Knefle a wuměłstwo
Njeswačidło. Wot njedźele, 5. awgusta, budźe w Njeswačanskim domizniskim muzeju nowa wustajeńca přistupna. W přehladce předstaja z Nowosólca-Hródka pochadźacy Michael Voigt pod hesłom „Wuměłstwo a knefle“ swoju zběrku knefli. Přehladku wotewru w 14 hodź.
Ze sportom přećiwo rasizmej
Grodk. Swójby w Grodku wustupuja zaměrnje přećiwo rasizmej. Towarstwo Přećeljo swójbow wotměje tuž jutře, 4., a njedźelu, 5. awgusta, na Grodkowskim sportnišću mjeztym 4. koparski cup přećiwo rasizmej. Mustwa móža so hišće hač do jutřišeho w 10 hodź. na městnje přizjewić. Přihladowarjo su witani.
Jězba do Namysłowa
Chrósćicy (SN). Župa „Michał Hórnik“ přeprošuje čłonow a dalšich zajimcow na kubłansku jězbu wot pjatka 31. awgusta do njedźele 2. septembra do Namysłowa. Na programje steja wodźenje po měsće, wopyt radnicy kaž tež dalšich wosebitosćow města a wokoliny. Jězbu přewjedu z transporterami. Wotjězd je pjatk popołdnju z Chrósćic. Njedźelu po wobjedźe podadźa so na dompuć. Swójski přinošk za jězbu z přenocowanjom a połnym zastaranjom wučinja 80 eurow z přenocowanjom w dwułožowej stwě a 90 eurow z přenocowanjom w jednołožowej stwě. Přizjewjenja su do 16. awgusta w regionalnym běrowje Domowiny w Chrósćicach móžne. Telefonowe čisło (035796) 96254 a e-mail: .
Wo Domje biskopa Bena
Smochćicy (SN). Radijowy sćelak Deutschlandfunk wusyła zajutřišim, 29. julija, w swojim rjedźe „Njedźelne wuchodźowanje – Pućowanske noticy z Němskeje a swěta“ mjez druhim přinošk wo Smochčanskim Domje biskopa Bena. Wusyłanje je wot 11.30 do 13 hodź. a přinošk wobswětla stawizny daloko znateho doma.
60 000 přenocowanjow
Bórkowy (SN/mwe). „W Błótach so přenocowanske ličby jara pozitiwnje wuwiwaja“, Serbskim Nowinam Rene Loichen z turistiskeho zarjada w Bórkowach zdźěli. Tak je tam hač do kónca meje wjace hač 60 000 hosći přenocowanja w pensijach, hotelach a hóstnych stwach knihowało. Derje wopytane běchu po zwěsćenju Loichena Błótowska powěsćowa nóc, burske wiki a folklorna lawina. Mnozy z turistow so wosebje za serbske nałožki a drastu zajimowachu. Tuchwilu přihotuja so na domizniski a drastowy swjedźeń 24. awgusta w Bórkowach.
Jězba do Rumburka
Budyšin (SN). Na iniciatiwu Hajka Kozela přeprošuje Serbska Lěwica (krajne dźěłowe zjednoćenstwo Lěwicy w Sakskej) wšěch zajimcow składnostnje spočatka 1. swětoweje wójny před 104 lětami sobotu, 28. julija, na měrowu jězbu wot Budyšina do čěskeho Rumburka. Zdobom chcedźa na 100. róčnicu Rumburkskeho zběžka wojakow spominać. Započatk kolesowanskeje tury je w 9 hodź. w Budyšinje na parkowanišću wobydlerskeho běrowa Lěwicy – Šulerska 10. Zajimcy měli so telefonisce (0 35 91) 318 99 04 přizjewić.
Kino w młynje wupadnje
Čorny Chołmc (SN/mwe). Kino pod hołym njebjom tež lětsa, kaž hižo před lětomaj planowane, w Krabatowym młynje w Čornym Chołmcu njebudźe. Zarjadowanje wot 2. do 5. awgusta, w 21 hodź., pak přeco hišće w interneće w kalendrje młyna steji. Kaž wčera wozjewjene, pak to z „organizatoriskich přičin“ njebudźe. Jednaćel Krabatoweho towarstwa Tobias Čižik na naše naprašowanje zdźěli, zo su z tym mjez druhim falowace wuměnjenja kaž trěbne pjenjezy wina. Tuž njemóža so mjez druhim trěbne a předrohe techniske nastroje wobstarać. Kaž Čižik dale rjekny, „běchu tež druhe wobstejnosće ćežke“, a doda: „Smy połneje nadźije, zo kino klětu nachwatamy a našim swěrnym fanam rjane dožiwjenje zmóžnimy.“
Tikety wot 1. awgusta dróše
Budyšin (SN/mwe). We Wobchadnym zwjazku Hornje Łobjo (VVO), kotryž busowe linije tež w Budyskim wokrjesu zasadźuje, budu jězdźenki wot 1. awgusta dróše. „Płaćizny přerěznje wo 2,1 procent stupaja, wostanu pak potom za znajmjeńša dwě lěće stabilne“, w nowinskim wozjewjenju VVO rěka. Jako přičinu mjenuje nowinski rěčnik Christian Schlemper stupace kóšty za energiju.
Patzelt znowa we Łužicy
Diversity Festival pola Frizow
Budyšin. Pod hesłom „Terp of Tales“ přeproša Młodźina europskich narodnych mjeńšin wšitkich młodostnych w starobje 16 do 30 lět wot 5. do 12. awgusta do friziskeje wsy Grou w Nižozemskej. Zhromadnje chcedźa so tam wo bajkach a legendach mjeńšin wuměnjeć a je w kreatiwnych dźěłarničkach fotografije a dźiwadła kaž tež do projektneho chóra zapřijeć. Swójski přinošk za jězbu wučinja 80 eurow. Wšitcy, kotřiž maja lóšt zeznać młodostnych z cyłeje Europy a dožiwić tydźeń połny zajimawych wulětow, so njech přizjewja pola Serbskeho młodźinskeho towarstwa Pawk přez Facebook abo e-mailnje pod adresu .
Pytaja namjety za skupiny
Zahaja Łužiske hudźbne lěćo
Tři kapały na Pastwinej horje
Kamjenc. Po wuchodoněmskich rockowych legendach swjatki sobotu na Kamjenskej Pastwinej horje dožiwja tam sobotu, 28. julija, dalši koncertny wjeršk lěta. Tón dźeń hudźa tam wot 19 hodź. hnydom tři znate kapały zašłych lět, mjenujcy Nazareth, Creedence Clearwater Revived (CCR) a Omega. Zastupne lisćiki dóstanu zajimcy w znatych předpředawanišćach abo internetnje pod www.eventim.de.
Cyła wjes swjeći
Sulšecy. Z natočenjom piwa a wubědźowanjom wohnjowych wobornikow nad 40 lětami započnje so zajutřišim, pjatk, lětuši wjesny swjedźeń w delnich Sulšecach. Wječor pokazaja filmy z wjesneje „čapornje“. Sobotu wot 13 hodź. steji wubědźowanje w třělenju jědnatkow na programje a wot 21 hodź. tak mjenowany „WiesnBeats“. Wjeršk budźe njedźelu w 16 hodź. swjedźenski program „Sulšecy news“. Wjesna rada, wohnjowa wobora a młodźina wšitkich přeprošeja.
Pytaja blachowe wotpadki
Budyšin. Za lětušu hodownu klankodźiwadłowu inscenaciju pyta Budyske NSLDź blachowe wěka za šrubowanje, wěka piwowych blešow a dalše blachowe wotpadki we wšěch barbach a formach. W inscenaciji póńdźe wo to, kak móžeš tajke a podobne wěcy zmysłapołnje wužiwać. Tuž móža zajimcy swoje wupalene čajowe swěčki, skóncowane wěka horncow, zezerzawjene křidy a podobny čapor wot 28. awgusta hač do 9. nowembra při dźiwadłowej kasy k wotewrjenskim časam wotedać.
Wustajeja pruwowanske dźěła
Kamjenc. Zwjazk blidarjow Budyskeho wokrjesa přeproša zajimcow sobotu, 21. julija, do rumnosćow EWAG w Kamjencu, Při měšćanskich zawodach 2. Tam budu tón dźeń wot 14 do 16 hodź. widźeć pruwowanske dźěła wučomnikow, kotřiž su po třoch lětach swoje blidarske wukubłanje wuspěšnje zakónčili. Zastup je darmotny. Kaž w přeprošenju rěka, móža so wopytowarjo wo fachowych kmanosćach wučomnikow we wšelakich specialnych směrach, kaž su to twar durjow, meblow abo schodow, přeswědčić a budu překwapjeni, kak mnohostronsce a kreatiwnje su wukubłancy dźěłali.
Wot póndźele móst zawrjeny
Budyšin. Dróhotwarskich dźěłow na Budyskej Hasy Clary Zetkin dla budźe Móst měra wot póndźele, 16., hač do soboty, 21. julija, dospołnje zawrjeny. Wot kružneho wobchada hač k Leibnitzowej budźe wotrězk dróhi slepa hasa. Wobchad do města powjedu kaž hižo zašłe tydźenje přez Móst swjateho ducha a Wonkownu Lawsku. Z města won dyrbja awta přez Nowosólsku a zapadnu tangentu jězdźić. Kolesowarjo a pěšcy móža zawrjeny wotrězk dale wužiwać.
Wodźa zajimcow po měsće
Biskopicy. Tři radnicy steja jutře, sobotu, w srjedźišću zjawneho měšćanskeho wodźenja w Biskopicach. Prěnju radnicu natwarichu 1286 na torhošću. Dźensniša nasta tam před 200 lětami na zakładnych murjach druheje radnicy. Zajimcy zetkaja so w 15 hodź. při radnicy na torhošću. Přizjewić so njetrjebaja.
Ponowja wotrězk puća
Łomsk. Statna dróha S 106 we Łomsku w Radworskej gmejnje budźe wutoru, 17. julija, dospołnje zawrjena. Přičina su dróhotwarske dźěła. Po 240 metrow dołhim wotrězku pokryja tam puć z nowej asfaltowej worštu.
Swjeća 20lětne wobstaće
Smječkecy. Z wjesnym swjedźenjom zhladuje Smječkečanski wjesny klub Při winicy wot zajutřišeho hač do njedźele, 15. julija, na 20lětne wobstaće. Po pjatkownym natočenju piwa změja sobotu popołdnju wosebity program za młode swójby z wubědźowanskim parcoursom. Dobyćerjej kiwa jako prěnje myto swójbny lisćik za Wojerowski zwěrjenc. Wječor zahrajetaj diskoteka Melodia ze Serbskich Pazlic a Berlinski DJ Nellski. Wot 20.30 do 21.30 hodź. změja tak mjenowanu happyhour, hdyž poskića dwaj napojej za płaćiznu jednoho. Po njedźelnym rańšim piwku slěduje w 14 hodź. ekumeniski nyšpor w ewangelskej cyrkwi z fararku Karin Großmann a z diakonom Pětrom Mrózom. Po tym su wšitcy na kofej a tykanc kaž tež na pisany program wjesnjanow a hosći přeprošeni.
Wězo pokazaja w 17 hodź. finalnu hru koparskich swětowych mišterstwow. Wšitcy zajimcy su tuž do Smječkec wutrobnje přeprošeni.
