Habrachćicy (SN). Mediciniske zastaranje w Hornjej Łužicy so stabilizuje. Wot 19. meje je klinikum Horni kraj Hornjeje Łužicy w Habrachćicach nowu praksu za dermatologiju wotewrił. Zaměr je, ambulantne mediciniske zastaranje za chorosće kože stabilizować a ludnosći bliske puće poskićeć. Nowa praksa nasta z iniciatiwy Sakskeho zjednoćenstwa cho­robnych kasow (KV) a klinikuma Drježdźanskeje uniwersity. Klinika přewozmje w nowej praksy lěkarsku ekspertizu, zjednoćenstwo chorobnych kasow (KV) pak zamołwitosć za praksu. Tutón model zesylnja zhromadne dźěło mjez ambulantnym a stacionarnym zastaranjom a twori strukturu za přichod.

Pozadk iniciatiwy je, zo bě wot oktobra 2020 medicinske zastaranje w kónčinje Lubij-Žitawa­ njedosahaca. Najebać prócowanjow njebě móžno, dermatologa w bliskosći zasydlić. Nowa praksa KV je tuž nowy kooperatiwny zastaranski poskitk, při čimž dwě lěkarce uniwersitneho klinikuma tam skutkujetej. Z tutym projektom reaguja hłowni zamołwići zaměrnje na wužadanja we wjesnych kónčinach. Dźensa dopołdnja bu nowa praksa předstajena.

Kamjenc (SN/MiR). Zawrjenje porodźernje a gynekologije Kamjenskeje chorownje swj. Jana je dźensa nawječor tema wuradźowanja w Kamjenskim měšćanskim dźiwadle. Tam chcedźa Budyscy wokrjesni radźićeljo swoje žadanje za wurjadnym posedźenjom wokrjesneho sejmika do 31. meje wobkrućić. Dotal je na wšěch 30 radźićelow žadanje podpisało, kotrež wopřijima mj. dr. starosć wo mediciniske zastaranje serbskich wobydlerjow města Kamjenc a wokolnych wsow. Mjeztym je so tež předsyda Domowiny Dawid Statnik słowa jimał, kotrehož wot nošerja chorownje připowědźene zawrjenje porodoweje stacije a gynekologije zluda. „Solidarizuju so ze Serbami regiona, kotřiž so wo wobstaće stacijow prócuja. Připóznawam, zo je sej město w tutym dypku wažnosć serbskeho ludu wuwědomiło a tež, zo je dźěl našeho rěčneho ruma. Nadźijam so, zo město tole tež w druhich naležnosćach tak widźi a wotpowědnje jedna. Wo tym chcu z wyšim měšćanostu knjezom Preußom rěčeć“, Statnik zdźěli a piše dale: „Porodowa stacija njesměł wotrjad być, kotryž so jeničce po hospodarskich ličbach hódnoći.“

Wojerecy/Kamjenc (SN/MiR). Wot dźensnišeho poradźuja baby Wojerowskeho klinikuma Łužiska jězorina w Kamjencu maćerje. Nadawk maja baby z Wojerec wukonjeć. Tež w Kamjencu maja za to personal. Potrjechene baby, kotrež su hišće přistajene Kamjenskeje chorownje swj. Jana, su wo tym z medijow zhonili.

Lubij (SN/MiR). Monique Hänel a Franziska Schubert stej zašły štwórtk kampanju za natwar syće za porodnu pomoc w Hornjej Łužicy, wosebje na wuchodźe Sakskeje, zahajiłoj. „Jeli so porodna stacija w Kamjencu zawrje, mamy na wuchodźe Sakskeje jenož hišće štyri kliniki. Njemóžemy akceptować, zo ma žona 40 minutow a dlěje na porod do chorownje jěć. Jako maćeri čujemoj so nastupajo hrožacy wosud bjezmócnej.“ Přiwšěm wustupujetej žonje z cyle jasnymi politiskimi žadanjemi. „Pochadźam ze Zhorjelca a sym ze solidarity na demonstraciju do Kamjenca jěła. Swoje prěnje dźěćo sym w Habrachćicach porodźiła. Tamniša stacija je mjeztym zawrjena, runje tole hrozy staciji w Žitawskej chorowni. Tež tam so žadane 500 dźěći wob lěto njenarodźi. Jeli so dalše porodne stacije zawru, nje­změja žony w Hornjej Łužicy hižo móžnosć, swobodnje kliniku wolić, ale budu na jednu wjazane“, Monique Hänel rozłožuje. Schubert a Hänel stej iniciatiwu z perspektiwy maćerjow a njewotwisnje wot swojeho politiskeho skutkowanja załožiłoj. Mjeztym su hižo wjacore žony připowědźili, zo chcedźa ju podpěrać.