W časach špatnych powěsćow njedosahaceho medicinskeho zastaranja na wsach dla zhonimy dźensa nadźijepołny a pozitiwny přikład z Rakec. Před lětomaj zrodźi Rakečan mysličku, wopušćenu kupnicu přetwarić a tam strowotniski centrum zarjadować. W běhu krótkeho časa je ideju zwoprawdźił. Tak poskića tam Melcherec fyzioterapije wosebity trening na nastrojach. W kumštnej selowej prózdnjeńcy je specielne hojenje móžne. Tež optikarka Anett Pötschke w tam zarjadowanym wobchodźe wužiwarjow swojich posłužbow poradźuje. W zaměstnjenych rumnosćach je tež baba Romy Walter dospołnje wućežena. W januaru wotewrje lěkar Joachim­ Teich swoju praksu za powšitkownu medicinu,­ a bórze změja w strowotniskim centrumje samo hišće ergoterapiju. Tak nastanje poliklinika na wsy, z kotrejež ludźo wokoło Rakec njesměrnje profituja. Njech je to přikład druhim­ wjesnym kónčinam! Bianka Šeferowa

Hač stej to spěwaj „Recept“ abo „Jedyn, dwaj, tři po štyri ...“, w kotrymž so skupina PoŠtyrjoch lóštnje předstaja, a dalše zaručeja kóždolětnje na Rynčec statoku w Jaseńcy dobru serbsku zabawu. A rjenje je, zo chcedźa tam tež klětu zaso tajki koncert zarjadować. Tola bjez pomocnikow to mó­žno njeje. Znowa su Florian Rynč a dobrowólnicy bywšu bróžnju wurumowali a wupyšili, blida a ławki wobstarali a na dworje stan stajili, trěbne wino a piwo nakupowali a na wječoru samym předawali. K tomu poskićachu horce kołbaski a rybičkowe całty. Tuž je dawno načasu so jim wšěm tež raz zjawnje za to dźakować. Přetož jeno z telko lubosću so tajke krasne serbske zarjadowanje radźi. Wone njeje jeno za zabawu myslene, z beneficnym koncertom dźě je tež zhromadne darowanje zwjazane. Hač běchu to pomocne akcije TCM, Gerata Róbla a dalšich, za kotrež su w Jaseńcy dotal pjenjezy zběrali – njech so wšitke projekty poradźa. Bianka Wjeńcyna

Jusk a wulki přiklesk za wulkotny koncert

Jaseńca (BW/SN). Statok Floriana Rynča w Jaseńcy je so sobotu wječor z młodostnymi a ze starodawnymi fanami skupiny PoŠtyrjoch jenož tak pukał.

Něhdźe 120 připosłucharjow dožiwi tam na beneficnym koncerće w dobrym hodźinskim programje nimo cunich dohodownych tež žortne lubozne a friwolne štučki muskeju kwartetow PoŠtyrjoch a Die Hormonischen. Pjenjezy zběrachu lětsa za projekt „first responder“ wo­hnjoweju woborow Chrósćic a Worklec. Z pjenjezami chcedźa zapłaćić wosebite wukubłanje wobornikow za prěnju pomoc při njezbožu a nakupić nuzowej nachribjetnikaj z defilibratorom a dalšimi nastrojemi.

Dźewjaty raz mjeztym móžeše spěwar Jan Rjeda publikum pola Rynčec w bróžni witać, a zhromadnje z Krystofom Rjedu, Benom Hojerom a Marekom Rjelku zanjese kwartet PoŠtyrjoch woblubowane štučki. Po pěsni „Dwě róži kćějetej“ slědowachu žortnej spěwaj wo błótowskich kórkach a wo karpach z Picnja, lubosćinskej štučce a kěrluš „Zešła je krasna róža“. W jeho teksće wšak běchu zmylki zatwarjene, kotrež měješe publikum spóznać.

Budyska agentura za dźěło spěchuje přistajenje ćežko zbrašenych w firmach

Budyšin (CK/SN). W Hornjej Łužicy je 1 159 ćežko zbrašenych bjezdźěłnych registrowanych. To stej 7,2 procentaj wšitkich w regionje wot bjezdźěłnosće po­trjechenych. „Ludźo ze zbrašenjom su zajimowani, na mnohotne wašnje talentowani a indiwiduelnje poćežomni“, rěka ze stron Budyskeje agentury za dźěło. Kaž statistika wujewja, maja 74,3 procenty z nich wotzamknjene wukubłanje. 812 žonow a muži je powołanje nawuknyło, dalšich 49 akademiski stopjeń docpěło. „Tónle potencial mamy dźiwajo na pobrachowacych fachowcow na kóždy pad wužiwać“, zwěsći Ilona Winge-Paul. Operatiwna jednaćelka Budyskeje dźěłoweje agentury skedźbni na wulku motiwaciju a angažement ćežkozbrašenych w jobje. To su z reakcijow předewzaćow zhonili.