W Nauenje woheń předwidźanu přebywarnju ćěkancow zničił
Berlin/Drježdźany/Nauen (dpa/SN/K). Wubuchnjena namóc w Sakskej přećiwo ćěkancam a azylantam – wosebje wuraznje a zlě w Heidenauwje – politikarjow šokuje a zdobom alarmuje. Prezident Němskeho zwjazkoweho sejma Norbert Lammert je tele krawale jako „hańbu“ zasudźił. Wone su „za naš kraj njepřijomne“, wón zwurazni. Je wšak tak, zo wotmołwja so na kóždu akciju přećiwo cuzym z 20 akcijemi za nich. „W Němskej je jimaceje, spontaneje a wobšěrneje zwólniwosće, ćěkancam pomhać“, Lammert zwěsći. Demonstracije a namócnosće wuchadźeja z móličkeje skupinki, často podpěraneje wot pućowacych krawalnikow.