Zaćišće wo lětnjej jězbje po Balkanje dwaceći lět po wójnje (3. dźěl)

Město Goražde je so po kóncu krawneje wójny poměrnje derje wuwiwało; njedawno móžachmy we wulkej němskej nowinje samo wo „hospodarskim dźiwje nad Drinu“ čitać. Wjacore wjetše zawody nastachu abo buchu wobnowjene abo samo nowozałožene. A hižo někotre lěta staja tule Socialdemokratiska strona – jedna z mało stronow, kotrež so njewotwisnje wot etniskich hranicow za zhromadnu Bosnisku zasadźeja – měšćanostu, runje tak kaž w bliskej, hižo do Republiki Srpskeje słušacej Foči. Susodnej měsće zaso derje hromadźe dźěłatej, štož je runje za Goražde tež trjeba, wšako by z federaciju a Sarajewom hewak jeno přez njeasfaltowany horinski pućik zwjazane było.

SARAJEWO