Krótkopowěsće (09.08.22)
Nowa nawodnica muzeja
Hórnikecy. Energijowa fabrika w Hórnikecach ma nowu nawodnicu. Dotalna muzejowa pedagogowka Maria Schöne je jednaćelstwo industrijneho muzeja 1. awgusta přewzała. Z Drježdźan pochadźaca architekta a kulturna wědomostnica naslěduje Kirsten Zinke, kotraž bě po dźesaćlětnym skutkowanju na čole muzeja do Sakskeho krajneho zwjazka sociokultura šła.
Poł miliona eurow za centrum
Mužakow. Wopytowarski a informaciski centrum, kotryž chcedźa hač do kónca lěta w Kawalěrowym domje Mužakowskeho Pückleroweho parka zaměstnić, ma „wuwiće regiona wot lodoweje doby hač k temam dźensnišeho dnja, kaž brunica, škleńčerstwo, změna klimy a strukturna změna“ wotbłyšćować, w zdźělence powěsćernje dpa rěka. Cyłkownje nałožuja za přetwar 500 000 eurow.
Peter Schowtka njeboh
Krótkopowěsće (08.08.22)
Ferialny kurs zakónčeny
Budyšin. Z wudawanjom wopismow wo wobdźělenju wšitkim kursistam a kursistkam je so pjatk w awli Budyskeho Serbskeho gymnazija lětuši mjezynarodny ferialny kurs serbšćiny Serbskeho instituta zakónčił. 13 wobdźělenych zdoby sej z pruwowanjemi certifikat po mjezynarodnym referencnym ramiku w stopnjach wot A1 hač do B2.
Intendantka RBB wotstupiła
Berlin. Patricia Schlesinger njeje hižo intendantka sćelaka RBB. Kaž powěsćernja dpa zdźěla, je wona zastojnstwo wčera złožiła. Prawdźepodobnje je wona mjez druhim wysoke poradźowanske zrěčenja wotzamkowała a sej sama nadměrnu mzdu popřała. Dźensa wuradźowaše rozhłosowa rada RBB kak měło dale hić. Wumjetowanja dadźa tuchwilu eksternje pruwować. Schlesinger bě wot 2016 intendantka RBB.
Podpěruja wučomnikow
Krótkopowěsće (05.08.22)
Šek za Luttnerowu załožbu
Budyšin. Rozžohnowacy so Budyski krajny rada Michael Harig (CDU) je Luttnerowej załožbje šek přepodał. Předsydka Margitta Luttner přija pjenježny dar we wysokosći 5 330 eurow. Harig bě nastupajo swoje rozžohnowanje ze zastojnstwa w juliju hosći prosył so kwětkow a darow wzdać a za to załožbje, kotraž podpěruje financnje potrěbnych šulerjow pjenjezy posrědkować.
Žadaja sej reformy
Podstupim. Braniborscy Zeleni žadaja sej reformu tamnišeho lěsneho zakonja. Za přičinu mjenuje krajna předsydka strony Julia Schmidt powěsćerni dpa přiběracy strach lěsnych wohenjow, kaž bě minjene tydźenje nazornje dožiwić. Mjez druhim žada sej wona zakonsce postajić, wusyki wutworić, studnje za hašensku wodu točić a suche drjewo z lěsow wotstronić.
Na měsačk so nastajili
Krótkopowěsće (04.08.22)
Na dompuć so nastajili
Krupka. 43 młodostnych-putnikow je so dźensa rano z čěskeje Krupi pěši na dompuć do Chrósćic podało. Wčera běchu w Krupčanskej bazilice z dalšimi serbskimi kemšerjemi – cyłkownje bě jich něhdźe 300 wěriwych – tradicionalne putniske kemše swjećili. Božu mšu wobrubi nimo chóra młodych putnikow tež skupina dujerjow. Hłowny měšnik bě kapłan Florian Mróz.
Kniharnja zaso połnje přistupna
Budyšin. Smolerjec kniharnja w Budyšinje je wot dźensnišeho zaso w zwučenych wotewrjenskich časach přistupna. To zdźěli dźensa dopołdnja Ludowe nakładnistwo Domowina. Kniharnja bě chorosće dla posledni tydźeń w juliju zawrjena a minjeny tydźeń jenož dźělnje wočinjena. Zajimcy mějachu a maja dale móžnosć sej twory pod abo telefonisce skazać.
Strach wohenjow dale wulki
Krótkopowěsće (03.08.22)
Klumpanje wobmjezowane
Budyšin. Aktualneje suchoty dla je klumpanje wody z priwatnych studnjow ke krjepjenju trawnika w Budyskim wokrjesu jenož hišće w času mjez 19 a 10 hodź. za jednu hodźinu dowolene. To je Budyski krajnoradny zarjad wčera wukazał. Štóž so po wukazu nima a swój trawnik dlěje krjepi, dyrbi z pokutu ličić, rěka ze zarjada.
Móža firmy zeznać
Choćebuz. Hač do 19. awgusta poskića rjemjeslniska komora Choćebuz wosebitu akciju za młodostnych. Šulerjo a šulerki wot 15 lět maja pjeć dnjow dołho móžnosć, kóždy dźeń druhi zawod a tak wšelake powołanja zeznać. Na akciji wobdźěli so nimale 80 firmow z regiona. Zajimcy móža so pod přizjewić.
Wudrjeńca hišće hłubša
Hranice. Wudrjeńca w morawskich Hranicach, najhłubša z wodu pjelnjena hłubina swěta, je hišće hłubša hač dotal zwěsćenych 404 metrow. Nurjacy so roboter čěskich slědźerjow prózdnjeńcow je hłubokosć 450 metrow docpěł. Hišće hłubšo pak wón z techniskich přičin njepřińdźe. Geologojo njedźiwajcy toho tukaja, zo móhła wudrjeńca samo jedyn kilometer hłuboka być.
Red Bull podlěši z Honda
Krótkopowěsće (02.08.22)
Wustajeńca na česć Jana Buka
Budyšin. Na česć dźensnišich 100. posmjertnych narodnin wučerja a wuměłca Jana Buka přihotuje Budyski Serbski muzej nowu wustajeńcu. Wotewrěć chcedźa přehladku, w kotrejž wotpohladuja něhdźe sto twórbow Jana Buka předstajić, 2. oktobra. Přehladka ma hač do klětušeho 26. februara w Serbskim muzeju widźeć być, po tym pokazaja ju na štyrjoch dalšich stacijach we Łužicy a w Pólskej.
Spěchowanske próstwy dóšli
Budyšin. Hač do minjeneje njedźele su do zarjada Załožby za serbski lud dohromady 36 próstwow wo spěchowanje projektow we wysokosći nad 10 000 eurami dóšli. Su to předewšěm próstwy wo spěchowanje projektowych managerow. Tři próstwy měrja so na nowe medije. Hač do 30. septembra přijimuje załožbowy zarjad hišće próstwy za spěchowanje klětušich projektow pod 10 000 eurami.
Hotel zaso dom za azyl pytacych
Krótkopowěsće (01.08.22)
Nowi započnu dźěłać
Njebjelčicy. Runja mnohim dalšim su dźensa tež w serbskich gmejnach znowa abo nowowuzwoleni wjesnjanosća dźěłać započeli. W Njebjelčicach je wot dźensnišeho André Bulank a we Worklecach Clemens Poldrack wjesnjanosta. Zdobom je Stefan Anders wot dźensnišeho nowy nawoda Zarjadniskeho zwjazka Při Klóšterskej wodźe. Wón naslěduje Měrka Domašku, kiž bě wot 2015 tam nawoda.
Dopokaz škita zakónčeny
Budyšin. Podlěšena doba za dopokaz šćěpjenja přećiwo wosypicam je nimo. Kaž Budyski strowotniski zarjad zdźěli, maja tajki sobudźěłaćerjo hladarnjow a tam přebywacy měć, dale přistajeni pěstowarnjow, šulow, medicinskich zarjadnišćow, hladarnjow kaž tež towaršnostnych zarjadnišćow a přebywanišćow. Dopokaz wo šćěpjenju pře wopicy předpołožić mějachu wšitcy po lěće 1970 narodźeni.
Połoženje dale napjate
Krótkopowěsće (29.07.22)
Kniharnju zaso wočinja
Budyšin. Po tydźenju zawrjenja Ludowe nakładnistwo Domowiny Smolerjec kniharnju póndźelu, 1. awgusta, zaso wotewrje, ale ze skrótšenymi wotewrjenskimi časami. Tak budźe Smolerjec kniharnja wšědnje wot 11 do 13 hodź. wočinjena. Dale wobsteji stajnje tež móžnosć sej twory pod skazać. Tež telefoniske skazanki tam pod 03591 577264 přiwozmu.
Bjezdźěłnosć lochce přiběrała
Budyšin. 16 345 ludźi je tuchwilu we wobłuku Budyskeje Agentury za dźěło bjez dźěła. To je 66 wjac hač w juniju. Wo tym informowaše dźensa dopołdnja jednaćelka Budyskeje dźěłoweje agentury Ilona Winge-Paul. Za přičinu wuwića maja w zarjedźe fakt, zo je tuchwilu tójšto młodostnych šulu abo wukubłanje zakónčiło a so najprjedy raz bjez dźěła přizjewiło. Kwota bjezdźěłnosće wučinja 6,0 procentow.
Dalše spěchowanje zaručene
Krótkopowěsće (28.07.22)
Dalši serbski digitalny poskitk
Budyšin. Software za widejowe konferency Jitsi Meet předleži nětko tež w hornjoserbšćinje. Wo to je so społnomócnjeny za digitalizaciju Załožby za serbski lud Daniel Zoba postarał, informuje załožba. Swobodny program Jitsi Meet dóstanjeće pod . Na delnjoserbskej warianće załožba dźěła.
Wustajeńca dale pućuje
Leer. Zhromadna wustajeńca wo štyrjoch mjeńšinach Němskeje – Danach, Frizach, Serbach a němskich Sintach a Romach – kaž tež wo delnjoněmčinu rěčacych „Was heißt hier Minderheit?“ je we wuchodofriziskim Leer hač do kónca awgusta přistupna. Přehladku je serbski wědomostnik Robert Lorenc kuratěrował. Dalše informacije dóstanu zajimcy pod .
Nowy slědźerski zwjazk
Krótkopowěsće (27.07.22)
Pomoc tež z Łužicy
Bad Schandau. 148 wobornikow je w narodnym parku Sakska Šwica rozšěrjenju lěsnych wohenjow zadźěwało. Mjez nimi su tež wjacori dobrowólni z Pančic-Kukowa a Ćiska, kiž su so wčera z Kamjenca na pomoc podali. Za město Bad Schandau su wčera nawječor katastrofowy alarm wukazali. W narodnym parku pali so tuchwilu lěs na płoninje něhdźe 250 hektarow.
Wjace hońtwjerkow w Sakskej
Drježdźany. Ličba sakskich hońtwjerkow je so w minjenych lětach nimale podwojiła. Kónc zašłeho lěta měješe wjace hač 1 200 žonow hońtwjerske wopismo, kaž jednaćel krajneho hońtwjerskeho zwjazka Martin Wißmann zdźěli. 2013 bě jich hišće 632. To wotpowěduje zwjazkowemu trendej. Podźěl hońtwjerkow je w Němskej wot lěta 2016 wot sydom na jednaće procentow přiběrał.
Celibat wučerkow zakónča
