Krótkopowěsće (11.03.22)

Freitag, 11. März 2022 geschrieben von:

Natyknjenja přiběraja

Budyšin. W Budyskim wokrjesu ličba natyknjenjow z koronawirusom dale ­přiběra. Wčera zwěsćichu tu 1 392 nowych padow, jedna wosoba je zemrěła. Incidenca po Roberta Kochowym instituće wučinja 1 435,5, we wokrjesu Zhorjelc 1 111,1. W susodnym wokrjesu rozprawjachu wčera wo 544 infekcijach, mjez nimi 120 dźěći, a wo dwěmaj smjertnymaj padomaj z časa wot 22. a 27. februara.

Krabat w Berlinskim HAU

Berlin. Němski kruch „Čorny młyn“ po knize Jurja Brězana předstajeja w swobo­dnym Berlinskim dźiwadle Hebbel am Ufer (HAU). Performance kolektiwa Showcase Beat Le Mot za přihladowarjow wot dwanaće lět skići wosebite dožiwjenje w křini, jěducej po čornym młynje. Barbara Morgenstern, Mike Majkowski a Viola Bornmann staraja so wo hudźbu. Wu­spěšna premjera bě 1. měrca.

SSW ze štyrjomi procentami

Krótkopowěsće (10.03.22)

Donnerstag, 10. März 2022 geschrieben von:

Zhromadźizna hač do junija

Budyšin. Hač do 7. junija dyrbi Domowina wurjadnu hłownu zhromadźiznu přewjesć. Na to je so prezidij třěšneho zwjazka wčera dojednał. Na „hłownej“ chcedźa loni w Slepom wobzamknjene změny wustawkow po pokiwach Drježdźanskeho hamtskeho sudnistwa přiměrić, a je znowa wobzamknyć. Sudnistwo njebě jednu změnu wustawkow připó­znało. Dotal su sej šěsć župow a dalše towarstwa hłownu zhromadźiznu žadali.

Za hybridno-elektriske ćěrjenje

Choćebuz. Lětarstwo chce z widom na změnu klimy z wuwićom hybridno-elektriskich ćěrjenjow wustork parnišćowych płunow pomjeńšić. Za to je Němski centrum za lětarstwo a swětnišćowe lětarstwo dźensa na stejnišću w Choćebuzu nowy institut za elektrifikowane ćěrjenje lětarstwa wotewrěł. Dotal dźěła tam 23 ludźi, předwidźanych je raz 150.

Ličba natyknjenych dźěći přiběra

Krótkopowěsće (09.03.22)

Mittwoch, 09. März 2022 geschrieben von:

Rada wójnu na Ukrainje zasudźa

Podstupim. Braniborska Rada za naležnosći Serbow wójnu Ruskeje na Ukrainje zasudźa. Na swojim wčera­wšim internetnym posedźenju schwalichu rezoluciju, w kotrejž rěka: „W zmysle měrniweho zhromadneho žiwjenja w Europje apelujemy wójnu hnydom skónčić, so k jednanjam wróćić a nańć rozrisanje za wobaj słowjanskej ludaj.“

Incidenca lědma změnjena

Budyšin. Niwow incidency w Hornjej Łužicy je lědma změnjeny. Roberta Kochowy institut poda dźensa za Budyski wo­krjes hódnotu 1 161,4, za Zhorjelski 869,3. Wokrjes Budyšin informowaše wčera wo 408 natyknjenjach z koronawirusom. Mjez 724 nowonatyknjenymi we wokrjesu Zhorjelc je 150 dźěći. Ličba w hornjołužiskich chorownjach lěkowanych schorjenych powjetši so na 182.

Pomoc ćěkancam na A4

Krótkopowěsće (08.03.22)

Dienstag, 08. März 2022 geschrieben von:

Maćicarjo wójny dla poraženi

Budyšin. Swoju poraženosć wo nadpadźe Ruskeje na Ukrainu je předsydstwo Maćicy Serbskeje na swojim wčerawšim posedźenju zwurazniło. „Naše mysle su wosebje pola našich kolegow a koleginow w Lwowje, z kotrymiž wudźeržuje Maćica Serbska hižo lětdźesatki wuske kontakty. Nadźijamy so bórzomneho nawróta na puć diplomatije, zo by so wójna tak spěšnje kaž móžno skónčiła“, rěka w nowinskej informaciji.

Nowy poskitk zahajeny

Přiwćicy. Michał Cyž je wčera na prěnim zetkanju Serbskeho medijoweho kluba w Přiwćicach (Preititz) zajimcam wjacore serbske digitalne poskitki předstajił. Nimo přełožowanskeho programa sotra pokaza wón tež na někotre knihi ze słuchopisakom a app Towaršneho spěwnika, kotrež su w Ludowym nakładni­stwje Domowina wušli. Zetkanja chcedźa hač do kónca apryla stajnje póndźelu wot 17 hodź. přewjedować.

Incidenca zaso spadowaca

Krótkopowěsće (07.03.22)

Montag, 07. März 2022 geschrieben von:

Pomoc njezlemjena

Budyšin/Wojerecy/Kamjenc. Pomoc ukrainskim ćěkancam we Łužicy je nje­zlemjena. Nimo priwatnych akcijow přijimuja tež we Wojerowskim wobydlerskim centrumje pomocne poskitki. Tamniše bydlenjotwarske drustwo je 30 bydlenjow spřihotowało, w Ćisku maja nuzowe bydlenja za něhdźe sydom swójbow, w Kamjencu je dźesać bydlenjow. W Budyšinje su sportownju na Třělnišću za přebytk ćěkancow zarjadowali.

Šmajdźina wuznamjenjena

Hamburg. Gabrielu Mariju Šmajdźinu su minjeny pjatk w Hamburgskim Thalia-dźiwadle z Tilla-Durieux-koljejom wuznamjenili. Serbska dźiwadźelnica přewza jón wot Judith Hofmann. Šmajdźina smě wuznamnu debjenku přichodne dźesać lět nosyć, tak kaž bě to dźiwadźelnica Tilly Durieux 1967 postajiła. Zo dóstanje koljej rodźena Budyšanka, su minjeny měsac rozsudźili.

Incidenca znowa rozdźělna

Krótkopowěsće (04.03.22)

Freitag, 04. März 2022 geschrieben von:

Incidenca bjez jasneho trenda

Budyšin. Horje a dele dźe z incidencu w Hornjej Łužicy. Roberta Kochowy institut podawa dźensa znowa zwyšenej hódnoće, za Budyski wokrjes 1 347,3 a za Zhorjelski 929,1. Wokrjes Budyšin je wčera wo 991 natyknjenjach z koronawirusom informował, wokrjes Zhorjelc wo 509. Tam mjenowachu zdobom dalši smjertny pad z 23. februara. We woběmaj wokrjesomaj lěkuja dohromady 185 korona-pacientow w chorowni.

Pomocne projekty za Ukrainu

Praha. Reagujo na wójnu w Ukrainje přewostaja Němsko-čěski fonds spěchowanske pjenjezy za pomocne projekty. Tele dny je „zhromadne skutkowanje ciwilnych towaršnosćow přez mjezy“ wosebje wažne, zdźěli rěčnica wčera w Praze. Wšitke projekty, kotrež Němsko-čěski fonds spěchuje, kóždy z maksimalnje 4 000 ­eurami, maja zaměr, horjo w nadpadnym kraju pomjeńšić.

Ruska a ukrainscy rjekojo

Krótkopowěsće (03.03.22)

Donnerstag, 03. März 2022 geschrieben von:

Znamjo za měr stajili

Budyšin. Něhdźe sto ludźi je wčera w Budyšinje znamjo za měr stajiło. Město politiskeje popjelneje srjedy wotmě Lěwica měrowu manifesticiju na Hłownym torhošću. Kónc Putinoweje wójny přećiwo Ukrainje žadachu sej mjez druhim wokrjesny předsyda Lěwicy Silvio Lang, zhromadny kandidat Lěwicy, SPD a Zelenych za wólby krajneho rady Alex Theile a Budyski wyši měšćanosta Alexander Ahrens (SPD).

Mikroplastika na dnje jězora

Lipsk/Budyšin. Wědomostnicy Lipšćanskeho centruma Helmholtz za wobswětowe slědźenja su na dnje Budyskeho a Kwětanečanskeho spjateho jězora małuške plastikowe kuski našli. Předewšěm z polyetylena a polypropylena wobstejacu mikroplastiku wužiwaja za zhotowjenje wotpadkowych blešow a zawalenskeho materiala. Kak so wona na ekosystemy wuskutkuje, hišće jasne njeje.

Niwow natyknjenjow njezměnjeny

Krótkopowěsće (02.03.22)

Mittwoch, 02. März 2022 geschrieben von:

Mjenje bjezdźěłnych w regionje

Budyšin. We wuchodnej Sakskej bě ­minjeny měsac 17 824 bjezdźěłnych, 105 wosobow mjenje hač w januarje. Aktualna kwota bjezdźěłnosće je 6,4 procenty, kaž Budyska wotnožka Zwjazkoweje agentury za dźěło zdźěli. Byrnjež ličba přizjewjenych swobodnych dźěłowych městnow wulka była, so poskitk a naprašowanje stajnje hromadu njehodźitej.

Wšelakej trendaj incidency

Budyšin. Incidenca po Roberta Kochowym instituće je w Budyskim wokrjesu na 1 377,1 postupiła a w Zhorjelskim na 805,8 woteběrała. Wokrjes Budyšin rozprawješe wčera wo 430 natyknjenjach z koronawirusom a wo jednym dalšim smjertnym padźe. Ličbu 371 infekcijow po­dachu za wokrjes Zhorjelc.

Pomoc dale wulka

Krótkopowěsće (01.03.22)

Dienstag, 01. März 2022 geschrieben von:

Serbski hiphop z nowinkami

Chasow. Hiphopowa skupina Nowa Doba chce tele dny nowy spěw „Serbska lyrika“ na wjacorych hudźbnych platformach, kaž stej to na přikład Spotify abo Apple Music, wozjewić. Titul je zdobom prěnja pokazka na přichodnje digitalnje wuchadźacu EP „Budyski Bounce“, wopřijacu dalše tři, po zdźělenju wuměłcow subžanru trap přisłušace pěsnje.

Incidenca woteběrała

Budyšin. Wo 1 064 natyknjenjach z koronawirusom a dwěmaj zemrětymaj pacientomaj wot minjeneho pjatka informowaše wčera Budyski wokrjes. W samsnym času zwěsćichu we wokrjesu Zhorjelc 778 infekcijow a pjeć dalšich smjertnych padow za dobu wot 14. do 22. februara. Po RKI je incidenca zaso woteběrała, wona wučinja 1 215,4 w Budyskim wokrjesu a 876,4 w Zhorjelskim.

Wolyńscy Češa wohroženi

Krótkopowěsće (28.02.22)

Montag, 28. Februar 2022 geschrieben von:

Incidenca zaso přiběraca

Budyšin. Po mjeńšej incidency minjeny tydźeń je hódnota po Roberta Kochowym instituće zaso přiběraca, w Budyskim wokrjesu wučinja wona dźensa 1 309,7 a w Zhorjelskim 1 025,7. Minjeny pjatk rozprawješe wokrjes Budyšin wo 624 zwěsćenych natyknjenjach z koronawirusom, wokrjes Zhorjelc poda 556 infekcijow. Kaž hornjołužiskej wokrjesaj dale zdźělištej, lěkuja dohromady 141 na koronu schorjenych w chorownjach.

Lózy hólcy w „homeofficu“

Nuknica. Lózy hólcy su dźensa swój najnowši spěw „Homeoffice“ na platformje YouTube wozjewili. Wosebity hósć a hłowny wokalist je rapper Krazy Kocor. Ze šibałym widejom, kotryž je sej dwě hodźinje po prěnjej prezentaciji hižo wjace hač sto zajimcow wobhladało, Lózy hólcy wšědny dźeń w pandemiji satirisce rozjimuja. Pytajće na mjenowanej internetnej stronje pod mjenom skupiny.

Jězbne plany znowa změnili

Neuheiten LND