Předewzaća pytaja sobudźěłaćerjow
Ličba bjezdźěłnych tež w Hornjej Łužicy hižo dlěši čas woteběra. Přiwšěm su tudyši předewzaćeljo dale zwólniwi, w swojim zawodźe nowych sobudźěłaćerjow přistajić.
Zaručeja njezapomnity dowol
Pančicy-Kukow (JK/SN). W Sakskej přežiwjeja kóžde lěto mnozy turisća z kraja a wukraja swój dowol. Turizm je jedna z hospodarskich zepěrow swobodneho stata. Wulki podźěl na tym ma towarstwo Krajny dowol w Sakskej ze sydłom w Miłoćicach, kotrež bě wčera na swjatočne zarjadowanje k 25lětnemu wobstaću towarstwa do Pančičanskeho klóštra přeprosyło. Na swjatočnosć witaše předsydka Patricia Wissel nimo čłonow towarstwa mjez druhim statneho sekretara w sakskim ministerstwje za ratarstwo a wobswět Herberta Wolfa kaž tež zastupjerjow spěchowanskich institucijow towarstwa a komunalnych politikarjow.
Łódź do praweho směra wodźić
Předewzaće Inowatiwna domowa technika Rječka-Čornak w Kamjenej, wobstejace 26 lět, je jedne, kotrež swojim kupcam přeco zaso nowe technologije poskića. Bianka Šeferowa je so ze załožerjom Tomašom Rječku rozmołwjała.
Waše předewzaće so zaměrnje dale wuwiwa. Što Was pohonja?
T. Rječka: Wot wšeho spočatka mje technika jara zajimuje. To je mój metjej a tak sčasom pytnu, do kotreho směra so trend wuwiwa. Tomu bě tež tak, jako so 1990 zesamostatnich. Dwaj měsacaj pozdźišo je so mi Konrad Čornak z Wotrowa přidružił. Tohodla rěka předewzaće tež Rječka-Čornak. Tehdy wuwiwaše so cyle nowy směr tepjenjow na zakładźe wolija a płuna. Kónc 90tych lět slědowachu technika kondensatnych kotołow a regeneratiwne energije. Wažny krok bě twar biopłunoweje připrawy w Radworju. Sym jón dokładnje sćěhował. System, ćopłotu a milinu zwjazać, je trend časa. Na zakładźe toho wuwi so Radworska bliskoćopłotna syć. Highlight je nětko paliwowa cela. Po tychle krokach smy sobu jako prěni tele technologije nałožowali.
Kelko sobudźěłaćerjow maće?
Za moderne tepjenske móžnosće
Za nowe energijowe systemy zahorja so Měrćin Bohot z Kamjeneje. Na staršiskej ležownosći je sej hižo milinu produkowacy wětrnik twarił. Dale steji tam rotěrowaca, přeco na słónco wusměrjena solarna připrawa. Z nowej techniku zaběra so Kamjenjan tež w předewzaću Tomaša Rječki, hdźež je zamołwity za blokowe tepjernje (BHKW). Připrawa wobsteji z motora, ćěrjeneho z wolijom abo płunom, a z generatora, kotryž milinu produkuje. Přez motor nastata ćopłota so za tepjenje wužiwa. Blokowe tepjernje hodźa so w najwšelakorišich wulkosćach do domskich zatwarjeć. „Wotwisnje je to wot domskeho a swójskeje potrjeby“, 36lětny wuswětla. Produkty šěsć firmow Kamjenjanske předewzaće poskića. Měrćin Bohot je so w tymle wobłuku wukmanił a wotpowědne certifikaty za hladanje a porjedźenje tajkich připrawow złožił.
Hobby nětko powołanje
Michał Wencl bě 16 lět stary, jako započa so w Kamjenjanskim tepjenjotwarskim předewzaću Rječka-Čornak na twarca centralnych tepjenjow a přewětrjenskich připrawow wukubłać. Wón bě prěni wučomnik předewzaćela Tomaša Rječki. Hač do dźensnišeho tam dźěła. Mjeztym pak je 40lětny w předewzaću zamołwity za hłubokotwar. Tole je so na zakładźe hobbyja tak wuwiło.
„Zajim za dowol we Łužicy budźić“
Hospodarstwo a z nim zwisowacy marketing Tobiasa Hajdana zahorja. „Chcych w swojim powołanju na kóždy pad něšto z ličbami činić“, powěda 27lětny Hrubjelčan. Šulu wuspěšnje zakónčił je wón w Radworju, po tym wuknješe dale na Kamjenskim hospodarskim gymnaziju, prjedy hač zahaji wukubłanje na Drježdźanskej hotelowej akademiji. Paralelnje złoži hišće dalokostudij we wobłuku zawodneho hospodarstwa. „Mějach zbožo, zo smědźach so praktisce w Drježdźanskim Swiss hotelu wukubłać. Tak dóstach přehlad do najwšelakorišich naprawow marketinga.“
Rumy a prawidła definować
Serbsku rěč a kulturu zapřijeć
Zaměry a zajimy Serbow měli so w regionalnym planje Hornja Łužica-Delnja Šleska swědomiće sobu wobkedźbować. Wčera rozjimachu radźićeljo planowanskeho zwjazka jeho dalewuwiće.
Wojerecy (AK/SN). „Serbow nańdźemy w předsłowje, w zakładnych směrnicach, we wobłuku funkcijow komunow a turizmje. Cyłkowny sedmy kapitl je jim wěnowany. Smy w stajnej rozmołwje z planowanskim zwjazkom a smy dobry dźěłowy staw docpěli“, podšmórny referent za etat a infrastrukturne naležnosće Domowiny Marko Kowar po wčerawšim posedźenju regionalneho planowanskeho zwjazka Hornja Łužica-Delnja Šleska we Wojerecach. Tam rozjimachu radźićeljo dalše wuwiće regionalneho plana. Jeho tuchwilny naćisk wopřijima cyłkownje 1 300 stron. 165 stejišćow radźićeljo wobkedźbowachu. Wotrězk po wotrězku woni plan wčera wotwažowachu.
Chinjenjo na wopyće w Budyšinje
Delegacija 33 Chinjanow, kotřiž su wot lěta 1987 w Budyskej wagonowni dźěłali, je wot wčerawšeho z hosćom w sprjewinym měsće. Woni zetkachu so wčera z bywšimi kolegami w hotelu Best Western. Najebać wšitke prócowanja njeje so jim zešlachćiło sej twornju wobhladać. Jenož wotwonka móžachu na swoje tehdyše skutkowanišćo hladać. Dźensa popołdnju witaše chinskich hosći Budyski wyši měšćanosta Alexander Ahrens (njestronjan) (srjedźa), kiž je sam někotre lěta w Shanghaiju bydlił. Foto: Carmen Schumann
Znamjenja pokazuja jasnje na rozšěrjenje
Daimler w Kamjencu zaměrnje dale inwestuje. Za rozšěrjenje twornje accumotive, kotraž baterije za jězdźidła zhotowja, nałoža 500 milionow eurow. Dźensa su twarnišćo oficialnje zahajili.
