Rakecy (SN/JK). Dźěłowa skupina regionalneho managementa je 13 předewzaćam w spěchowanskim regionje krajiny hornjołužiskeje hole a hatow přihłosowała. Při tym jedna so přewažnje wo projekty z wobłuka bydlenje, hospodarstwo a turizm. Cyłkownje běchu regionalnemu managementej w Rakecach 27 próstwow wo spěchowanje zapodali. Nimale połojca z nich poćahowaše so na wutwar abo nowotwar bydlenjow za młode swójby. Za spěchowanje wudadźa w spěchowanskim regionje 850 000 eurow, rěka z Rakec. Přihłosował je gremij mjez druhim digitalnemu pućowanskemu wjednikej po holi a hatach Budyskeho kraja. Nimo toho budźetej klětuši Krabatowy swjedźeń a wičny Dźeń sakskeho krajneho kuratorija wjesny rum spěchowanej.

Přizwolenska skupina Leaderoweje kónčiny je póndźelu wo spěchowanskich naprawach rozsudźiła. W přichodnych dnjach dóstanu wuzwoleni próstwarjo zdźělenku a móža w dalšim kroku projekt na ratarskim zarjedźe w Kamjencu přizjewić. Přizwolene spěchowanske srědki budu po zwoprawdźenju přede­wzaća wupłaćene.

Minjene lěta je so kooperacija mjez sakskimi a pólskimi předewzaćemi derje wuwiła. Nětko je načasu, tež na polu informatiki a komunikacije zhromadne puće hić.

Drježdźany (SN/JK). Digitalna rewolucija w hospodarstwje a zarjadnistwje staja podobne žadanja na Saksku a Pólsku. Knježerstwje wobeju krajow stej wotpowědne wuměnjenja za mjezy překročace zhromadne dźěło swojich předewzaćow wutworiłoj.

Lětuše rybowe tydźenje su nimo. Na nje wróćo zhladujo su wobdźělnicy přewažnje spokojom. Pod smužku je łužiska ryba swojej domiznje zaso dobru słužbu wopokazała.

Budyšin (SN/JK). Tak přerosćene kaž přez cyłe lěto bě wjedro tež nazymu. To pak njeje lubowarjam a přećelam łužiskeje ryby škodźało. Hač na małe wuwzaća su łójenje rybow a rybowe swjedźenje łužiskich rybarjow zaso derje wopytane byli. Nimo čerstweje ryby a pokazkow, kak ju rybarjo žněja, mějachu wopytowarjo składnosć, sej najwšelakoriše rybjace wudźěłki zesłodźeć dać.

Hosćency su organizatorej łužiskich rybowych tydźenjow, Marketingowej towaršnosći Hornja Łužica-Delnja Šleska (MGO), dobry wothłós na rybowe jědźe wobkrućili. „Najebać wotpowědne płaćizny su sej wosebje turisća, ale tež domjacy gurmejojo časćišo rybu we wšelakich wariantach skazali“, wobkrući našemu wječornikej wotrjadnica MGO Antje Lehmann. „Někotři hosćencarjo su nam hižo signalizowali, zo njewědźa, hač so klětu znowa wobdźěla. Dźeń a mjenje personala dla maja hižo lětsa ćeže, hosći zastarać“, wona doda.

Wobmyslenje, zo ze zawjedźenjom minimalneje mzdy bjezdźěłnosć w Hornjej Łužicy přiběra, njeje so wobkrućiło. Tole zdźěli dźensa dopołdnja Thomas Berndt, direktor Budyskeje agentury za dźěło­, nowinarjam.

Budyšin (CK/SN). W nowembrje běchu posrědkowarjam agentury za dźěło w hor­njołužiskim regionje 3 104 socialneho zawěsćenja winowatostne městna k dispoziciji. To je 851 wjace hač w oktobrje a 690 wjace hač loni w samsnym času. Jeničce ličba minijobow je woteběrała. Cyłkownje posudźuje šef Budyskeje agentury Berndt dźěłowe wiki w Hornjej Łužicy „w robustnym dobrym połoženju“.

Tak je so ličba bjezdźěłnych w nowembrje dale pomjeńšiła. 24 923 žonow a muži bě bjez dźěła, 2 338 mjenje hač před poł lětom. Na naprawach za druhe dźěłowe wiki bě 32 401 wosoba wobdźělena, štož je wo tójšto mjenje hač před poł lětom. Za to je agentura za dźěło minjene měsacy nimale poł miliona eurow wjace hač loni za zarjadowansku pomoc a dalše přiražki wudała. 72 procentow wobdźělnikow měješe poł lěta po wotzamknjenju kwalifikacije krute dźěło. Tale­ kwota je jedna z najlěpšich po cyłej Sakskej.