Krótkopowěsće (14.06.22)
Wšitcy znowa nastupja
Budyšin. Wšitcy štyrjo kandidaća wo zastojnstwo noweho krajneho rady Budyšina Udo Wićaz (CDU), Alex Theile (zhromadny kandidat Lěwicy, SPD a Zwjazka 90/Zelenych), Tobias Jantsch (swobodny kandidat) a Frank Peschel (AfD) k wólbam 3. julija znowa nastupja. W Zhorjelskim wokrjesu porno tomu njeje hišće jasne, hač wšitcy kandidaća 3. julija znowa nastupja.
Wutwarja serwis na městnje
Drježdźany. Drježdźanska rjemjeslniska komora swój serwis na městnje dale wutwarja. Wotnětka móža so rjemjeslnicy tež w Sprjewinym Dole nastupajo podpěru swojich prašenjow dla wobhonić. Poskitk wopřija wobłuki dale-a wukubłanja, dawki, prawo, personalny management, wodźenje zawoda atd. Dwójce wob měsac su fachowcy w tamnišim kompetencnym centrumje docpějomne.
Dwurěčna zběrka wušła
Krótkopowěsće (13.06.22)
Tydźeń mjeńšinowych rěčow
Lipsk. Institut za sorabistiku Uniwersity Lipsk kaž tež towarstwo ERIU stej dźensa „Tydźeń europskich mjeńšinowych rěčow“ zahajiłoj. Hač do pjatka maja zajimcy móžnosć, so z čitanjemi, seminarami a koncertami ze šotiskej gelišćinu, ze serbšćinomaj, z kymrišćinu a iršćinu zeznajomić. Mjez druhim wuhotujetaj je „narodny poet Walizow“ Ifor ap Gyn a japanski sorabist prof. Goro Kimura w sociokulturnym centrumje Villa Leipzig.
Wjele zajimcow přišło
Lubij. Na tradicionalnych wukubłanskich wikach Insidertreff zawčerawšim w Lubiju witachu organizatorojo tysacow zajimcow. Wjac hač 130 wustajerjow je tam atraktiwne wukubłanske poskitki w domiznje předstajiło a wo dorost wabiło, při čimž bě lětuše ćežišćo strowotniski wobłuk.
Sudetscy Němcy w syći
Krótkopowěsće (10.06.22)
Bernda Langu wuznamjenili
Zhorjelc. Krajny rada Zhorjelskeho wokrjesa Bernd Lange (CDU) je we wobłuku jubilejneho zarjadowanja „30 lět Neisse-Nisa-Nysa“ minjenu wutoru wuznamjenjenje slěborny zasłužbowy křiž republiki Pólskeje dóstał. Z tym hódnoćeše prezident Andrzej Duda jeho angažement za wuwiće němsko-pólskich poćahow mjezy přesahowaceho regiona.
Myta Mazowieckeho spožčene
Zhrojelc/Zgorzelec. Ze swjatočnej ceremoniju su wčera na žurli Zhorjelskeho Gerharda Hauptmannoweho dźiwadła žurnalistiske myta Tadeusza Mazowieckeho spožčili. Mjez druhim přepoda sakski statny minister za zwjazkowe a europske naležnosće Oliver Schenk (CDU) wosebite myto „Žurnalizm w namjeznej kónčinje“ Bettinje Wobst za jeje reportažu wo Turówskej jamje.
Nimale wšudźe dwě rjadowni
Krótkopowěsće (09.06.22)
Twórby Zejlerja znowa wušli
Budyšin. „Ja sym wulki muzikanta na lik a na škorodej“ basnješe a spěwaše Handrij Zejler swojimaj dźowkomaj. Wuběr jeho basnjow za dźěći bě Ingrid Juršikowa 2004 pod titulom „Babka pčołka/Tante Biene“ w Ludowym nakładnistwje Domowina wudała. Wotnětka je druhi nakład na předań. Tekstam su přidate němske přełožki znatych spisowaćelow, kaž Jurja Brězana abo Kita Lorenca.
Chłostanske přizjewjenje
Budyšin. Alex Theile, kandidat Lěwicy, SPD a Zelenych za wólby Budyskeho krajneho rady, je předwčerawšim přećiwo wokrjesnemu radźićelej CDU Maikej Försterej chłostanske přizjewjenje přisłodźenja dla zapodał. Förster je pječa kandidata we Facebooku „lěwicarskeho ekstremista“ mjenował. Theile rěči wo komentarje hidy, kotryž sej lubić njeda. Wón je Försterej poskićił, zo so tón zamołwi.
Krosnowanje bórze herbstwo
Krótkopowěsće (08.06.22)
Dale jako zastojnikow přistajeć
Drježdźany. Pedagogow w Sakskej měli po lěće 2023 dale jako zastojnikow přistajeć. To poruča Berlinski poradźowanski zawod Interva w posudku, kotryž je Sakske kultusowe ministerstwo do nadawka dało. Njeslěduja-li poručenje, dyrbja z jasnje mjenje pedagogiskim dorostom ličić, rěka w spisu. Wot 2019 wučerki a wučerjow jako zastojnikow přistajeja, štož wunjese wo tójšto wjac pedagogow.
Kurs wo eficientnej mobiliće
Drježdźany. Sakska energijowa agentura SAENA tzwr poskića nowy bjezpłatny online-kurs „Eficienta mobilita“ za mjeńše a srjedźne předewzaća w Sakskej. Prěni kubłanski cyklus budźe 28. a 30. junija, 5. a 7. julija. Z přiběracym poskitkom elektriskich wozydłow na wikach zapřija je do flotow. Z toho prašenja nabiwanskeje infrastruktury wurostu. Tu chce kubłanje mjez druhim nawjazać.
Ukrainske mocy pomhaja
Krótkopowěsće (07.06.22)
Ramnow zastupuje wokrjes
Budyšin. Ramnow je dobyćer 11. wokrjesneho wubědźowanja „Naša wjes ma přichod“ a hornjołužiski zwjazk gmejnow přichodnje na krajnej runinje zastupuje. Kaž w dźensnišej zdźělence krajnoradneho zarjada Budyšin dale rěka, přizna wěcywustojna komisija Oberlichtenauwej druhe a Koćinje trěće městno. Nosaćicy/Jama (Nostitz/Grube) a Čerwjene Noslicy (Rothnaußlitz) dźěla sej štwórte městno.
Njewšědny wupad miliny
Praha. Něhdźe třećina čěskeje stolicy bě přez masiwny wupad miliny zańdźeny štwórtk rano potrjechena. Tole nastupaše zdobom syći metro a tramwajkow. Dźesatki ludźi su w liftach tčacy wostali. „Blackout“ tajkeho rozměra njedožiwi Praha hižo 20 lět – wot katastrofalnych přepławjenjow w lěće 2002.
Za tezu „žiwjenja ze swětnišća“
Krótkopowěsće (03.06.22)
Drohoćinku „wróćo zdobyli“
Budyšin. Dźakowano spěchowanju Swobodneho stata Sakskeje a Kulturneje załožby Sakskeje kaž tež darom priwatnikow zamó Muzej Budyšin awkciju dobyć a wuznamny kapsny časnik „Tourbillon čo. 41 000“ kupić. Drohoćinka, zhotowjena w zawodźe Lange & Söhne, bě něhdy we wobsydstwje Otta Weiganga a je so po Druhej swětowej wójnje zhubiła. Přichodnje hodźi so „mišterska twórba“ w trajnej wustajeńcy muzeja wobdźiwać.
50 projektow wuzwolenych
Drježdźany. Sakske statne ministerstwo za kulturu a turizm je cyłkownje 50 namjetam wubědźowanja „Sachsen geht weiter“ spěchowanje po 5 000 eurach přizwoliło. Hač do oktobra maja zapodawacy, mjez druhim Wojerowska Kulturna fabrika a łužiski festiwal „Přińć a woteńć“, chwile, swoje projekty dale wuwiwać.
„Čorna scena“ so schadźuje
Krótkopowěsće (02.06.22)
Přewodnik wotnětka tež čěsce
Budyšin. Šulerki a šulerjo z Libereca kaž tež z Worklec a Budyšina su dźensa dopołdnja nowy čěskorěčny awdijoguide trajneje wustajeńcy Budyskeho Serbskeho muzeja wuspytali. Wudospołnjeny poskitk muzeja dožiwi tak swoju zjawnu premjeru. Mjez šulerjemi z Čěskeje běštej holcy, kotrejž stej za elektroniski přewodnik powěsćowymaj figuromaj swój hłós spožčiłoj.
Krabata bosy sej wotkryć
Čorny Chołmc. Krabatowy młyn w Čornym Chołmcu hodźi so wotnětka tež bosy pěškujo wotkrywać. Wotpowědna wosebita šćežka, zhotowjena mjez druhim z pěska a gumijowych elementow, bu wčera zjawnosći spřistupnjena. Areal wobhospodarjace towarstwo Krabatowy młyn mjenuje nowostku „magnet za woči“ a chce ju do swojeho pedagogiskeho poskitka za dźěći zapřijeć.
Čakaja na „cyle nowe dohlady“
Krótkopowěsće (01.06.22)
Serbske medije tematizowali
Budyšin. We wobłuku dwudnowskeho workshopa Němskeho žurnalistiskeho zwjazka (DVJ) wo žurnalizmje w zadnim kraju wěnowaše so diskusijne koło dźensa dopołdnja dźěławosći serbskich medijow. Zarjadowanje wotmě so na wulkej žurli Budyskeho krajnoradneho zarjada. Wčera bě tudyši znaty fotograf Rolf Dvoracek wobdźělnikam přednošował.
Kocorowa biografija w němčinje
Budyšin. Publicistka Chrysta Měškankowa je dotal jeničku biografiju wo Korli Awgusće Kocoru z pjera Zbigniewa Kościówa, wudata lěta 1972 w Ludowym nakładnistwje Domowina, do němčiny přełožiła. Knižna premjera budźe njedźelu, 12. junija, na žurli Budyskeho Serbskeho muzeja. Nimo awtora a přełožowarki porěčitaj Měrko Šołta a wudawaćel noweje publikacije Matthias Donath. Serbski ludowy ansambl zarjadowanje z twórbami Kocora hudźbnje wobrubi.
Wuznamjenja čestnohamtskich
Krótkopowěsće (31.05.22)
Kultura a turizm stej přichod
Zhorjelc. We wobłuku zhromadneho rjadu zarjadowanjow Krajneho turistiskeho zwjazka Sakskeje a sakskeho ministerstwa za kulturu a turizm „Dialog hosćićelow“ wčera w Zhorjelcu podšmórny ministerka Barbara Klepsch (CDU) „postajowacu rólu kultury a turizma runje za Łužicu“ w zwisku ze strukturnej změnu. Tak nałožuje ministerstwo na přikład cyłkownje 400 000 eurow za marketing UNESCO-herbstwa Mužakowski park.
Wuznamny hłós woćichnył
Triest. Boris Pahor je njeboh. Přisłušnik słowjenskeje mjeńšiny w Italskej zemrě wčera 108lětny w swojim ródnym měsće Triest. Pahor słuša k najwuznamnišim zastupjerjam přitomnostneje słowjenskeje literatury. Jeho najznaćiše knihi su „Spopad s pomladjo“, „Mesto v zalivu“ a roman „Nekropolis“, wotbłyšćowacy jatbu awtora we wjacorych kacetach za čas Druheje swětoweje wójny.
Incidenca w Sakskej pod sto
