Krótkopowěsće (22.07.22)
Wodu čěrać zakazane
Choćebuz/Baršć. Wot dźensa je we wokrjesu Sprjewja Nysa a w měsće Choćebuz zakazane, wodu ze zjawnych wodźiznow čěrać abo klumpać. Za přičinu mjenujetej wobě komunje měsacy trajace napjate połoženje suchoty a horcoty dla, čehoždla pobrachuje předewšěm w Sprjewi woda. Wokrjes Zhorjelc je zakaz hižo w měrcu wukazał, w Budyskim wokrjesu płaći wón hižo z lěta 2019.
Natwarja masiwny škitny płót
Zły Komorow. Wokrjes Hornje Błóta-Łužica planuje podłu swojeje južneje mjezy natwarić masiwny škitny płót. Za přičinu naprawy mjenuje tamniši krajnoradny zarjad w nowinskej zdźělence škit před afriskej swinjacej mrětwu. Płót ma z Großkmehlena přez Košynu (Großkoschen) a Zły Komorow hač do Lěskeje (Lieske) sahać. Přidatnje wuhotuja jón z wóń wuprudźacymi markěrowanjemi, kiž dźiwje swinje zešerja.
Planuja loreto ponowić
Krótkopowěsće (21.07.22)
Jenny Erpenbeck wuznamjenili
Neubrandenburg/Berlin. Za roman „Kairos“ su spisowaćelce Jenny Erpenbeck Literarne myto Uwe Johnsona přiznali. Z 20 000 eurami dotěrowane myto chcedźa 55lětnej 23. septembra w Berlinje přepodać, zdźěli Mecklenburgska literarna towaršnosć. Roman „Kairos“ wobjednawa na zakładźe lubosćinskeje stawizny towaršnostnu změnu wot poslednjeje fazy NDR 1986.
Nowela zakonja
Drježdźany. Sakska přihotuje tuchwilu nowy wysokošulski zakoń. Po prěnim čitanju je jón sakske knježerstwo do zjawneje diskusije dało. Z nowym zakonjom chcedźa prawo wysokich šulow centralnje wuwiwać. Prěni króć jewi so w nim prawo wutworić zastupnistwo zajimow za doktorandki a doktorandow. Hač do nazymy móža zastupjerjo zajimcow swoje stejišća k noweli wotedać. Na jich zakładźe kabinet dalše słyšenje přihotuje.
Dźělne wolóženje za Čěsku
Krótkopowěsće (20.07.22)
Program za brunicowe regiony
Drježdźany. Sakski kabinet je nowy program EU za strukturnu změnu w brunicowych regionach z mjenom Just Transition Fund wobzamknył. Z tym steji tam přichodnje 645 milionow eurow k dispoziciji, zdźěli wčera sakske hospodarske ministerstwo. Lěpšinu z programa w Sakskej maja wokrjesy Budyšin, Zhorjelc, Lipsk a Sewjerna Sakska.
Projekty wobkrućene
Podstupim. Hladajo na strukturnu změnu we Łužicy je w Braniborskej dotal 112 projektow spěchowanja kmanych. 55 z nich su naprawy Zwjazka, tamnych 57 je ze stron Braniborskeje, zdźěli nětko statna kenclija w Podstupimje a wotmołwi z tym naprašowanje frakcije Lěwicy Krajneho sejma Braniborskeje. Za dalšich 15 projektow su financy zaručene.
Wopomnišćo za Geralda Stonea
Krótkopowěsće (19.07.22)
Harig měsac připójsnył
Budyšin. Najebać swoje oficialne rozžohnowanje Budyski krajny rada Michael Harig (CDU) hač do 31. awgusta w zastojnstwje wostanje. To zwisuje z tym, zo kónči so doba znapřećiwjenja přećiwo wólbnemu wuslědkej 21. julija. Tež hdyž tajke njejsu, dyrbi krajna direkcija jako prawniski dohlad podłožki pruwować a wólby wobkrućić. Njewuchadźeja z toho, zo budźe to hišće w juliju, bě wčera na posedźenju wokrjesneho sejmika zhonić.
Rozdźělne wuwiće
Budyšin/Zhorjelc. Incidencne hódnoty so we wokrjesomaj Budyšin a Zhorjelc rozdźělnje wuwiwatej. Po podaćach Roberta Kochoweho instituta je hódnota w Budyskim wokrjesu wo 38 na 396,0 přiběrała, w Zhorjelskim je wona wo 17 na 271 spadnyła. W Budyskim wokrjesu wothladuja po RKI dwě wosobje na intensiwnej staciji, w Zhorjelskim žanu.
Myta „Hra lěta“ přepodali
Krótkopowěsće (18.07.22)
SLA z nowym dirigentom
Budyšin. Georgios Balatsinos nastupi ze zazběhom hrajneje doby 2022/2023 zastojnstwo šefdirigenta orchestra Serbskeho ludoweho ansambla. Wulce wuznamjenjeny Grjek, dotal skutkowacy mjez druhim za Berlinskich sinfonikarjow a Athensku narodnu operu, bu wot wjednistwa kaž tež hudźbnikow SLA nimale jednohłósnje wuzwoleny. Powabiło bě so dohromady 40 kandidatow.
Twarske dźěła zahajili
Niska. Twarskich naprawow dla wot dźensnišeho ćahi mjez Zhorjelcom a Niskej njejězdźa. Narunanski jězbny plan je přihotowany a je na internetnej stronje železniskeho předewzaća Odeg wozjewjeny kaž tež w busach a ćahach wupołoženy, wottam rěka. Twarske naprawy su hač do 23. septembra planowane.
Česćuja załožerja genetiki
Krótkopowěsće (15.07.22)
Michaela Hariga rozžohnowali
Budyšin. W Budyskim krajnoradnym zarjedźe su wjelelětneho krajneho radu Michaela Hariga (CDU) dźensa oficialnje ze zastojnstwa rozžohnowali. Při tutej składnosći přepoda jemu Wolfgang Zender, jednaćel Wuchodoněmskeho zwjazka nalutorwarnje, Medalju dr. Johanna Christiana Eberle. Z tym připóznaja zasłužby Hariga wo wuwiće Budyskeje lutowarnje a lutowarnistwa w regionje.
Ličba mortwych porodow přiběra
Wiesbaden. Nimale kóžde 230. dźěćo w Němskej so mortwje narodźi. Po niskim stawje 2007 kwota tendencielnje zaso přiběra, kaž dźensa Statistiski zwjazkowy zarjad we Wiesbadenje zdźěla. Loni narodźi so w zwjazkowej republice 3 420 dźěći mortwych, štož wotpowěduje 4,3 mortwych porodow na 1 000 narodźenych. Jedna z přičin je stupaca staroba maćerjow.
Wopomnišćo město kormjernje
Krótkopowěsće (14.07.22)
Zawostajenstwo online
Budyšin. Serbski institut informuje, zo je wotnětka z digitalizowanym zawostajenstwom Kita Šwjele a Bogumiła Šwjele wažny wobstatk serbskeho kulturneho namrěwstwa online přistupny, na přikład na portalu SI SORABICON. Prezentacija dokumentow z wobrazami, metadatami a přidatnymi informacijemi je wuslědk digitalizaciskeho projekta Serbskeho kulturneho archiwa, spěchowaneho wot Němskeho slědźerskeho zwjazka.
Serbske wustawki změnjene
Radwor. Na swojim wčerawšim posedźenju su čłonojo Radworskeje gmejnskeje rady wustawki wo spěchowanju serbskeje rěče a kultury změnili. Jednaše so wo wotrězk, kotryž postaja tamnišu Domowinsku skupinu za partnera gmejny w serbskich naležnosćach. Wotnětka smědźa so tež druzy za čestnohamtske dźěło społnomócnjeneho za serbske naležnosće pola gmejny přizjewić. Wšitke druhe wotrězki wostanu njezměnjene.
Bohačík změni do Němskeje
Krótkopowěsće (13.07.22)
Swoju poziciju wobkrućili
Wojerecy. Předsydstwo župy „Handrij Zejler“ je wčera na swojim doprózdninskim posedźenju we Wojerecach poziciju wobkrućiło, zo njeměli žane wuwzaća być, kotrež bychu zjawnosć hłownych zhromadźiznow Domowiny wobmjezowali. Gremij bě wurjadnu hłownu zhromadźiznu třěšneho zwjazka 3. junija w Choćebuzu wuhódnoćił, hdźež wjetšina delegatow wotpowědny namjet župy za změnu wustawkow sćěhowała njebě.
Pawołska šula mytowana
Drježdźany. Rakečanska Ewangelska Pawołska šula słuša z projektom „Pawołska šula sej historisku biblioteku w Rakečanskej ewangelskej cyrkwi wotkrywa“ k dohromady 26 lawreatam krajneho programa „Pegasus – šule pomniki adoptuja“ za šulske lěto 2022/2023 a změje za to premiju. Wo tym je sakske kultusowe ministerstwo wčera informowało.
Wobornicy w zymowej komorje
Krótkopowěsće (12.07.22)
Wuspěšny spěwny swjedźeń
Poršicy. Na 60 ludźi je wčera wječor přišło na serbski spěwny swjedźeń do Poršic, kotryž wotmě so jako zazběh swjedźenskeho tydźenja składnostnje 800teho jubileja wsy. Skupina Přezpólni zanošowaše z wopytowarjemi hač do pózdnich hodźin jednu štučku po druhej. To budźeše w někotrymžkuli wopytowarju dopomnjenki na dźěćacy čas, jako w Poršicach a wokolnych wsach na tójšto kwasach hišće serbsce spěwachu.
Prastare swětłožołmowe signale
Paris. Swětnišćowe agentury ESA (wjacore europske kraje), NASA (USA) a CSA (Kanada) su dźensa prěni regularny wobraz, sfotografowaneho wot kosmosoweho teleskopa „James Webb“, wozjewili. Dotal „najbóle detailěrowane foto swojeho razu“ pokazuje mólički wurězk uniwersuma, kajkiž před něhdźe 4,6 miliardami lětami wupadaše.
Wraki ruskich tankow w Praze
Krótkopowěsće (11.07.22)
Hilbert dale w zastójnstwje
Drježdźany. Dirk Hilbert wostanje wyši měšćanosta stolicy Sakskeje. Kandidat towarstwa „Njewotwisni wolerjo za Drježdźany“ zdoby sej při wčerawšich rozsudnych wólbach 45,3 proc. hłosow. Prěni raz po lěće 1994 poradźi so tak amtěrowacemu měšćanosće tam znowawuzwolenje. Na druhim resp. třećim městnje slědujetaj Eva Jähnigen (Zeleni) z 38,3 proc. a Maximilian Krah (AfD) 12,2 proc.
Sydom wosobow kandiduje
Choćebuz. Sydom wosobow nastupi k wólbam Choćebuskeho wyšeho měšćanosty 11. septembra. Su to Lars Schieske (AfD), Thomas Bergner (CDU), Tobias Schick (SPD), Sven Benken (Naš Choćebuz), Felix Sicker ( FDP), Lysann Kobbe (Die Basis) a kandidat-jednotliwc Johann Staudinger. Wokrjesny wólbny wuběrk je jich minjeny pjatk wobkrućił. Wyši měšćanosta Holger Kelch (CDU) zastojnstwo ze strowotniskich přičin złoži.
Róčnicu „wowki“ wopominali
