Kijew (dpa/SN). Němska zwjazkowa wonkowna ministerka Annalena Baerbock (Zeleni) je so dźensa w Moskwje z ruskim wonkownym ministrom Sergejom Lawrowom zetkała. Po hodźinu trajacym wuradźowanju rěčeštaj Baerbock kaž Lawrow wo „konstruktiwnej rozmołwje“ k wobě stronje zajimowacym temam. Přezjednaj sej běštaj, zo měli konflikt na wuchodźe Ukrainy diplomatisce rozrisać. Ruske wonkowne ministerstwo bě do wopyta zdźěliło, zo ma Němsku za „wažneho aktera na mjezynarodnej runinje“. Zdobom je Ruska hladajo na tuchwilne rusko-němske poćahi „přesłapjena“.

Wčera bě so ministerka Baerbock hižo na zetkanju z ukrainskim kolegu Dmytrom Kule­bu za měrniwe rozrisanje konflikta na Ukrainje wuprajiła. „Diplomatija je jenič­ki kmany puć“, rjekny politikarka Zelenych na strach Ukrainy před nadpadom Ruskeje nastupajo. „Němska je zwólniwa za dialog z Ruskej.“ Kaž Baerbock hladajo na ukrainske žada­nja za němskimi brónjemi zwurazni, měło wo to hić, krizu dale njepřiwótřić.

Postajenja koronapandemije w Sakskej zbudźeja kritiku liberalnych

Drježdźany/Podstupim (dpa/SN). FDP ma aktualne sakske postajenja koronawirusa dla za njezrozumliwe a „nic wjace čitajomne“. Liberalni so boja, zo je wobydlerjam dale a ćešo wukazane naprawy dodźeržeć. „Tele tam-a-sem wokoło škitnych naprawow ludźi mjeztym dwě lěće zdźěla jara emocionalnje zaběra. Runje tohodla dyrbjeli wukazy poprawom ludźom bliske, zrozumliwe a jednorje zwoprawdźomne spisane być“, rjekny krajna předsydka FDP Anita Maaß wčera w Drježdźanach. „Runje to napřećiwne pak tuchwilu dožiwjamy.“

Wopyt němskeje wonkowneje ministerki Annaleny Baerbock w Moskwje bě takrjec runje w prawym wokomiku. Na jednym boku móžeše so wona nazhonitemu ruskemu šefdiplomatej Sergejej Lawrowej wosobinsce předstajić. Na tamnym boku móžeše so hnydom do dźěła dać. Wšako je mjez Ruskej a Němskej dosć njerozrisanych problemow. A snano wona konflikt na Ukrainje wotnětka z hinašimaj wočomaj widźi, po tym zo je jej Lawrow wosobinsce potwjerdźił, zo nima Ruska wotpohlad, Ukrainu nadpadnyć. Mi znajmjeńša napadnje, zo je Baerbock minjeny čas swoju rigoroznu politiku napřećo Ruskej změniła a zo so dźeń a bóle jako diplomatka prezentuje. To je bjezdwěla tež wliw zwjazkoweho kanclera Olafa Scholza (SPD), kiž chcył poćahi k Ruskej normalizować a płunowód Nord Stream 2 aktiwizować. Wón tež wotpokazuje Ukrainje brónje dodawać. Wonkowna ministerka Baerbock dyrbi jeho kurs zastupować, a to je derje tak. Marko Wjeńka

Palaca so baterija elektrokolesa je w delnjosakskim Isernhagenje škodu 1,5 milionow eurow zawostajiła. Aku bě so za čas nabiwanja zapalił. Wobydlerjo wosobneho domu buchu přez alarmowu připrawu warnowani a móžachu so wuchować. Płomjenja pak rozpřestrěchu so na biblioteku, w kotrymž aku ležeše. Fachowcy wohnjoweje wobory wšak spěšnje zwěsćichu, zo bě defekt kolesoweje baterije woheń zawinił.

Prěnje narodniny swojeho synka je wopity muž w Ludwigshafenje z wutřělemi woswjećił a so tak wo zasadźenje policije postarał. 30lětny bě z trašawku wospjet do powětra třělał. Přiwołani policisća zhonichu, zo bě muž wjacore salwy składnostnje synkowych narodnin třělał. Wón pak njeměješe žanu dowolnosć, tajku bróń wobsedźeć. Zastojnicy pistolu a municiju sćazachu a delikt přizjewichu.