Za wiki so přizjewić
Sulšecy. Druhi raz přewjedu njedźelu, 24. měrca, wot 14 hodź. wiki za dźěćacu drastu a hrajki, a to w kulturnym domje delnich Sulšec. Dale w poskitku budu tam najwšelakoriše wěcy, kotrež móhli starši małych dźěći derje trjebać. Štóž chce sam něšto poskićeć, njech přizjewi so hač do pjatka, 22. měrca, za darmotne stejnišćo pod telefonowym čisłom 0171 / 2 11 42 79.
Drustwo přeproša
Chrósćicy. Na swoju hłownu zhromadźiznu přeproša Chróšćanske hońtwjerske drustwo wšitkich wobsedźerjow ležownosćow wutoru, 26. měrca, w 19 hodź. do Chróšćanskeho Krawčikec hosćenca. Organizatoriskich přičin dla proša zamołwići wo to, so hač do zajutřišeho, 22. měrca, přizjewić.
Štó chce sobu hrać?
Budyšin. NSLDź pyta tójšto žonow a muži w starobje 16 do 25 lět, kotřiž chcyli w lětušim lětnim dźiwadłowym kruchu „Słónčna aleja“ sobu hrać, mjez druhim jako čłonojo SNM (FDJ) abo namjezni wojacy. Casting budźe 6. apryla wot 11 hodź. Zajimcy njech přizjewja so pod mejlowej adresu .
Pytaja kubłarku abo kubłarja
NSLDź zahraje
Budyšin. Lubowarjo dźiwadła maja přichodne dny wjacore składnosće sej předstajenja Němsko-Serbskeho ludoweho dźiwadła wobhladać. Tak zahraja jutře, sobotu, w 19.30 hodź. swoju najnowšu inscenaciju „Wopušćeny dom“ na hłownym jewišću NSLDź. Zajutřišim, njedźelu, pokazaja w 16 hodź. klankodźiwadło „Kito husličkar“ w Ćišćanskim socialnym domje při sportnišću. A srjedu, 20. měrca, w 15 hodź. změje inscenacija serbskeho dźěćaceho dźiwadła NSLDź „Mały Muk“ premjeru w Dźiwadle na hrodźe.
Do powołanskeje šule
Kamjenc. Dźeń woterwrjenych duri změja jutře, sobotu, wot 9 do 13 hodź. w Kamjenskim powołansko-šulskim centrumje. Na Wysokej hasy 4 a na Jahnowej 11 móža so zajimcy wo wukubłanskich móžnosćach we wšitkich pjeć šulskich družinach wobhonić. We wobłukach běrow, drjewo a barba móža woni šulerjam při praktiskim dźěle přihladować a so tež sami pospytać.
Z redakciju SN so rozmołwjeć
Pančicy-Kukow. Na rozmołwu wo dźěle serbskeho wječornika přeprošatej Domowinska skupina Pančicy-Kukow a redakcija Serbskich Nowin jutře, štwórtk, 14. měrca, w 19 hodź. do Karstenoweje piwoweje stwički w Pančicach-Kukowje. Šefredaktor a jeho sobudźěłaćerjo rozprawjeja wo swojim wšědnym dźěle, su wćipni na kritiki a wjesela so na pokiwy, što chcyli ludźo rady w našim wječorniku čitać. Nimo skupinarjow su tež dalši zajimcy wutrobnje přeprošeni.
Darmotnje do interneta
Wojerecy. Wobydlerjam a wopytowarjam Wojerec skići město wotnětka móžnosć, přez tak mjenowane hotspoty darmotnje w interneće surfować. Na dohromady dźewjeć městnach we Wojerowskim centrumje kaž tež w přisłušacych wsach su tak mjenowane „Hoyspoty“ k dispoziciji. Krótko do spočatka turistiskeje sezony wobhladuja zamołwići w radnicy to předewšěm jako přidatny poskitk turistam, kotřiž móža so tak na městnje wo dowolowych a wólnočasnych móžnosćach wokoło Wojerec informować.
Wo dwurěčnym kubłanju
Stróža. Informaciski wječor za staršich, wowki a dźědow kaž tež za dalšich zajimcow pod hesłom „Dwurěčne kubłanje jako wužadanje – šansy a perspektiwy“ wotměje so jutře, 13. měrca, w 19 hodź. w Stróžanskim Domje tysac hatow. Přeprošeja Budyska župa, Malešanska gmejna a Rěčny centrum WITAJ. W přednoškomaj rozłoža wosebitosće rěčneho wuwića při wjacerěčnosći a předstaja bilingualnu wučbu po koncepće 2plus. Pozadk je předstejacy přećah Bartskeje zakładneje šule do Malešec.
Předstaja kandidatow
Budyšin. Za přichodnym stajnym blidom Budyskeje CDU chcedźa swojich kandidatow za wólby noweje měšćanskeje rady předstajić. Zarjadowanje wotměje so jutře, srjedu, w 19 hodź. w Budyskim hotelu „Best Western Plus“ při Serbskich hrjebjach. Dohromady 53 ludźi za lisćinu CDU kandiduje.
Twarožk w srjedźišću
Dawa pokiwy za požadanje
Jazz a Bach w cyrkwi
Budyšin. Prěnja duchowna hudźba we wobłuku wuměłstwoweho projekta katolskeje a ewangelskeje wosady swj. Pětra w Budyšinje pod hesłom „Swětło pozbudźa“ (wot 6. měrca do 9. junija) zaklinči jutře, sobotu, w 17 hodź. w Budyskej cyrkwi Našeje lubeje Knjenje. Pod hesłom „Jazz koresponduje z Bachom“ zahraja Jan Brězan na e-pianje, Józef Brězan a Philipp Adam na gitarje, Friedemann Böhme na pišćelach a Terence Lohr na bijadłach. Spěwać budźe Anna Batz. Zastup je darmotny. Wšitcy su wutrobnje přeprošeni.
Wo dwurěčnym kubłanju
Stróža. Informaciski wječor za staršich, wowki a dźědow kaž tež za dalšich zajimcow pod hesłom „Dwurěčne kubłanje jako wužadanje – šansy a perspektiwy“ wotměje so srjedu, 13. měrca, w 19 hodź. w Stróžanskim Domje tysac hatow. Na nje přeprošeja Budyska župa, Malešanska gmejna a Rěčny centrum WITAJ. W přednoškomaj rozłoža wosebitosće rěčneho wuwića při wjacerěčnosći a předstaja bilingualnu wučbu po koncepće 2plus. Pozadk je předstejacy přećah Bartskeje zakładneje šule do Malešec.
Přewjedu póstne seminary
Debjene jejka zapodać
Budyšin. Spěchowanski kruh za serbske ludowe wuměłstwo skedźbnja na to, zo je hišće hač do 8. měrca móžno, kolekcije debjenych jejkow za 66. wubědźowanje wo najrjeńše serbske jutrowne jejko wotedać. Kolekcije po třoch jejkach móža we wóskowanskej, škrabanskej, wužrawanskej a bosěrowanskej technice być. Dobyćerske kolekcije pokazaja na serbskich jutrownych wikach 16. a 17. měrca w Budyskim Serbskim domje.
Zahaja pišćelowy cyklus
Wojerecy. Přichodne tydźenje přewjedu we Wojerowskim Domje Martina Luthera Kinga zaso „Pišćelowy cyklus w póstnym času“. Za mjeztym dwanaty tajki cyklus móžachu zaso znatych interpretow zdobyć. Woni hudźa njedźelu, 17., 24. a 31. měrca kaž tež 7. apryla stajnje w 17 hodź. Cyklus zahaja jutře, štwórtk, w 19.30 hodź. z cembalowym koncertom. Z hosćom w Domje Luthera Kinga budźe prof. Andreas Marti z Züricha.
Zetkaja so před radnicu
Stipendije za kurs čěšćiny
Budyšin. Čěske knježerstwo přewostaja tež lětsa zajimowanym Serbam stipendije za intensiwny rěčny kurs čěšćiny w Praze wot 26. julija do 23. awgusta a w Českich Budějovicach wot 18. awgusta do 9. septembra. Stipendije posrědkuje Rěčny centrum WITAJ (tel. 03591/ 550 400, e-mail: ). Zajimcy njech tam hač do 15. měrca swoje podłožki wotedadźa.
Přihotuja strowu snědań
Pančicy-Kukow. Na dnju stroweho zežiwjenja přewjedźe Miłočanski Křesćansko-socialny kubłanski skutk w dwěmaj ze swojich zarjadnišćow zajutřišim wot 14 hodź. wosebitu akciju. W nowym horće w Pančicach-Kukowje chce zežiwjenska wědomostnica Raphaela Wićazowa z holcami a hólcami strowu snědań z wjacorych komponentow přihotować. Samsny poskitk přewjedźe Elžbjeta Hojerjowa na Wojerowskej dźěćacej a młodźinskej farmje.
Štó chce na balu rejwać?
Klanki zhotowić
Stróža. Praktiski seminar wo zhotowjenju powěsćowych figurow w formje klankow wotměje so jutře, sobotu, wot 10 do 16 hodź. w Stróžanskim Domje tysac hatow. Designerka Regina Herrmann wobdźělnikam demonstruje, kak móža z jednorymi srědkami z tekstilijow klanki zhotowić a je po swójskich předstawach wuhotować. Wobdźělenje płaći 11,50 eurow a pjeć eurow za material.
Jens Spahn porěči
Budyšin. Na politisku popjelnu srjedu přeprosy Budyski zapósłanc Marko Šiman srjedu, 6. měrca. To budźe zjawne zarjadowanje w sportowni na Budyskim Třělnišću. Wot 19 hodź. porěčitaj tam zwjazkowy strowotniski minister Jens Spahn a sakski europski zapósłanc Herrmann Winkler (wšitcy CDU). Zajimcy su wutrobnje witani.
Serbske blido w muzeju
Hraja „Kita husličkarja“
Budyšin. Štóž njeje klankodźiwadłowu hru Němsko-Serbskeho ludoweho dźiwadła „Kito husličkar“ hišće widźał, móže to jutře, 1. měrca, w 10 hodź. w Budyskim Dźiwadle na hrodźe nachwatać. Dalše předstajenje klankohry budźe njedźelu, 3. měrca, w 14 hodź. w Drježdźanskim Dźiwadle młodeje generacije.
Město zdźěla zawrjene
Kulow. Wot soboty, 2. měrca, w 10 hodź. hač do wutory, 5. měrca, w 24 hodź. budu w Kulowje póstnicow dla zdźěla wobšěrne haćenja nadróžneho wobchada. W tym času smědźa jenož wobydlerjo sami do nutřkowneho města jěć. Za čas karnewaloweju ćahow sobotu wot 13 do 16.30 hodź. kaž tež póndźelu wot 12 do 16.30 hodź. budźe nutřkowne město za wobchad dospołnje zawrjene. Wopytowarjo měli wupisane parkowanske móžnosće wužiwać, mjez druhim při Kobrec młynje a při dwórnišću. Při statnej dróze S 95 do Wóslinka a při S 285 do Mučowa je parkowanje zakazane. Wjacore linijowe busy pojědu kónc tydźenja resp. póndźelu kaž tež wutoru po změnjenym planje. Ludźo njech wobkedźbuja wotpowědne wuwěški při zastanišćach.
