Budyšin (CS/SN). Mjeztym hižo pjatnaty raz přewjeduja tuchwilu nachribjetni­ko­wu akciju ewangelskeho cyrkwinskeho wobwoda Budyšin/Kamjenc za partnerski wobwod Meru w Tansaniji. Byrnjež lětuše wobstejnosće koronapandemije dla trochu wobćežniše byli, su wěriwi z wjacorych wosadow kaž tež dźěći ze šulow a pěstowarnjow něhdźe 3 000 šulskich nachribjetnikow napjelnili.

Wosebje wuzběhnyć smě so Serbska zakładna šula Budyšin. Tam su hižo krótko­ po zahajenju akcije 11. nowembra 2020 na wšěch 76 nachribjetnikow spakowali. Dalše tysac nachribjetnikow mó­ža­chu dźakowano pjenježnym daram kupić­ a pjelnić. Kóžda toboła wobsahuje šalku, taler, łžicu kaž tež trjenjo, zešiwki a wšelake pisaki.

Nachribjetniki dowjezechu minjene dny do bróžnje w Smochćicach. Dźesać dobrowólnych pomocnikow spakowa je tam do přećahowanskich kartonow. Ně­hdy běchu za to bananowe kisty wuži­wali. To pak hižo dowolene njeje, ­do­kelž mějachu wone dźěrki za pře­wětrjenje. Nowe kartony je nětko přećahowanska firma Gäbler ze sprjewineho města sponserowała.

Ralbicy (mwe/SN). Kaž Ralbičanski lěkar dipl. med. Gerd Jahny minjeny štwórtk zdźěli, budźe wón w swojej praksy ludźi wot apryla pře koronu šćěpić móc. Dokładny termin pak hišće rjec njemóžeše.

Domjacy lěkarjo a domjace lěkarki chcedźa skónčnje po cyłej Němskej při šćěpjenju pomhać. Tak so tež w dalšich hornjołužiskich lěkarskich praksach na to zaměrnje přihotuja. „Dawno žno so mje pacienća prašeja, hač budźe pola nas skónčnje móžno so šćěpić dać“, so Gerd Jahny bórzomneho šćěpjenskeho starta nadźija. Dotal wšak je to jenož w šćě­pjenskich centrach abo z pomocu mobilnych šćěpjenskich mustwow, mjez druhim w starownjach a hladarnjach, móžno. ­Kotry šćěpjenski srědk budu potom w Ralbicach a druhdźe wužiwać, dotal tež hišće jasne njeje. Dipl. med. Jahny pak cyle jasnje praji, zo je to poprawom wšojedne. „Kóždy srědk je jako škit skutkowny dosć.“