Krótkopowěsće (11.11.21)
„Eksponencielny rozrost“
Budyšin/Zhorjelc. Wokrjes Budyšin informuje, zo mnóstwo natyknjenjow z koronawirusom „eksponencielnje přiběra“. Wčera zwěsćichu 853 nowoinfekcijow, incidenca tu je po Roberta Kochowym instituće 769,1. W Zhorjelskim wokrjesu zličichu 466 dalšich natyknjenjow a tři smjertne pady. Incidenca tam wučinja aktualnje 533,6.
Astronawća skónčnje wotlećeli
Cape Canaveral. Po wjacekróć špatneho wjedra dla přesunjenym terminje je ISS-ekspedicija 66 zaběžała. Dźensa rano wotleća raketa typa Falcon 9 ze swětnišćowej łódźu Crew Dragon z Floridy. Mjez astronawtami, kotřiž wotnětka poł lěta na swětnišćowej staciji ISS přebywaja, je tež Němc Matthias Maurer.
Modelowy koncept pře koronu
Krótkopowěsće (10.11.21)
Rozdźělne wuwiće
Budyšin/Zhorjelc. Incidenca w Budyskim a Zhorjelskim wokrjesu so rozdźělnje wuwiwa. Po RKI je wona w Budyskim dźensa na 648 lochce postupiła, w Zhorjelskim wokrjesu pak na 468,6 spadnyła. W Budyskim wokrjesu zwěsćichu 440 natyknjenjow, 102 pacientaj staj w chorowni. Wokrjes Zhorjelc informuje wo 123 nowoinfekcijach, 133 wosobow lěkuja w chorownjach, 13 z nich intensiwnje.
Dóstanjetaj myto w Oslu
Stockholm. Lawreatow Měroweho Nobeloweho myta Mariju Ressa a Dmitrija Muratowa su najebać koronu na wosobinske počesćenje do Osla přeprosyli. Žurnalistaj z Filipinow a Ruskeje dóstanjetaj myto 10. decembra, kaž załožba Nobeloweho myta dźensa zdźěli. Wšitcy dalši pak přijimuja počesćenja w swojim kraju.
Walter Niklaus njeboh
Krótkopowěsće (09.11.21)
Wjace stacionarnych pacientow
Budyšin/Zhorjelc. „Štwórta žołma“ koronapandemije wuskutkuje dźeń a wjace natyknjenjow. Incidenca w Budyskim wokrjesu je po Roberta Kochowym instituće (RKI) dźensa 645,3. Tuchwilu 99 pacientow stacionarnje (+14) lěkuja, dwaj staj zemrěłoj. W Zhorjelskim wokrjesu wučinja incidenca po RKI aktualnje 581,1. Tam so w chorownjach wo 119 pacientow (+27) staraja.
Rěča wo folkloriadźe
Budapest. Mjezynarodna organizacija za přewjedźenje folklornych festiwalow (CIOFF) je jubilejny 50. kongres zahajiła. W Budapesće rozjimuje hač do pjatka dohromady 145 wobdźělnikow z 49 čłonskich krajow mjez druhim nutřkowne naležnosće organizacije a chartu za dźěćacu folkloriadu, kaž jednaćel Domowiny a serbski delegat Marko Kowar zdźěli.
Pruwuja 66 projektowych idejow
Krótkopowěsće (08.11.21)
Incidenca dale wysoka
Budyšin/Zhorjelc. Incidenca we wokrjesu Budyšin njeje so přez kónc tydźenja změniła a je po informacijach RKI dale na wysokim stawje 487,2. W Budyskim wokrjesu tučasnje 85 schorjenych w chorowni lěkuja. W Zhorjelskim, hdźež je incidenca na 590,3 postupiła, so wo 92 pacientow stacionarnje staraja.
Zaso w předsydstwje MENS
Lorient. Młodźinske towarstwo Pawk je po nimale lěće zaso w předsydstwje Młodźiny europskich narodnych mjeńšin (MENS) zastupjene. Kaž Pawk zdźěli, buštaj Krystof Grofa a Felicia Touvenotec sobotu na wurjadnej hłownej zhromadźiznje MENS w Lorienće do gremija wuzwolenaj. Grofa je městopředsyda za eksterne naležnosće, Touvenotec nawjeduje dźěłowu skupinu Member Integration.
„Meja“ jako wumolowanka
Krótkopowěsće (05.11.21)
Incidenca dale raznje přiběra
Budyšin/Zhorjelc. Incidenca we wokrjesomaj Budyšin a Zhorjelc dale raznje přiběra. Za Budyski zdźěli RKI dźensa ze 487,2 plus 60,3. W Zhorjelskim je incidenca wo 125,3 na 501,7 postupiła. Hač do wčerawšeho zličichu w Budyskim wokrjesu 327 nowych infekcijow, 87 ludźi stacionarnje hladaja. Wokrjes Zhorjelc zdźěli wčera 473 nowych infekcijow, 98 ludźi tam w chorownjach zastaruja.
Dóstanjetaj wysoke počesćenje
Budyšin/Berlin. Serba Bjarnat Cyža a Saterskeho Frizu Karla-Petera Schramma počesća za wjelelětny angažement za narodne mjeńšiny ze Zwjazkowym zasłužbowym křižom Němskeje. To zdźěli dźensa Mjeńšinowy sekretariat w Berlinje. Počesćenje chce jimaj zwjazkowy minister za nutřkowne naležnosće Horst Seehofer (CSU) přichodny tydźeń přepodać.
Nowy album skupiny Abba
Krótkopowěsće (04.11.21)
Dalše smjertne pady
Budyšin/Zhorjelc. Štyri dalše wosoby su w Zhorjelskim wokrjesu w zwisku z koronawirusom zemrěli, 343 nowonatyknjenych su wčera tu zwěsćili. Incidenca zwyši so po dźensnišej informaciji RKI na 376,4. Tež w Budyskim wokrjesu bě wčera nowy smjertny pad. Dohromady bě tu wčera 653 nowoinfekcijow, RKI poda dźensa incidencu 429,9. Wokrjes Budyšin steji na 15. městnje němskich městow z najwjetšej incidencu.
Kulturne spěchowanje EU
Bonn. Na wobnowjenej internetnej stronje „Europa fördert Kultur“ móža so zajimcy wo třinaće spěchowanskich programach Europskeje unije informować, kotrež tež kulturne projekty podpěraja. Kontaktowe městno za němske zarjadnišća je „Creative Europe Desk KULTUR“ (CED KULTUR) w Bonnje, kotrež próstwustajerkam a -stajerjam pomoc skići.
Dwě hodźinje wo Serbach
Heusweiler. Pod hesłom „Witajće k nam! Zu Besuch in der Lausitz“ je tuchwilu dlěje hač dwě hodźinje trajacy podcast na internetnej stronje přistupny. Stawizny Serbow powěda tam Feliks Ričel. Je to 130. wudaće podcasta w zamołwitosći Nicka Kaßnera z Heusweilera (Posarska).
Krótkopowěsće (03.11.21)
Incidenca dale dosć wysoka
Budyšin. Z wčera w Budyskim wokrjesu wozjewjenymi 87 natyknjenjemi z koronawirusom je so tu dźensa wot RKI podata incidenca na 305,4 zwyšiła. Wot 1 844 schorjenych lěkuja 67 w klinice. We wokrjesu Zhorjelc rozprawjachu wčera wo 164 dalšich infekcijach, 84 wosobow korony dla w chorowni zastaruja. Indicenca tam je po RKI dźensa 294,5.
Podróšenja lětsa kaž 2008
Kamjenc. W prěnich dźewjeć měsacach lěta dyrbjachu sakscy přetrjebarjo zdźěla sylnje zwyšene płaćizny akceptować. Rata lětneho podróšenja mjez januarom a septembrom bě přerěznje 2,4 procenty nad niwowom samsneje doby loni, kaž Statistiski krajny zarjad dźensa w Kamjencu zdźěli. Wyša inflaciska rata za prěnje dźewjeć měsacow bě naposledk w lětomaj 2007 a 2008 z 2,6 proc.
Słowjanska cyrkej w Awstriskej
Krótkopowěsće (02.11.21)
Wićaz sej bjezpłatne testy žada
Budyšin. Zastupowacy Budyski krajny rada Udo Wićaz (CDU) je sej dźensa bjezpłatne koronatesty žadał, zo móhli testowanje zaso rozšěrić. Budyski wokrjes je wčera wo 284 natyknjenjach z koronawirusom a jednym smjertnym padźe wot minjeneho pjatka informował. Incidenca po RKI je tu dźensa 278,5, we wokrjesu Zhorjelc je 304,9. Tam rozprawjachu wčera wo 261 infekcijach wot pjatka.
Kopor wudobywać we Łužicy
Grodk. Předewzaće Łužiski koporowy šćěpjel tzwr nawjazuje na swoje lěta 2018 přetorhnjene přihoty za wudobywanje kopora pola Syjka (Graustein). Klětu chce wotpowědnu próstwu zapodać zhromadnemu krajnemu planowanju Berlin-Braniborska w ministerstwje za infrastrukturu a ratarstwo, rjeknyštaj zamołwitaj projektnaj manageraj Ralph Baumann a Blas Urioste w Grodku.
Ćěriwowy „turizm“
Krótkopowěsće (01.11.21)
Incidenca dźensa jasnje nad 300
Budyšin. Natyknjenja z koronawirusom sylnje přiběraja. Za Budyski wokrjes je Roberta Kochowy institut dźensa incidencu 341,6 podał (minjeny pjatk bě ta 280,9), za Zhorjelski 376,8. Njejapkeho rozrosta infekcijow z koronawirusom dla je Budyski krajnoradny zarjad minjeny pjatk 60 přistajenych z druhich wobłukow přerjadował, zo bychu kontakty z koronu inficěrowanych sobu zwěsćili.
Z hosćom w „Studiosession“
Halle. Ze swojim debitnym albumom w němskej rěči „Riech an Blumen (und merk dir ihre Namen)“, bě Milan Grojlich alias Rokotak předwčerawšim z hosćom we wusyłanju „Studiosession“ sćelaka MDR kultura. W rozmołwje z Janom Kubonom powědaše 46lětny wo swojim hudźbnym tworjenju a rozłoži woznam serbskeho ptačeho mjena rokotak, kotrež bě sej jako pseudonym wuzwolił.
Mlokowa produkcija wuběži
Krótkopowěsće (29.10.21)
Incidenca bliži so hódnoće 300
Budyšin. Incidenca po Roberta Kochowym instituće je dźensa w Budyskim wokrjesu 280,9. Tam rozprawjachu wčera wo 157 natyknjenjach z koronawirusom. Na tysac wobydlerjow wobličene stejitej gmejnje Worklecy a Kubšicy ze 17 potrjechenymi na čole. We wokrjesu Zhorjelc informowachu wčera wo 135 infekcijach a dalšim smjertnym padźe ze 6. oktobra. Incidenca po RKI je tam dźensa 279,8.
Firmy pytaja fachowcow
Budyšin. We wuchodnej Sakskej bě w oktobrje 16 527 bjezdźěłnych, to je 547 resp. 3,2 proc. mjenje hač w awgusće. Změna porno lońšemu oktobrej je ta, zo je ličba bjezdźěłnych wo 1 356 resp. 7,6 proc. woteběrała, kaž Budyska wotnožka agentury za dźěło wčera informowaše. Rozsudne za aktualne połoženje je wulka potrjeba předewzaćow za fachowcami, agenturje předleži 5 500 jobow.
Myto za ciwilnu kuražu
