Wčera popołdnju su Helena Hejduškec, Sophie Hejduškec, Fabian Hejduška a Kito Mark wobydlerjam Chróšćanskeho Domu swj. Ludmile serbske adwentne a hodowne spěwy přednjesli. Za to běchu sej program zestajeli. Fabian Hejduška z Hory powěda: „To su mjez druhim tajke kaž ,Witamy tebje, naš Zbóžniko‘, ,Dźowka Cion‘, ,Zešła je krasna róža‘, ,Bratřiko, stań‘, ,Přadła je Marja kudźałku‘ a wězo ,Ćicha nóc‘. Prěnje spěwy su wobydlerjo starownje jara nutrnje sćěhowali a so ze sylnym přikleskom dźako­wali. Pola poslednjeju su samo sobu spěwali. To běše tež za nas jara hnujacy, wosebity wokomik.“ „Scyła“, tak Fabian Hejduška dale rozprawja, „smy wjeseli, zo móžachmy tam spěwać. Chcychmy zdobom staršim ludźom dohodowne wjeselo wobradźić. Ćim rjeńšo tuž, hdyž posměwk na jich wobličach wuhladaš.“ Foto: Jan Bogusz

Wulce zwjeseliła je překwapjenka Madlen Krenz (zady naprawo), nawodnicu Domu zetkanjow na Ulricha von Huttenowej hasy we Wojerecach. Něhdyša sobudźě­ła­ćerka Annelie Masch (nalěwo) pěstuje dobry zwisk k zarjadnišću CityFitness. Te bě před něšto tydźenjemi namołwjało k darowanskej akciji za dźěći, kotrež zastaruja při tafli w nošerstwje towarstwa „Zjednanliwosć powołanja a swójby w Sakskej spěcho­wać“. Z taflu, poliwkowej kuchnju, meblowej dźěłarnju a dalšimi poskitkami angažuja so sobudźěłaćerjo za socialnje słabych. Wothłós na akciju bě přewšo dobry. To je tež zastupowacu nawodnicu sportoweho studija Carolu Nitsche (prědku ­nalěwo) zradowało. Dary nětko potrěbnym dźěćom rozdźěleja a so tak za nje wo wjesołe hody staraja. Foto: Silke Richter

Rjanu překwapjenku dožiwichu wčera wopytowarjo dnjoweje hladarnje „Při Krabatowym puću“ we Worklecach. Jim wo­bradźichu holcy a hólcy tamnišeho horta pisany program z pěsnjemi, basnjemi, rejkami a instrumentalnymi kruchami. Na kón­cu přepodachu mali hosćo staršim ludźom samospaslene dariki. Foto: Feliks Haza

Wojerecy (KD/SN). Kóžde druhe lěto spožča město Wojerecy Čestnu jehłu Günthera Petersa wobydlerjam, kotřiž často hižo lětdźesatki čestnohamtsce na do­bro wobydlerstwa skutkuja. Njedawno je Uwe Vogel wot wyšeho měšćanosty Torstena Rubana-Zeha (SPD) w starej rad­ni­cy tajke wuznamjenjenje přijimał, do­kelž­ je wón wot lěta 1993 čestnohamtski sudnik na Sakskim krajnym socialnym sudnistwje w Kamjenicy.

Měsačnje jězdźi Uwe Vogel do Ka­mjenicy, hdźež so na prawniskich wu­sudach za zbrašenych ludźi z cyłeje Sakskeje wob­dźěla, kaž 67lětny rozprawja. Při tym móže so jednać wo płaćenje wotškód­nje­nja abo wo wěste zapiski do wupokaza za ćežko­zbrašenych. Zapoda-li něchtó pře­ćiwo wusudam socialnych sudnistwow w Drježdźanach, Kamjenicy a Lipsku zna­pře­ćiwjenje, potom krajne socialne sudnistwo jako druha instanca tajki wusud přepruwuje, Vogel rozłožuje.