašne być. Šofer ma wěsty čas chwile njerjad zrumować a swoje awto znowa předstajić.
Modlenje wo jednotu křesćanow
Vatikan (B/SN). Bamž Franciskus je njedźelu tydźenja při tradicionalnym modlenju wo jednotu křesćanow na Pětrowym naměsće znowa wuzběhnył: „Tež my křesćenjo w mnohotnosći konfesijow a tradicijow smy putnicy po puću k połnej jednoće.“ Jednota so poradźi, hdyž so sylnišo na Jězusa wusměrimy, jeničkeho Knjeza. Skedźbni na lubosć Božu, kotraž so často schowana pokazuje, kaž dźiw z winom w měsće Kana. Tydźeń modlenja wo jednotu křesćanow wotměwa so ekumenisce po cyłym swěće, w sewjernej hemisferje wot 18. do 25. januara a w južnej mjez swjatkami a Božim spěćom. 25. januara, na swjedźenju nakazanja japoštoła Pawoła, swjeći bamž w Romskej bazilice swj. Pawoła ekumenisku nutrnosć.
Mać Boža w tučeli
Diplomaća EU dale w Kijewje
Brüssel (dpa/SN). Europska unija njewidźi – hinak hač USA – tuchwilu žanu přičinu, wulkopósłancow a swójby diplomatow namołwjeć, zo měli Ukrainu wopušćić. „Njetrjebamy ničo dramatizować“, rjekny społnomócnjeny EU za wonkowne naležnosće Josep Borrell dźensa na wuradźowanju wonkownych ministrow EU w Brüsselu. USA běchu do posedźenja připowědźili, zo chcedźa napjatosćow mjez Ukrainu a Ruskej dla ličbu diplomatow w stolicy Kijewje pomjeńšić.
Wuradźuja zaso wo koronje
Berlin (dpa/SN). W času raznje přiběracych ličbow infekcijow z koronawirusom chcychu zastupnicy Zwjazka a zwjazkowych krajow dźensa wo dalšim postupowanju w pandemiji wuradźować. Hižo do zahajenja konferency so wotbłyšćowaše, zo dotalny kurs dale pěstuja: žane přiwótřenja dotalnych naprawow, ale tež žane wolóženja. Změny wočakowachu skerje při testowanju. Tak nochcedźa přichodnje wjace při kóždym podhladnym padźe PCR-test přewjesć, ale jenož hišće mjez wosebje wohroženymi skupinami.
Přećiwo dodawanju bróni
Zymske wjedro z čerstwym sněhom je wčera tež w Sakskej mnohich na ...
FUEN: Mjeńšinam kubłanske přiražki njeskrótšić
Flensburg (SN). Federalistiska unija europskich mjeńšin (FUEN) je zludana hladajo na rozsud pólskeho Sejma, komory parlamenta. W decembrje bě Sejm změnu próstwy w lětušim etaće zapodał, kotraž předwidźi skrótšić kubłanske přiražki za wučbu mjeńšinowych rěčow wo nimale dźesać milionow eurow. Předewšěm potrjechi to wučbu němčiny jako mjeńšinoweje rěče. Nimo toho wuskutkuje so rozsud na wuwučowanske móžnosće tamnych připóznatych narodnych mjeńšin.
Kaž FUEN zdźěli, ma němska mjeńšina w Pólskej prawo, zo statny šulski system jeje maćeršćinu spěchuje. Wšako ma wona wažny wobstatk kulturneje identity wostać. Na zakładźe pólskeho ratifikowaneho ramikoweho dojednanja wo škiće narodnych mjeńšin a na zakładźe Europskeje charty k škitej regionalnych a mjeńšinowych rěčow maja Němcy w Pólskej prawo na trěbne spěchowanje. Jeničce z podpěru stata je móžno wučbu němčiny zaručić. Budu-li přiražki woprawdźe skrótšene je to „hłuboki dyr wšitkim přisłušnikam němskeje mjeńšiny w Pólskej“.
Spěchowanje přetorhnjene
Berlin (dpa/SN). Hladajo na hoberski nawal próstwow a na „wopačne wusměrjenje“ je nowe zwjazkowe knježerstwo spěchowanje energije eficientnych twarjenjow nachwilnje přetorhnyło a planuje zasadnu reformu. Kaž zwjazkowe ministerstwo za hospodarstwo a škit klimy zdźěli, statna spěchowanska banka KfW žane próstwy wjace njepřizwola.
Dospołnje zastajene budźe spěchowanje tak mjenowaneho eficientneho domu, štož by so kónc měsaca tak a tak skónčiło. Hłowna přičina je njesměrny nawal próstwow w měsacu januaru, kotrež přewostajene srědki daloko přesahuja. „Kónc spěchowanja požadarjow jara zrudźa a přesłapja“, měni energijowy statny sekretar Patrick Graichen. Wón kritizuje, zo je dotalne zwjazkowe knježerstwo zapasło, zestarjene směrnicy spěchowanja nowym twarskim zakonjam přiměrić. To je wopačne powabki a nawal próstwow wuskutkowało. Dotalnemu knježerstwu CDU a SPD wumjetuje Graichen „masiwne klimowopolitiske zmylki a brachi financow dla“.
Merz z jasnym wuslědkom
Digitalny zjězd noweho předsydu wuzwolił – Kretschmer městopředsyda
Berlin (dpa/SN). CDU chce so ze swojim nowym předsydu Friedrichom Merzom z wotmachom do ponowjenja podać. Bywšeho frakciskeho předsydu CDU/CSU w zwjazkowym sejmje su sobotu na digitalnym stronskim zjězdźe ze 94,62 procentami hłosow za noweho předsydu wuzwolili. Zdobom hrozy stronje do wažnych wólbow krajnych sejmow w Posaarskej, Schleswigsko-Holsteinskej a Sewjerorynsko-Westfalskej w nalěću dotal njerozrisaneho nawodnistwa w frakciji unije w zwjazkowym sejmje dla nowy bój wo móc. Při tym dźe wo prašenje, hač Merz dotalneho nawodu opozicije Ralpha Brinkhausa ze zastojnstwa wutłóči. We wusyłanju telewizije ZDF „Što nětko?“ Merz rjekny, zo njesteji tale naležnosć na dnjowym porjedźe a zo chce wón zhromadnje z Brinkhausom problem rozrisać, hdyž je načasu.
Wěste wolóženje
To a tamne (24.01.22)
Do dźesać metrow hłubokeho zastaranskeho šachta padnył je muž w hotelu hessenskeho Hanauwa, při čimž so ćežko zrani. Wězo njemóžeše so hižo sam wuswobodźić. A tak dyrbješe wosebita jednotka wohnjoweje wobory přijěć, kotraž móže ludźi z wulkeje wysokosće wuchować. Na akciji bě 35 wobornikow wobdźělenych. Skónčnje so poradźi, muža z powjazami z wuskeho šachta wućahnyć. Kak móžeše do njeho padnyć, njewědźa.
Z nožom w ruce je wobsedźerka małeho wobchoda w Berlinje-Kreuzbergu dweju rubježnikow wućěriła. Mužej běštaj do wobchoda zastupiłoj a sej z pistolu pjenjezy žadałoj. 53lětna pak njeda so zatrašić a wućahny kuchinski nóž, na čož so rubježnikaj zminyštaj. Jedyn z njeznateju přiwšěm hišće z brónje třěli, kotraž pak wukopa so jaka trašawka. Wobsedźerce wobchoda so ničo njesta.
