Prěni króć hódnoća tykanc
Budyšin (SN). Po tym zo su so tež serbscy pjekarjo zašły tydźeń na hódnoćenju chlěba a całtow w Budyšinje wobdźělili, přihotuje pjekarske zjednoćenstwo Budyskeho wokrjesa prěni króć wubědźowanje słódkich specialitow, tykancow. Premjera budźe 18. měrca na Kamjenskich wikach „WIR“.
Za wjace serbskosće
Kalawa (SN). Hižo něšto lět přewjeduje Šula za delnjoserbsku rěč a kulturu Choćebuz tež wjacore zarjadowanja w Kalawje. Kaž nawodnica šule Marja Elikowska-Winklerowa našemu wječornikej zdźěli, su to přednoški k serbskopolitiskim a stawizniskim temam, a to ze serbskimi referentami. Wone wotměwaja so w kooperaciji z tamnišim zarjadnišćom „Haus für Heimatgeschichte“, z jeho spěchowanskim towarstwom a z cyrkwju. Šula studijne jězby organizuje tež do Kalawy, Wětošowa a Lubina.
Klinika třeći pječat dóstała
Křesćan Krawc čitał
Delni Wujězd (JoS/SN). Serbski spisowaćel Křesćan Krawc je we wobłuku „čitanskeje zymy“ njedźelu w Delnim Wujězdźe ze swojeho noweho romana „Ende vom Paradies“ čitał. Domizniske towarstwo bě „čitansku zymu“ před 15 lětami załožiło. Štyri tajke zymske zarjadowanja su jara woblubowane. Domizniske towarstwo dźěła z nakładnistwom Lusatia wusko hromadźe, a nakładnik dr. Frank Stübner dokładnje wě, kotru literaturu sej ludźo přeja. Po čitanju chcychu Delnjowujězdźenjo a jich hosćo hišće wjele wot Křesćana Krawca wědźeć, mnozy sej jeho roman skazachu.
Wopominanska Boža mša
Kamjenc (SN). W kapałce Kamjenskeje chorownje maltezow prawidłownje zemrětych wopominaja. Přichodna Boža mša za wšěch, kotřiž su wot srjedź oktobra 2015 hač do kónca januara 2016 w chorowni zemrěli, budźe jutře, 17. februara, w 16.30 hodź. „Chcemy mjena zemrětych mjenować, a za kóždeho zapalimy swěčku při jutrownej swěčce a stajimy ju na wołtar. Swójbni a bliscy přiwuzni su njewotwisnje wot nabožneje zwjazanosće přeprošeni“, nowinska rěčnica chorownje Ines Eifler dźěli.
Kurs serbšćiny za dźěći
Informuje wo powołanjach
Biskopicy. Powołanski poradźowar Zhorjelskeje policajskeje direkcije informuje štwórtk, 11. februara, wot 10 hodź. w Biskopičanskej agenturje za dźěło na Stołpinskej 15 wo móžnosćach wukubłanja a studija. Wotmołwjeć budźe tež na wšitke prašenja nastupajo policajske powołanja. Přizjewjenje njeje trěbne.
Čita wo paradizu
Delni Wujězd. W swojej 15. čitanskej zymje přeproša Delnjowujězdźanske domizniske towarstwo Křesćana Krawca, zo by čitał z němskorěčneje wersije swojeho romana „Paradiz“ wo serbskej swójbje w pjećchěžkowym sydlišću na kromje hole. Čitanje wotměje so njedźelu, 14. februara, w 16 hodź. w bywšim gmejnskim zarjadnistwje na Hrodowej 1.
Přednošuje wo přirodźe
Přednošuje wo Janu Kilianu
Bukecy. Na Ewangelskej srjedźnej šuli w Bukecach budźe přichodnu wutoru, 26. januara, přednošk wo Janu Kilianu. Trudla Malinkowa referuje tam wot 19 hodź. wo serbskim ewangelsko-lutherskim fararju. Wón bě lěta 1854 z 558 dalšimi Serbami do Ameriki wupućował a so w Texasu zasydlił. Ewangelske šulske towarstwo na zarjadowanje přeproša.
Wutoru do muzeja
Wojerecy. We wobłuku swojich wutornych zjawnych zarjadowanjow wotměje Wojerowski měšćanski muzej w tamnišim hrodźe 26. januara w 16 hodź. wodźenje po nowym dožiwjenskim wobłuku trajneje wustajeńcy. Z interaktiwnymi wuknjenskimi stacijemi, miniaturnym hrodom, archeologiskim wuhrjebanišćom a słuchanskimi stacijemi tam stawizny města inscenuja. Zastup płaći pjeć eurow, potuńšene tři.
Stajne blido Zelenych
Budyšin. Zapósłanča Sakskeho krajneho sejma Franziska Schubert (Zwjazk 90/Zeleni), rěčnica swojeje frakcije za serbske prašenja, budźe wutoru, 26. januara, hósć stajneho blida Budyskeho zwjazka Zelenych w towarstwowej stwě Kehelernje. Zarjadowanje, na kotrež su zajimcy přeprošeni, započnje so w 19 hodź.
Přeprošeja do šule
Radwor. Zo bychu šulerjow a staršich při pytanju za dale wjeducej šulu po 4. lětniku podpěrali, přeprošeja wučerjo a šulerjo Radworskeje Serbskeje wyšeje šule „Dr. Marja Grólmusec“ jutře, 15. januara, wot 18 do 20 hodź. na dźeń wotewrjenych duri. Šulerjo prezentuja swoje wudźěłki z jednotliwych předmjetow a dźěłowych zjednoćenstwow. Na prašenja k šulskemu wotběhej wučerjo kaž wuknjacy rady wotmołwjeja. Šulski a ratarski muzej budźe runje tak přistupny kaž sportownja.
Wotewru ponowjeny dom
Budyšin. Składnostnje 25lětneho wobstaća socialneje stacije Carity Budyšin-Kamjenc a składnostnje wotewrjenja saněrowaneho domu zwóńka wotměje so jutře, pjatk, na Budyskim Cyrkwinskim naměsće 2 swjedźenske zarjadowanje. Socialna stacija Carity je jedna z prěnich, kotruž běchu po politiskim přewróće załožili, zo móhli pacientow w domjacej wokolinje hladać. Tak mjenowany dom zwóńka, jón su loni wjacore měsacy saněrowali, skići Cariće nětko přidatne poradźowanske rumnosće a tuž lěpše dźěłowe wuměnjenja. Wot 14 do 17 hodź. móža sej zajimcy jutře dom wobhladać.
Tropowy dom zawrjeny
Předstaji nowe twórby
Lipsk. „Słowjanske čitanske jewišćo“ w Lipsku přeproša štwórtk w 20 hodź. na literarnu bjesadu z basnikomaj Janom Kuhlbrodtom a Benediktom Dyrlichom. „Poniatowski Polski – bara a korčma“ na Křižnej hasy 15 je nošer jewišća, kotrež literaturu słowjanskich spisowaćelow wobstajnje prezentuje, a to dwurěčnje. Na wječorku přednjese Dyrlich někotre swoje nowe twórby w serbskej a němskej rěči.
Rozprawjatej wo putnikowanju
Chrósćicy. Přichodne zarjadowanje w Chróšćanskej putniskej hospodźe wotměje so pjatk, 15. januara, w 20 hodź. Beate Gruß a Monika Gerdesowa rozprawjatej wo swojim štyritydźenskim putnikowanju w Francoskej loni nalěto wot Dijona hač do Le Puy-en-Velay. Wopytowarjo zhonja, što stej putnicy na 400 kilometrow dołhim puću dožiwiłoj a kotrych ludźi, kotre krajiny a cyrkwje stej při tym zeznałoj. Přednošk z wobrazami budźe němskorěčny.
Hdźe w měsće parkować?
Awkcija nětko online
Wojerecy. Po nowych pućach kroči město Wojerecy wotnětka při awkcijach namakanych wěcow. Mjeztym zo běchu je dotal w swojim wobydlerskim běrowje na Dillingenskej dróze 1 přesadźowali, činja to wot lětušeho pospytnje online, město zdźěla. Po tym zo namakane wěcy šěsć měsacow wobchowaja, tak zo móža sej je wobsedźerjo zaso wotewzać, je nětko na stronje www.zoll-auktion.de poskićeja. Tak móža tež ći sobu poskićować, kotřiž so dotal na terminach přesadźowanja wobdźěleć njemóžachu.
Za seminar so přizjewić
Smochćicy. Hišće hač do jutřišeho móža so zajimcy za pisanski seminar pod hesłom „Žiwjenske slědy“ přizjewić. Smochčanski Dom biskopa Bena přewjedźe jón wot 22. do 24. januara. Z mnohimi pokiwami a zwučowanjemi chcedźa wobdźělnikow pozbudźeć, zo swójske abo žiwjenske slědy druheho napisaja.
Nowe lěto na snobjed
Hórki. Štóž chce po silwesterskim hejsowanju lěto 2016 trochu měrnišo započeć, změje k tomu w Hórčanskim Młynkec hosćencu składnosć. Tam zarjaduja nowolětny brunch, potajkim kombinaciju ze snědanje a wobjeda, za čož je so mjeztym tež serbski wuraz snobjed zadomił. Skazanki přijimuja pod telefonowym čisłom 035796/ 96 290.
Do praksy pohladnyć
Pančicy-Kukow. Dotalna Wjenkec fyzioterapeutiska praksa w Pančicach-Kukowje přeńdźe na nowe lěto do rukow noweje mějićelki Kerstin Matcyneje. Při tej składnosći wuhotuje wona sobotu, 2. januara, wot 10 do 14 hodź. dźeń wotewrjenych duri. Zajimcy změja składnosć, sej rumnosće wobhladać a so wo fyzioterapeutiskich wukonach wobhonić.
Přednošk wo putnikowanju
Chrósćicy. Hnydom prěnju sobotu noweho lěta, potajkim 2. januara, pokročuja w Chróšćanskej putniskej hospodźe z dalšim zarjadowanjom zymskeje sezony 2015/2016. W 19.45 hodź. porěči Gabi Nowottnick z Berlina wo putniskich pućach a putniskich hospodach w Šwicarskej. Zarjadowanje je w němskej rěči. Nazajtra w 17 hodź. budźe w Gerdesec hospodźe zaso serbske dźěćace kino.
Podpěruja dźěsćownju
Wuježk (SN). Budyski hotel Best Western podpěruje z wosebitej akciju dźěsćownju we Wuježku pod Čornobohom. Tamniši wobydlerjo wšelakich starobnych skupin su swoje hodowne přeća na kartu napisali a ju na hodowny štom w foyeru hotela powěsnyli. Někotre z tychle přećow spjelnja hotel respektiwnje jeho sobudźěłaćerjo. Tamne móhli hosćo hotela spjelnić pomhać, zo wěstu sumu pjenjez za tajke přeće přepokazaja. Tež zajimowani Budyšenjo a wopytowarjo města móža so na akciji wobdźělić a tak wobydlerjam Wuježčanskeje dźěsćownje rjane hody wobradźić.
Rěčne koło so zetka
Wojerecy. Po njedawnej premjerje přewjedu we Wojerowskim Domowinskim domje na Drježdźanskej dróze 18 dalše serbske rěčne koło. Srjedu, 16. decembra, w 16 hodź. póńdźe wo serbsku narodnu drastu. Zarjadowanje organizuje župa „Handrij Zejler“ zhromadnje z Towarstwom k hajenju regionalneje kultury srjedźneje Łužicy. Wšitcy zajimcy su wutrobnje přeprošeni. Wuhotowarjo nadźijeja so bohateho wopyta.
Nowa wustajeńca w galeriji
Budyšin. „Wuměłstwo w zběranju a darjenju“ rěka nowa wustajeńca, kotraž je wot dźensnišeho w galeriji Budissin na Budyskej Hrodowskej 19 widźeć. Z twórbami zastupjeni su tam mjez druhim Iris Brankačkowa, Isa Bryccyna, Borbora Wiesnerec a Ulrike Mětškowa.
Pišćelowa hudźba w klóštrje
Pančicy-Kukow. Adwentny pišćelowy koncert budźe zajutřišim, njedźelu, w 16.30 hodź. w klóšterskej cyrkwi w Pančicach-Kukowje. Organist Drježdźanskeje dwórskeje cyrkwje Johannes Trümpler hraje mjez druhim twórby Bacha, Widora a Weyraucha.
